*აკა დუდი გამკარჩქინი
აკა დუდი გამკარჩქინი
ქინმოჯინე სქანი გურცუ,
ხომ ქოგიჩქ თე ცხოვრება...
თოლი ირძღუ დო თოლი შუნცუ.
კანკალეშა ზარხულც ხოლო,
ქოთი ჭვენც დო ქოთი თუნცჷ,
გიჩქუდას თიმ დროს გურცუ
ალ დაჩხირი რზჷნ დო ჭუნცუ.
მუდგარენი ქჷმგოტყობანც
აიცხვანტალუანც შურცუ,
გურშა ქენოიდოხოდჷ დო
მუთუნ ფერო ვაიშურცუ,
ინგარენი თოლც გიოხე
მუ გიჩქ მუსუ ფთქუანქ გურცუ.
თექ მუ ტყობუნ მი გეგენცჷ
თოლი ობუნცუ ჩილამურცუ.
გური გოიშინანც ირ წუთისჷ
ნაჟირუა მითა ჸუნცუ,
გურც მი ორწყე, თოლც გიოხე
მუჭო ობუნც ჩილამურცუ.