*ეგება შურო
ეგება შურო ვამოკოდჷ ჸათაქ გორჩქინა,
ცა დო დიხაშ შქას უჩურცხალი ნარღი ეშარე,
მა მევული დო ანწჲ სი გიჩქუ, მუსით მოჩინა,
ჸათე ორინჯეშ ეკონია ვორექ მეშარე.
ლაგვანც დინოხექ, მიკორინე ჟინცაშა ნჭაფა,
ციცფაფუცალო ქუმურც ართჲ დღას თარაშ ჭყოლოფა,
ირო მიღუდეს დასაბაღი სერდა დო რზაფა,
ჩქინჲ გურიშ ჩანარს ოხუმუანდჷ ჭყელი გოლოფა.
ბრელშა გოთანა მიზნახებუ დიდა ორთაშა,
შურიშ პეული გოფაფჩუდუ, გაბირდ ჸოროფას,
ართო მუდაშახ მიჯინუნა თუთაშ მორთაშა,
ართო მუდაშახ ეკუფშოლუთ ჭვემა-ჭოროფას.
მა მარყეთ მიფში, მოკორინჷდ სქანი ძირაფა,
თოლც დინგოჯინედჲ, სიტომბაშა მოშქურუდჷ ირო,
ვარძირჷნდი-და მოკოდ გურიშ ეკონქირაფა,
ცაშა მიფში დო ქიგგოცენდი ზოთონჯიშ თირო.
ასე მუ ბღოლა, ელმარჩქილე ხვალე ჸვანდგინი:
"ჸოროფაშ უმშო, მი რექ, რინას დუდი ანდინი."