*თელი სერიში ნასოფეფი
თელი სერიში ნასოფეფი
პალურს ასე დღაში რე,
ელ-მოლ ითამ ძღაბი რენ დო
მობშა კჷდჷრი აძირე.
ღუმა ბორია იბურჯანდ,
იშხანდ, გილაღაჭალანდ,
ფიფიეფიშ დოხორეს
თხირს ფართხჷნდ დო კაჭალანდ.
ცხენჲ მისოფუდ ანთხებულ
ჟი-ჭყიშეფიშ კარეშა,
ყვინგის ფაფარ გინოძუდ
ტყვიშიშ ჭინკეშ ნაბეჭა.
ტყაიას ტყაშგურს ტყაშმაფა
მუდგასჷრენ კვაკვალანდ,
ოგოთანეს ინგირპის
დადულ ქილორ კარკალანდ.
მოლეშენო ვოცადუდი
მელენ ჩხორიაშ ჭოფუას,
ტორონჯეფქ გალს მიანჭის,
ნეტე, ტორონჯ ქოპუას.
თოლჲ ქუკინდე, გინილეს
ინგჷრი ლანტიშ მამალას,
ჩქიმ შურქ ქაჸუნ მაჸალეთ
ჩე მუნაფაშ მამალას.
უკუმელა ვათხუ შურს,
მორო გალე დღაში რე,
გიმათუთა იცქვანსჷ დო
გოფშა კჷდჷრი აძირე.