346.ჩქიმჷ მაჭუალ ჸოროფილსი თე ჭარი ქემევჭარი:
„ბჟამაქ,- სქანი ჩხორიაქი მა ქომუჩუ სინთე დღარი.
მოვრძგვებერექ, მარცხებერე მუთ გუმოდუ ჭირიშ ჯარი.
სი რექ ჩქიმი მარსხებელი, სი რექ ჩქიმი შური თარი.
347.სი რექ ჩქიმი ეთი ჯერღვი ნამუქთ ამოძრავუ გური.
ჭარიელქ კოლჲო გამიჰამუ აწ ქომიღუ სერით ლჲური.
მუნაჯღონა სქანი მივღი ასმათის ხეთ სამანჯური.
მათ ვამიჩქუ მუთჷ გიგე, მუ რე პატიი რცა მუ რი.
348.აჰა, ქუდი ნამუთი ვთხილი სქანი ორე აწჷ წორ თი.
რთხულჲე უჩა დღა ვამუჩე მიშქირიტი ალი დორთი.
ბნედიანო ნიდომიტენქ მიშველი დო მარგი, მორთი,
სქანი ხეს მა მუთი მიღუდ მომიჯღონი ასეთ ჩხორთი.
349.ასმათიქჷ მიდართუ დო იღუ ჩქიმი მენაჭარა.
ქედივრულჲენ გივკურცხინე დარდი ვაპილჲუნდუ მარა,
მემელჲანდუ ჸოროფილქი ხან ხან ორე, ხანხან ვარა
ვიჭყე ჩქიმი გორჩქინა დო დივჭყეთ თვალუა დო ნგარა.
350.ორდოს მაფაქ ქომიჭანუ, დუმოხუნეს დო მიწუეს:
„ჩქი ვამუჩეს სქილი-ბოში ღორონთქ ეთეშ მორჩინუეს.
ბოში ვარე, ძღაბი ორე, ღორონთქ ათაშ ისხუნუ. ეს.
მარა აწით უბოშობა ვენაღეს დო ვეწყინუეს.
351.მიწუ: სითი გეგი თენა მათი ვფივქრე ქორე ბორჯი.
მუსი შესაფერი დარი ნესტანს დუგორათ ქომონჯი.
დო საფოს ვამიჯუათ იმაფას დო ვარდას ჯონჯი.
ვარა ჩქი თაშ ვიჯინათინ, ვეჸი იდონეთის მზოჯი.“
352.ვუწი: „მაფა უსქილჲობა სქანი ვარე მართ იოლი,
მარა იმენდო დაბაღუ ნესტანი სახე ციოლი.
მისთ თხილჲუნთ სქუას სინჯათინ ო მუ აღვენუ ხოლო
მეტი მუ ვთქუა მა ათაქ? ნინას პუნქ ლიბას დიო, ლი.
353.ქედივჭყით საქმეშ გარჩევა, მიფართხალჲანს აშო ირი.
ვთქვილ ნამუდა, მა საქმე წავაჸონენ ვარე ჯგირი.“
მაფაქ ზოჯუა: „რე ხვარამსა საპერაციოს გასაკვირი
თიქ ჩქი სინჯათ მუში სქუა ქომუჩესიდა ვეჸი ჭირი.“
354.დედოფალქით თქუ თე ზიტყვა: „ხვარამშა რე მაფა დიდი.
თიში სქუას ჩქინი სინჯათ შხვა ვაუჯგუ, ვარე შქიდი.“
გურიშ არექ გეუჩარუ, განწარარებაშ წუნთი ვიდი.
მარა გაჭირება ჩქიმი ვართი შიჭყვეს მა თეშ ვზიდი.
355.დევემოწმი მუში აზრის თუმც მერყებუდ შური თარი.
მაფაქითი ქედანიშნუ დღა ჩქიმჷ გურიშ მაღალჲარი.“
თქუ თენა დო ტარიელქჷ დებნუდუ დო ჩხვეპეს წყარი;
თქუ: „ვოცადუქ ქოგიწუენ - ვაგგაგონენ ჩქიმდე ვარი.“
356.ხვარამშაშა კოჩი ოჩქვეს მუში სქუაშ მათხუალჲო
დო ოჩინეს: „იდონეთის ვეჸი საქმეშ მარჩუალი
სქილი ვაპუნა, ძღაბირე, ნამუთ რე გასათხუალი
სქილი სასიჯოთ ქომუჩით მისთ ძღაბი ჩქინი მუა ლი.“
357.იდუ ბორჯიქ, კოჩქით მოერთუ დო რდუ დასაჩუქრებული.
ხიოლებუ ხვარამშასჷ ვართჷ ჸოფე წყინებული.
ეზმა მუსა გავაგიზა საქმე წართ აწ გათებული;
ნამუშეთჷ ვღურუქჷ დო მა ქომოჭე მართებული.
358.ხოლჲო ოჩქვეს შხვა კოჩეფი ქემიჸონესიკონ სინჯა
დო ოჩინეს; ვადოსქიდათ ვარა სოთინ ვედი ხინჯა
იდეს კოჩენქ დიდებულენქ მითჷ ორდეს ღვენაშ მინჯა.
მა გურს სერდაქ ქემუმაჩუ, მივპუხი დო ვეგივთინ ჯა.
359.მეტი ჯაბი დო სრდაქი მემიდინუ ჭყანა, სინთე.
მონაქ მორთუ ასმათიშე მა ვავთქვილი, თის სიფინთე
მუჩუ წიგნი დო ჭარუნდუ: „ტარიელი რთხულე დინთე
მალჲას მორთი, მალჲას რთხულე სით ქეგეგი რჭარუნს მინ თე.“
360.დოვკაზი დო ცხენით ვიდი ბარიშ კარისა მევანჭე.
ბაღის მინივლი დო ვძირი მა ნესტანი ჩქიმი ხანჭე.
გევხარი დო გეევნათი, ნდომით მოკო ცაშა ვანჭე.
ბჟაში სახე ჭყორონელი ვძირი ხან დიდი დო ხან ჭე.
361.მუჟანსთ ვძირი მოწყენილო, მათი დუდი ვეგევხარი;
ვაუღუდუ სიხათრე დო ოწოხონი ძიცათ ვარი.
ართი ზიტყვათ ვამუჩამუ დაბუ ბროლიშწყარიშ ღვარი;
მა თექ გური დომიჭყოლჲუ ქეგმიღუ ჭირიშ ჯარი.
362.აქიიშეთ ვესქილიდე გური ათაშ მა მოწყუნუ.
გამმამჷჸონუ ოთახუშა მუში ხოლჲოს დუმხუნუ.
ვოხედი დო მიწუ ამბე, საქმე საჯუ, საქმე სხუნუ.
ორდუ მოწყენირობა დო გაჭირებაქ ლხინი უნუ.
363.მიწუ: „მიკვენს, მით ვეგეგი სი თე საქმე წართ ახალი.
მოთ გამწირი, მუშენი რექ ჩქიმი ფუჩიშ მატახალი.
ტანსჷ გენია ქეგმორზი ვჭუნს ახ, ალი მა., ახ, ალი.
სო გუვოჯა აწი თოლი, დუდიშ ვორექ მაძრახალი.“
364.ვუწი: „მუ პასუხი მერჩა, დიო ვამიჩქ სიმართლე
მუ შერცოდი მა თეჯგურა? ქომიწილი გენაცვალე..“
ხოლო მიწუ: „ მუს რაგადანქ, სი სიღულე გიღუ გვალე,
ათაშ მუსენ მომაღორი, ტანი დომიდაჩხირალე!...
365.მოთ ვაჩჩქუ ხვარამშაში ჩქიმჷ ქომონჯო მოჸონაფა;
ნოხოლჲუექ სით საქმეს მეგიჩამუ მოწონაფა.
სი გოტახი ჩქიმი ფუჩი, ბოლოს დომიჭყი ხუნაფა.
ღორონთქ მერჩას მანგიორი გუმორძგვალჲა დო ჩხონაფა.
366.სი მოთ ვარშუ ართ დროს, სქანი ცაშე ქარ იგანდეს?
თოლეფიშე მოხვარხვალე ბროლიშწყარი დიხას ზანდეს.
დალჲაქი დო აქიმეფი ნერ-ნერ წამალს მოგიღანდეს
მემოტევო, მათ მეგოტე ლხინი ათხეს, ჭირი ანდეს.
367.უსქანეთით მუთა მიჭირს, მა თეთ დუსჷ ვედევღონე;
ჩქიმჯგურა მი გაშილი ხე ცაშახით ეუკინე.
ნესტანქ თენა დაარსულჲუ ღორონს ძღვენს მეუჯთონ.ე.
ტარიელქი დიწყუ ნგარა დო აღალჲუდ ჭყანა. ღონე.
368.თქუ: „მუ გევგი ნესტანიშე - ნარაგადი მუსი ირი;
დივჭყე ჩქიმი გორჩქინა დო დუდჷშა მივღი ოშშახ ჭირი.“
ნესტანს ვუწი: „ბჟა მაქ, ტყურათ ნიდოგიცენს ვარდიშ პირი;
ამბეს გოჩინებაფუა ჩქიმდეთ გეგი ფური ჯგირი.
369.-ვუწილი მანგიორი მუჭოთ მოხვად ამბექინი,
გეგშევღი თეში ნება, დუდი თეშე ვილექინი.
ვუწი: „მაფაქ ქომიჭანუ დო ვარჩილით საქმე ჩქინი;
თაქჷ თქუეს გათხუალჲა სქანი, ცუდი ჩქიმი რინი.
370.მუთუნ ბანძღი ვქიმიკონ, მუჭოთ ვფივქრენქ ჯგირი ვარე
ჭირენ გური გუმანგარი, დუდჷშათ მივჩი სიმანგარე.
ვაუჩქუნო, იდონეთი უმუნჯურო დიო ვარე.
მა მის მევჩა იდონეთის? მინჯე ქოჸუნს, ვართ ხანგა რე.
371.ნოტყელიში გური მიღუდ, კოს ვუჯინედჷ მუჭოთ ნგერი,
ნესტანს ვუწი: „ მუთი ვთქვილინ ქეგეგი დო ქედეჯერი.
იდონეთის შხვას ვემევჩა - მინჯე ქოჸუნს კათა ჭკვერი.“
ნესტანქ მიწუ: „ მოგიწონე, იდონეთის სი რექ ჯღვერი.“
372.ვედევჯერქი სქანდეჸურე ღალჲატი დო შხვა თეჯგუას;
მართალჲოთი იდონეთი სქანი რე დო სქანი ჸუას.
ღორონთქ იდონეთიშ ნტერი დამორჩილჲას, დანდღულჲუას,
იდონეთის ჩქი ვიმაფათ, ემორჩილჲას ჩქინი ჭკუას.
373.ქიჸოროფუ ჩქიმი დუდი წყინებულქი ჩქიმდეჸურე.
მიღუ სახე ჩხორიამი, ვთქვილი ათეშ დარი მუ.რე.
ვოხედი დო მიწუ ზიტყვა დო ჭკვერული დუმოგურე
დაჩხირქ დიჭყუ შქირატალჲა ვაგმორზუდუ აწი შურე.
374.მიწუ: „კოჩქჷ გონიერქი, მუთუნ დღას ოკო ვეჩქარას
მუთი ოკონ მააგვარას, დუდი ოკო დააწყნარას.
ვა, სი სინჯა ვამაშქვე დო მაფაქ თეშე გეგენწარას,
ჟირხოლჲოქ წევიდათ დო იდონეთის გეენქარას.
375.სი თაქ სინჯა ქემაშქვე დო მა თიქ ჩილჲო ქომითხუას,
სქანდე მოშორებულქ ნესტანქ მა ვამიჩქუ მუ ოკო თქუას,
ბოლჲოს ჩქინი იდონეთიქ ემორჩილჷ უცხოს ჭკუას.
ვა, პერსიაქ იდონეთის წართ, ირფელი შილებუას.
376.ვუწი: „ღორონთქ ააშორას ეთის სქანი ქომონჯალჲა,
მა თიშ საპასუხოთ თე დროს მეოშებუ ღონე გვალჲა.
მა მოძირას მუში ღონე, მუქით ძირას ჩქიმი ძალჲა.
დუს ქეგურზა გენიას დო ტანსით დუუდაჩხილჲა.“
377.ბოლჲოს მიწუ: „ძღაბი ოკო ძღაბი- შორო, საქმე თხილჲას.
მათი ვფივქრე ვემიწყინე ათე ზიტყვაშ ჩქიმდე რჩქილჲას;
მულჲა დო სინდა დოჸვილი, ჯარს ვენა დო ვემირჩქილჲას,
ქიმინუას მართალისი გალჲადირენს ჯას ხომილჲას.
378.თაშ ქიმინი ჩქიმი ჯგირი, ტანადობათ ლჲობიშ დარი
მეტყობინით, ხვალე ჸვილი, ვართ იჸონა ლჲაშქარ-ჯარი.
მუში ლაშქარს მუთუნ ვერჩა, ვაქიმინა საწიწკარი,
ათეთ სერი გამინათი, ბჟა, ქომუჩი სინთე დღარი.
379.მუჟანსთ სინჯას დოჸვილჲუნქინ თაშ უწილ ჩქიმი მუმას;
მა ვევქუნქი პერსიანიშ იდონეთის ჭკომუა - შუმას;
ჩქიმი რე თელი მამული, ვუთხილჲა ზისხირიშ ბუმას
თენა სი ვედეჯერი და ვართ მა რზოგე დაჩხირ -კუმას.
380.სი ჩქიმი ვემიშინუა ჸოროფა დო დუდიშ ნდომა;
ათეთ ქემუმაჩამუნა ბოლჲო კეთილი, სი დო მა“
თე რაგადი ქემივწონე დუდჷშა მივრი ჭირით შრომა.
აშო ვიდი ჩქიმი თიშა დივჭყე რინი ჩქიმი ქო მა.
381.მალჲას, ვათენქ ჩქიმი ზიტყვას გეგი მუთ გიწუა მა სი
ასმათიქჷ ქჷწმაჯღონუ; ჩილჲამური დიხას ვთასი;
ლხინი ჩქიმი გავაართი ჭირი ოშშახ ვიათასი.
დუდი ვინდი, ზისხირქ მიფუ, ვიძახუდი შხირას ვასი.
382.კოჩქჷ მორთუ, მაფაშა დო ქუმახარეს სინჯაშ მულჲაქ.
გურქ დომიჭყუ ბარძგალი დო კუჩხენქ ვარ დოხუნა რულჲა.
დევედარი ბენდელჲასი ხორცის ვიჭკუნქ, კინთხეს ვსულჲა.
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
383.მაფაქ მიწუ: „ჩქიმოთ ორე ლხინი, თედღა სიხარული.
გინივგათ ჯგირი დიარა, ოცქვაფური, ბოლჲო სრული
კათას მევჩათ დიდი ღვენა-მუნეფიშ ევოშათ ხული;
გავამანგრათ სამაფო დო გავამტკიცათ ჩქინი რჯული.
384.საარაბოქ გეგუ ამბე მიშეს ადრე ვართ გვიანი;
საინჯოქით ქუმმომირთეს მოჸუნდ ჯარი პერსიანი.
სიხარულით ქედოხვადეს აკოჯვიდეს ართიანი.
სინდას მუშა დუვოგორა კოჩი ორდუ ხათრიანი.
385.მაფაქ ზოჯუ: „მაავზადით, მინდორენსი დოდგით ვარე.
სინდაქითი მისვანჯას დო მითი ორე შხვა მაყარე.“
მინდორენს დოვდგი რთვილეფი, ოგორაფულჷ აკა ვარე
სინჯას თანაფა უთანდუ დო ჩქიმოთი უჩა დღა რე.
386.შულჲადირქი, მა მივსვანჯი, მივქინიში თეშე ტანი
მონაქ მორთუ ასმათისე - მიჭანუანდ მა ნესტანი.
ხათეს ვიდი, ვაგვაჩენდი, ვავოჸოთი დრო დო ხანი
სერი ორდუ, დღაში, ვარდუ, შქასერი რდუ, ვარ გოთანი.
387.ქემევრთი დო ხათეს ვძირი ჩქიმი მაჭუალი ძღაბი,
ინგარდუ დო მა ვუწილი: „ჩილჲამური მუსენ დაბი?“
მიწუ: „მა მოშქვიდუანსი უღურალჲო ათე ჯაბი
ჩქიმი ზიტყვას მოთ ვასრულე, მოთ ეკარღვი, მოთ ვაჯაბი.
388.მუს გერექჷ მაღორენქო სი დღა მორძუ ოლიმური.
ნუგავწირენქ, შეასრული დო მირჩქალე ჩქიმი გური.“
მა მეწყინუ, მუთა ვთქვილი, ტანს გუმორზუს ბჟა ონდღური;
ვუწი ჩქიმი მაჭყალსი, აწი ჯგირი ძირი ფური.
390.კაჟიცალი მაფუდ გური, დუდქით მიწუ აზრიშ ქება.
ოშის ვუწი მა მონასი მაჩხუბარო მოვზადება.
კარს სიცხადეთ მინივლი დუს ვემევჩი დაღონება;
სინჯა პილი, უზისხირეთ დასურო დო ვარ ეგება.
391.დოვნოჭკერე, ქედუვორღვი კარეშ კართე დოხართელი;
სინჯა კიდას ქუტაკინე, დოპილი დო ვარ ვათელი.
დინახალე ორდუ რკილჲა, დო იშორეს რერო, დელი.
აა ღორონთ მემოხვარი, გოლი დუშაშ კამათელი.
392.ქეგუოლი რაშის ოდო დუდი გაგიმივახალი.
მოვთხოზუდას დო ხმა ორდუ ჩქიმი გიოჭიშაფალი
მიღუდ ჯიხა მა მანგარი, ნტერიშჷ მაშინაფალი.
მიშევლი დო მილჲუვორდი მა თეთ დოვშქირიტი ალი.
393.სიმართე რე-ცა მომოწმუ-მუთი გეგი, მუთი ვთქვილი.
კოცი ვოჩქვი ლჲაშქარიშა დო მოხმარება მოვთხილი.
ნტერსჷ ჩქიდა მუ აღოლეთ, მა დასუროთ ბრელი-პილი,
სიმანგარე ჩქიმი გეგეს, მემოტუეს, იდეს წბილი.
394.მა იმი სერს ჯიხას ვორდი, ჯიხა ორდუ ჩქიმი ხორი,
ორდოს ადრე გეევდირთი მუჟანსით ვძირი ბჟაშე ჩხორი,
დუდი ათაქ ვილექინი ჩქიმი ჭირენს გავაჭყორი
იდონეთის რგუალჲა რდუ უჩას იჭანდ მაფა - ჭკორი.
395.ორდოს ადრე მა გედივრთი, ლჲაჸაფი დი დივჭყი ბირი
გური გუმოჭორაფილსი მიჭკირჭკინუნდ მა კიბირი
თე დროს ვძირი სუმი კოჩი მაფაშე მოჩქუმალირი;
ორდუ მაფაშ მოციქული გეგესიკონ ამბე ირი.
396.მომიჩინუ მაფაქ ზიტყვა, თეთ მოჸოთუ ნტერულჷ ქუა,
„ადრე მოთჷ ვაგუმაგი გოკოდუდა ჩქიმი სქუა -
მოთჷ ჸვილი სი უბრალჲო, მოთი ქიმინჷ სი თეჯგუა,
მოთ გომიირზი თეთ დაჩხირი - მუჩი უსქილჲადუ ჭუა?!
397.მა ვოჩინი: მაფა მაქი კაჟიჯგურა ვორექ მა ნდი;
ორწყექ ღორონთქ მემიდინეს ჩქი თეზუმა შრომა, ხანდი,
გამიგებუ - სქუაშ ნდომას ჩქიმიჸურე წართ იგანდი,
სქანი სქუა მა ვამოკო, გეგი მუთი მეგიღან, დი!..
398.გეგი, ჩქინი თე სამაფოშ ჩქიმიორე ნაშქვითალი
დო ვორექჷ მა მემკვიდრე, მიღუ უფლება დო ძალი.
დო რადგანო - დანარჩენიშ მითარე ხეშ მანწყუალი
მა მერგებუ იდონეთი; თეს მითხილჲუნს სამართალი.
399.თქვა ვემერჩეს ღორონთქ სქილი მერჩეს სქუა ძღაბი ითი
მუჭო ვარშუ, ქეგიშინი მა დო თინა მუჭო ვრდითი.
იდონეთის შხვაქ იმაფასჷ მუჭო იჸი გეგი სითი.
იდონეთი ჩქიმი ორე, მიღუ ჸუდე დო ჩქიმი თი.
400.სქანი სქუა მა ვამოკო გამარიდი, გაათხილი.
იდონეთი ჩქიმი ორე დო მის უღუ თეშ თაკილი.
მიტი თეს მეცილებუნი დუღათ იჸი ჩქიმდე ჭვილი.
მეტის დიო მუთას რჭარუნს სქანი სქუაჯგურა სქილი.
