Lua error in Module:Header at line 265: attempt to index local 'title' (a nil value).
ავთანდიშ წიგნი მუში მონა–ლაშქარიშა მენაჭარა
93.დოჭარუ, დიტუ ჭარილი, დაჩინალი დატებელი
წიგნი ორდუ მუში გამა მონა–ჯარის მარგებელი,
რახანო მუ შხვადო მიშუ, შხვადო ორდუ მარტებელი.
ჭარუნს: ,,ნაჭარა ირჩქილეთ, ვორექ თეშ მავედრებელი.
94.მიწამით თქვანი ავთანდი ქეგეგით რჭარუნთ მა მუსი,
ბედიში ვორექ მონდურე აწი მევთხოზუქ ნამუსი
მა ჭიჭე ხანც ვისხუნე გალენ გილჲულაშ ნამოსი
ვავთქუათ სიტყვა ოჩქიმე; მეთხოზუქ რჸვილჲუნს ნამუ სი.
95.მა მონდველი მიღუ საქმე ჩქიმოთით ორე სახელი.
მა სუმი წანას ვამაში ათე ქალჲაქის ნახელი,
თეშენი რთხულენთ მონა, ჯარს, გოხვეწუთ თქვანი მახველი.
სამაფო ვამოძირათინ ნტერიშე მოჩაჩახელი.
96.ჩქიმ დუდიშ მანგიორი–შერმადინი ორე გამა,
მემიჩამუ უჩაშალჲა, პატონობა თქვანი, ჩამა,
მევანდვი დო მუქით მიწუ: ,,დღას მუთუნს ვავოღვა მა.“
კოჩი ორე რჩქენჯიერი, გურაფა დო მიღით ხვამა.
97.მუჭოთ ვთქვილი შერმადინს ირფელ უჩქუ დო ვოცქვა მა;
ჩქიმი გარდა დღას მითინსი ვაქიმინე თიშ მასქვამა,
სქუაშორო მაფუ ნარდი, მიჸორს, ვაბჯოგუ მუჭოთ შხამა,
ემორჩილით თი ზომაშა მმორჩილჲუდით მუჭოთ თქვა მა.
98.ჩქიმი ჯგიროიან რინას, მუ დროშახი გეგენდას –
თქვანი ორდას მოჸოროფე, ნტერიშოთ მეხენდას.
თქვანი ჯგირი რინაშოთ იხანდას დო იხანდას.
თქვანი ჯგირი რინათ ნტერქ იმართახას, იღვენდას.
99.დო მუჟანსით მა დოვღურუქ მიმუნუანს ლჲამაზი ცა
გოკუთნუნა ჩქიმი ნგარა, ვართი ლაჲაჸაფი დო ძიცა
ორგუალჲო მიკიქუნით საარაბოქ ლენი ქიცა.
– გოკუთნუნა სიმანგარე ნტერენქ ვადოგიჭყან ხვიცა!
100.ათე დება დაასრულჲუ ნინა წყარამ ავთანდიქ,
გაგიმინწყუ მაულჲარო, ქაანგარუ ნახანდიქ.
გაგმინწყუ დო რაშის გეხე: ქეეტოლჲას აკაქ ნდიქ.
გოურქუ ცხენქ ქოფურინუ, ვადაცადუ რაგადიქ.
101.ლაშქარ მონენქ მუჟანსით ვარ ვაძირეს პიჯი ვარდი,
ტანს ქეგირზეს გენია დო ჭირი მიჩეს დუს დო დარდი.
თქუეს: ათაქ ჩქინი რინა ცოდაშ მეტი ვარე მარდი
იდეს ოგორუშა მარა ძირაფილი სოთინ ვარდი.
102.გური – მეჭვირო ლაშქარენქ ჩილჲამურით ჩხეთ ინგარეს,
დინაფილი მინჯე ირგეს, ნამუშეთ გვიან იხარეს,
ბოლჲოს გაჩემუ შერმადინქ, ხალხიქით ჭირი ივარეს.
შერმადინქ ცხოდი ქიმინუ მონა–ჯარქ ირიდიხარეს.
103.ქაძირუ წიგნი ნაჭარა, ავთანდიქით მუთი იჩუ
მუჟანსთ ირფელ წუუკითხუ ბოლჲოს ვიშო დოოკიჩუ.
შერმადინი ქიმინჯინეს.. არძაქ ჯვიდუ, არძაქ ხიჩუ;
მეჩეს მუში არდგილი დო მუქით მეჩამირი მიჩუ
|
|
