A certi fraa
Carl'Alfons Pelliscion (1734-1818)
A certi fraa
Fraa, che sii fraa, per ess vestii de fraa,
finalment me n'accorgi che vorii
che se mordìgnem come can rabbiaa,
se, però, per ess fraa l'è assee 'l vestii.
No vorrev minga, a divv la veritaa,
taccà desgust con vu che soo chi sii;
a taccà lit coi muj, m'insegnarii,
che se va sempr'a ris'c de fass del maa.
Ma pur, quand fuss a quella, in d'on garbuj
no sont minga inscì facil a stremimm,
e gh'hoo poca pavura anca di muj.
A toccà i olter no sont mai el primm;
ma, se on olter me tocca, oh, allora vuj
che 'l senta de che gust hin i mee rimm.