Agrimen blong Waitangi

Kwin Viktoria, we hem i bigfala kwin blong Yunaeted Kingdom blong bigfala aelan ya Briten wetem narafala ples ya Aerlan (we hemi wan bigfala aelan klosap long Briten), hem i gat bigfala tingting mo konsen long ol Jif mo ol nasara blong Niu Silan. Hem i wantem givhan long olgeta blong oli save holem taet ol stret raet blong olgeta, mo blong oli save stap gud wetem ol propeti mo ol ting blong olgeta. Mo hem i wantem mekem sua se oli save stap long pis mo oli save gat wan gudfala laef oltaem. Be i gat bigfala namba blong ol narafala pipol we oli stap andanit long rul blong hem, we oli aot long ples blong olgeta mo oli kam stap long Niu Silan finis, mo sam oli stap kam yet long Yurop mo Ostrelia. Hemia i mekem se Kwin i luk se i moa gud hem i setemap wan posisen blong wan man we i save toktok long nem blong hem wetem ol manples, blong oli agri blong wan gudfala gavman i stanap long Niu Silan, andanit long rul blong hem. Sipos i no gat ol loa, mo i no gat ol fasin blong lukaotem gud ples, bambae i save nogud tumas long ol manples we oli stap, mo tu long ol nyufala man naraples we oli kam stap andanit long rul blong hem finis. Folem ol tingting ya, Kwin hem i apoentem mi blong mekem wok ya. Nem blong mi William Hobson, mo mi wan hed kapten blong ol sip blong faet blong Kwin, mo hem i givim wan rang long mi se mi mi Hed-Gavman blong hem we bambae mi save kontrolem ol ples long Niu Silan we ol jif blong ol nasara ya oli agri blong kam andanit long rul blong hem. Olsem ia, long nem blong Kwin, mi stap invaetem ol paramaon jif mo ol wanwan jif blong Niu Silan blong oli agri long ol poen we oli stap daon ya.

Poen Nambawan

Ol jif we oli stap insaed long Bigfala Kaonsel blong ol Yunaeted Nasara blong Niu Silan, wetem tu ol narafala indipenden jif we oli no stap insaed long Kaonsel, oli agri se evri paoa mo evri raet we oli gat olsem ol jif ova long ol nasara blong olgeta, naoia oli givim i go long Kwin blong Inglan, blong hem wan i save rul ova long ol ples ya mo bae evri paoa i stap wetem hem nomo.

Poen Nambatu

Bigfala Kwin blong Inglan hem i mekem promes i kam long evri jif blong evri nasara blong Niu Silan, mo long ol famle mo long ol wanwan man we oli stap, se hem i rispektem raet blong olgeta olsem ol kastom ona blong ol graon blong olgeta, blong oli save gohed blong lukaotem mo stap long ol ples blong olgeta, olsem ol graon, ol garen, ol bus mo ol ples blong karem kakae long solwora, mo i no save gat eni man i kam distebem olgeta. Maet hem i raet blong komiuniti, o blong wanwan man, be oli save gohed blong holem sipos oli wantem. Be ol jif blong Bigfala Kaonsel blong ol Yunaeted Nasara, wetem tu ol narafala indipenden jif we oli no stap insaed long Kaonsel, oli mas givim raet long Kwin hem wan blong hem i save pemaot wanem graon we hem i nidim, mo we ol kastom ona oli agri blong salem, long wan praes we olgeta, wetem ol man we oli toktok long nem blong Kwin, oli agri long hem.

Poen Nambatri

Kwin blong Inglan hem i glad blong talemaot se sipos ol jif oli agri long ol poen antap ya, bambae hem i promes blong lukaotem gud evri manples blong Niu Silan wetem bigfala paoa we hem i gat, mo tu bambae hem i givim ol raet mo ol gudfala samting long olgeta sem mak olsem ol narafala man we oli stap andanit long rul blong hem finis.

[Saen, William Hobson, Hed-Gavman blong Kwin]

Mifala nao ol jif blong Bigfala Kaonsel blong ol Yunaeted Nasara blong Niu Silan, we mifala i stap wanples long miting blong mifala long ples ya Viktoria long ples ya Waitangi, mo wetem mifala tu i gat ol narafala indipenden jif we oli no stap insaed long Kaonsel. Mifala i stap rul ova long ol nasara we oli stap andanit long ol nem blong mifala, mo naoia, olsem we oli mekem mifala i save gud ol tingting mo ol toktok insaed long ol poen blong agrimen antap, mifala i akseptem wanem we Kwin i talem mo wanem we hem i wantem mekem. Blong soemaot se mifala i agri long agrimen ya, bambae mifala wanwan i saen daon wetem nem o mak blong mifala, long ples mo dei we i stap long pepa ya. Agrimen ya oli mekem long Waitangi, long dei ya namba sikis blong manis Februari, long yia ya wan taosen eit handred mo foti yia afta long ded blong Masta blong yumi.

Ol jif blong Bigfala Kaonsel