An El Filibusterismo – ni Jose Rizal, 1961/3
naginparalibang bin bata nga masuri, pasasawayon ngan hubya!
Ngan hi donya Victorina, amo la nga ginang nga nahatampo paglingkod didto han pundok han kakatsilaan, makakahimo tun pagsumat kun an TABO man gud masuri, pasasawayon ngan hubya, hi donya Victorina nga unob nga kalasan, nananampalas patok han mga kasko, mga baluto, mga tinabaw nga lubi, mga indio, mga magsarakay, pati an mga manlalaba ug mangangarigo nga nakakaurit ha iya an ira mga katatawa ngan kamaglipayon! Oo! an TABO magmamaupay unta an lakat kun nawaray mga indiyo ha salog, nawaray indiyo ha Pilipinas, oo! kun nawaray indiyo ha kalibutan, waray lugaring hiya panginginano nga an mga timonel mga indiyo, mga indiyo man an mga marinero, mga makinista, mga indiyo an kasiyaman kagsiyam ikinagatos han mga sumarakay, ngan hiya man ngahaw indiya kun pagkarusan hiton iya pabusag nga pintar ha nawong ngan paglubasan hiton iya iginagasad nga bata. Hadto nga aga hi donya Victorina uraura hin kadiri-maantos tungod kay an mga pasahero nga iya katarampo ha kalingkod waray ha iya may naglalabot, ngan sadang na man ikabudlay kay harumamay man ba: iginkakatarampo niya in tutulo nga prayle nga nagpapakasiring nga an ngatanan nga tawo matutuwad pamaglakat kun hira an mga prayle tumadong pagtukdaw; usa nga diri gul’anon nga don Custodio nga maupay in pagkaturog kay natunga han iya mga “proyecto”; usa nga hinurat nga manunurat sugad kan Ben-Zayb (sinaluknib ha Ibañez) nga nagmamatuod nga didto ha Manila may utok nga nanhuhunahuna kay hiya nanhuhunahuna; usa nga kanonigo sugad kan P. Irene nga nakakapasinaw han clero, lakip an iya gimula nga bayhon nga tinusaran hin maupay ngan tinutukdawan hin usa nga mahusay nga irong nga kanan hudiyo, ngan han iya sutana nga sida nga garbuso an katabas ngan gudtiay an batunis; ngan hin usa nga gimanggarani nga alahiro sugad kan Simoun nga sinisiring nga amo an parakianhan ngan manaragdon han ngatanan nga kiwa ni S. E. an Kapitan Heneral, hunahunaa niyo an paghitarampo hini nga mga harigi sine guibus non han nasod, nga didto natitirok ha himyang nga hiruhimangraw, ngan diri makig-angay hin usa nga diri nagpapakapilipina, nga nagtitina hin bulaw han iya buhok, baa! kay angay na