Biblia/Nove Testamento/Romanos/Romanos 10

Romanos

10

¹Fratres e sorores, de tote corde mi desiderio e prece a Deo pro Israel es lor salvation. ²Io pote testificar que illes es zelose pro Deo, ma lor zelo non es conforme a un cognoscentia adequate, ³proque in ignorar^[1] le justitia de Deo e in essayar de establir lor proprie justitia, illes non se submitteva al justitia de Deo. ⁴Pois que Christo es le finalitate del Lege, con le resultato que il ha un justitia a disposition de quicunque crede^[2].

⁵Pois que Moses scribe in re le justitia que deriva del Lege: “Quicunque practica tote isto vivera^[3]”. ⁶Le justitia que deriva del fide, tamen, dice: “Non pensa in te mesme^[4]: "Qui ascendera al celo"^[5]? (illo significarea facer descender Christo). ⁷O “Qui descendera a in le abysmo"^[6]?” (illo significarea facer resortir Christo del mortos). ⁸Ma que dice illo? “le parola es multo proxime a te - illo es in tu bucca e in tu mente^[7]” (illo es, le parola del fide que nos predica), ⁹proque si tu confessa con tu bucca que Jesus es le Senior^[8] e tu crede in tu corde que Deo le resuscitava del mortos, tu essera salvate. ¹⁰Pois que con le corde on crede pro obtener justitia^[9], e con le bucca on confessa pro obtener salvation^[10]. ¹¹Pois que le Scriptura dice: “Qui crede in ille non essera avergoniate^[11]”. ¹²De facto, il non ha ulle distinction inter le judeo e le greco, pois que le mesme Senior es le Senior de totes, le qual benedice generosemente^[12] tote illes qui le invoca, ¹³durante que “Tote illes qui invoca le nomine del Senior essera salvate^[13]”.

¹⁴Como poterea illes invocar uno in le qual illes non credeva? E como poterea illes creder in uno del qual illes non audiva? E como poterea illes audir sin un predicator^[14]? ¹⁵E como poterea illes predicar sin haber essite commissionate? Como il es scribite: “Quanto agradabile es le arrivata de qui apporta bon novas^[15]”! ¹⁶Non omnes, tamen, prestava attention^[16] al bon nova, proque Isaia dice: “Senior, qui credeva a nostre message^[17]?” ¹⁷Per consequentia, le fide veni de audir^[18] e le audir veni mediante le parola predicate de Christo^[19].

¹⁸Ma io dice: Esque illes^[20] non audiva? Si, illos audiva: Lor voce se diffundeva in omne partes del terra, e lor parolas usque al confinios del mundo^[21]. ¹⁹Ancora io dice, tamen: Esque Israel non comprendeva? In prime loco Moses dice: “Io rendera vos jelose de illes qui non es un nation; per un nation insensate io facera vos irascer^[22]”. ²⁰E Isaia mesmo ha le harditessa de dicer: “Io esseva trovate per illes qui non me cercava; io deveniva ben cognite a illes qui non me demandava^[23]”. ²¹In re Israel, tamen, ille diceva: “Tote le die io extendeva mi manos a un populo disobediente e obstinate^[24]!”.

Notas

1. O “miscognoscer”.
2. O “pro le justification de quicunque crede”.
3. O “vivera per illos”, citation de Levitico 18:5.
4. O “in tu corde”, citation de Deuteronomio 9:4.
5. Citation de Deuteronomio 30:12.
6. Un citation de Deuteronomio 30:13.
7. O “corde”, un citation de Deuteronomio 30:14.
8. O “Jesus como (tu) Senior”.
9. O “pro justitia”.
10. O “pro salvation”.
11. Un citation de Isaia 28:16.
12. O “riccamente”, “abundantemente”.
13. Un citation de Joel 2:32.
14. O “sin haber alicuno qui predica a illes”.
15. Citation de Isaia 52:7; Nahum 1:15. Le original es le expression metaphoric: “Quanto es belle le pedes de qui porta bon novas”. Le accentuation es un bon nova que perveni al momento opportun.
16. O “obediva”.
17. O “annuncio”. Citation de Isaia 53:1.
18. O “de lo que es audite”.
19. O “per le parola de Christo”.
20. Illo es: Israel.
21. Citation de Psalmo 19:4.
22. Citation de Deuteronomio 32:21.
23. Citation de Isaia 65:1.
24. O “rebelle”. Citation de Isaia 65:2.