Biblia/Vetule Testamento/Genesis/Genesis 21

Genesis

21

Le nascentia de Isaac

¹Deo visitava^[1] Sarah justo como ille habeva dicite e ille faceva pro Sarah lo que ille habeva promittite. ²Assi Sarah concipeva e pareva le filio de Abraham in su senectute, justo in le tempore establite que Deo la habeva annunciate. ³Abraham appellava su filio - le filio que Sarah le habeva generate - con le nomine de Isaac. ⁴In le octave die desde su nascentia, Abraham le circumcideva justo como Deo le habeva commandate facer. ⁵Ora, le etate de Abraham, quando su filio Isaac le esseva nascite, esseva de cento annos.

⁶Sarah diceva: “Deo me ha facite rider. Quicunque audira in re isto, ridera con me”. ⁷Sarah continuava dicer: “Qui haberea unquam dicite a Abraham que Sarah un die haberea allactate infantes? Quia io generava un filio pro ille in su senectute!”.

⁸Le infante cresceva e esseva dislactate. Abraham preparava un grande festa in le die de su dislactation. ⁹Sarah, tamen, remarcava que le filio de Agar, le Egyptiana - le filio que Agar habeva generate pro Abraham - lo derideva. ¹⁰Assi illa, adressante se a Abraham, le diceva: “Va bannir ille serva con su filio, quia le filio de ille serva non devenira un herede insimul a mi filio Isaac!”.

¹¹Le requesta de Sarah multo displaceva a Abraham, quia Ishmael esseva alsi su filio. ¹²Ma Deo diceva a Abraham: “Non angustiar te a causa del puero e de tu serva. Face tote lo que Sarah te dice, proque tu legitime descendentia essera considerate a partir de Isaac. ¹³Io, tamen, io facera devenir un grande nation le filio del serva, quia ille es alsi tu filio”.

¹⁴Ita Abraham se levava mane, prendeva alicun alimentos^[2] e un contenitor de aqua e los dava a Agar. Ille los poneva super su spatulas, le dava su filio, e la dimitteva. Assi, illa incipeva errar sin proposito in le deserto de Beersheba. ¹⁵Quando le aqua del contenitor habeva se exhaurite, illa pulsava le infante subtus un arbusto. ¹⁶Deinde illa vadeva e se poneva a seder a un certe distantia de ille, circa a un tiro de arco procul, quia illa pensava: “Io refusa vider morir le infante”. Assi illa sedeva contra e plorava desperatemente.

¹⁷Deo, tamen, audiva le voce del puero. Le angelo de Deo del celo vocava Agar e la diceva: “Que es, Agar? Non timer, quia Deo audiva le voce del puero justo in le loco ubi ille se trova. ¹⁸Leva te! Prende le puero e tene le per mano, quia io rendera su descendentes un grande nation”. ¹⁹Alora Deo aperiva le oculos de Agar e ille videva un puteo plen de aqua. Subito illa reimpleva le contenitor de aqua e faceva biber le puero.

²⁰Deo esseva con le puero durante su crescentia in le deserto. ²¹Ille habitava in le deserto de Paran e deveniva un archero valente. Su matre trovava pro ille un uxor ab le terra de Egypto.

Le pacto de Abraham con Abimelech

²²In ille tempore Abimelech e Phicol, le commandante de su armea, diceva a Abraham: “Deo es obviemente con te in tote lo que tu face. ²³Jura ergo per Deo, que tu nunquam nocera^[3] a me, mi filios, o quicunque de mi descendentes. Io esseva loyal con te, assi nunc jura que tu essera loyal con me e a iste pais, in le qual tu habita como un estraniero”.

²⁴Abraham le replicava: “Si, io lo jura!”. ²⁵Ma Abraham presentava un querela contra Abimelech al reguardo de un puteo que le servitores de Abimelech habeva sasite. ²⁶“Io non sape qui faceva un tal cosa”, Abimelech replicava, “sed tu alsi non me lo reportava antea. Io ha nunquam audite antea usque a hodie in re un tal cosa”.

²⁷Ita, Abraham prendeva alicun oves e bestial e los dava a Abimelech. Ambes, assi, establiva un pacto inter illes. ²⁸Ma Abraham alsi prendeva septe agnas e los poneva a parte de su grege. ²⁹Abimelech peteva a Abraham: “Qual es le significato de iste septe agnas que tu poneva a parte?”. ³⁰Ille replicava: “Tu debe prender de mi mano iste septe agnas sicut proba legal que io excavava iste puteo”. ³¹lle es le ration pro le qual ille vocava ille placia Beer Sheba (que significa “puteo del pacto”), quia ibi se establiva un pacto inter illes.

³²Assi illes establiva un pacto a Beer Sheba; deinde Abimelech e Phicol, le commandante de su armea, retornava a in le terra del Philisteos. ³³Abraham plantava un arbore de tamarisco in Beer Sheba e invocava ibi le nomine del Senior, le Deo eterne. 21:34 Assi Abraham remaneva in le terra del Philisteos durante multe tempore.

Notas

1. Le termino hebraic traducite con “visitar” (פָּקַד, paqad) sovente describe le intervention de Deo in le vita de un individuo o question, semper in referentia al destino de su populo. Ille poterea visitar (illo es, destruer) le Amalekitas; ille pote visitar (illo es, liberar) su populo in Egypto. Hic ille visita Sarah pro habilitar la a generar le filio promittite. Quando Deo “visita” le destino de un persona es cambiate.
2. O “pan”.
3. O “deciper”.