Biblia/Vetule Testamento/Isaia/Isaia 18

Isaia

18

Advertimento al pharaones ethiopic

¹Guai al terra del essames^[1] strepitante que es trans le fluvios^[2] del Ethiopia^[3]! ²Que manda via mar ambassatores que naviga con barcas de papyro: Vade messageros veloce! Porta un message a gente de alte statura e con le pelle lucide, a un populo temite prope e procul, gente robuste e opprimente, cuje fluvios sulca le terra. ³Vos omnes, le habitantes del mundo e demorante sur le terra, reguarda quando io eleva un standardo de battalia sur le montania! Audi, quando io sona le corno de ariete! ⁴Quia le Senior me diceva: “Ab le loco ubi io habita io observara con calma, sicut la calma de un die luminose e calide, sicut la calma del nubes de rore in un die de estate^[4]”. ⁵Ante la vindemia, quando le vinia jam floresceva e le flor deveniva un racemo matur, alora le Senior excidera le plantones improductive con su tonsores de putar. Ille talara e jectara via tu brancas copiose. ⁶Tu potente armea essera relinquite morte in le campos a disposition del vultures de montania e del animales salvage. Assi le vultures evellera le cadaveres durante tote le estate. Le animales selvage rodera le osteos durante tote le hiberno. ⁷In ille tempore le Senior, Deo de Israel^[5], recipera donos de ille gente de alte statura e con le pelle lucide, ille populo temite prope e procul, gente robuste e opprimente, cuje fluvios sulca le terra. Illes portara donos a Jerusalem^[6], ubi le Senior Del universo demora.

Notas

1. O “alas”, “le terra del multe locustas”.
2. Le affluentes del Nilo.
3. O “Cush”.
4. O “del messes”.
5. O “Deo del universo”.
6. Hebr. “al monte Sion”.