Biblia/Vetule Testamento/Jeremia/Jeremia 13

Jeremia

13

Le cinctura lumbar de lino

¹Isto es lo que le Senior me diceva: “Vade e eme un cinctura lumbar de lino, cinge te de illo ma nunquam netta lo”. ²Assi io emeva un cinctura lumbar secundo le parola del Senior e io me cingeva de illo.

³Inde le Senior me parlava de novo e me diceva: ⁴Prende le cinctura lumbar del qual tu te cingeva, vade tosto a Perath e occulta lo in un foramine inter le petras. ⁵Assi io vadeva e lo interrava a Perath^[1], sicut le Senior me ordinava facer. ⁶Post plure dies, le Senior me diceva: “Vade tosto a Perath e reprende le cinctura lumbar que io te diceva de occultar inde”. ⁷Assi io vadeva a Perath e extraheva le cinctura lumbar del loco ubi io lo habeva occultate. Le cinctura, tamen, nunc esseva ruinate e non plus apte a esser empleate.

⁸Inde le Senior me diceva: ⁹“Io, le Senior, dice: ‘Assi io facera putrescer le position grandemente exaltate del qual Juda e Jerusalem se vangloria^[2]. ¹⁰Iste gente perverse refusa audir mi parolas. Illes seque^[3] le restive inclination de lor prave corde e cole altere deos. Illes devenira, ergo, sicut iste cinctura lumbar, que non es plus apte a esser empleate. ¹¹Sicut un cinctura lumbar adhere al lumbos de un homine, assi io faceva strictemente adherer a me le integre nation de Israel e le integre nation de Juda, dice le Senior. Io intendeva que illes esseva mi populo special pro promover mi fama, mi honor e mi gloria, ma illes non me voleva obedir’”.

¹²Dice ergo ad illes: “Le Senior, Deo de Israel dice: ‘Cata olla a vino es facite pro esser implite de vino’”. E illes probabilemente te replicara: ‘Esque nos non sape que cata olla a vino debe esser implite de vino?’”. ¹³Inde dice les: “No, isto es lo que le Senior intende dicer, ‘Io va tosto impler tote le gente que vive in iste pais con le confusion del ebrietate - ab le rege que sede sur le throno de David e al sacerdotes e al prophetas, usque a omne le habitantes de Jerusalem. ¹⁴E io les fracassara como ollas a vino le unes contra le alteres, mesmo infantes contra genitores, dice le Senior. Io non permittera que mi compassion, pietate o misericordia me retene del destruer les”.

Admonition contra le orgolio

¹⁵Deinde io diceva al gente de Juda: “Audi e face ben attention! Non sia superbe! Proque le Senior ha parlate. ¹⁶Da al Senior Deo le gloria que es debite a ille. Face lo ante que ille face cader super vos le tenebras del disastro. Face lo ante que vos face passos false e cade in le angustia sicut le viagiator sur le montes al crepusculo. Face lo ante que ille extingue le lumine del liberation que vos expecta e vos trova vos in le bruma e umbra del morte. ¹⁷Ma si vos non presta attention a iste admonition, mi anima plorara in abscondito pro vostre arrogante superbia, io plorara amarmente e le lacrimas disbordara de mi oculos, proque vos, le grege del Senior, essera captate e portante in exilio”.

¹⁸Le Senior me diceva: “Dice al rege e al regina matre: ‘Descende de vostre thronos e sede in le pulvere, proque vostre gloriose coronas essera tosto sasite de vostre capites’. ¹⁹Le portas del citates in le sud de Juda^[4] essera claudite firmemente. Nemo potera entrar o sortir de illos. Omne Juda essera portate via captive. Illes essera completemente portate in exilio’”.

²⁰Inde io diceva: “Leva tu oculos e reguarda le inimico que veni del nord. Ubi es nunc le grege de gente que te esseva confidite? Ubi es le oves que tanto te inorgoliava? ²¹Que va tu dicer quando le Senior prendera le alliatos que tu tanto amava e les facera tu dominatores? Dolores de angustia te sasira simile a illos de un parturiente! ²²Probabilemente tu va dicer in tu corde: ‘Quare me eveniva tote iste cosas? Quare esseva io tractate como un adultera in disgratia, cuje gonna esseva divellite e su nuditate exponite? Illo eveniva propter le multitudine de tu peccatos^[5]. ²³Poterea un Ethiope mutar le color de su pelle? Poterea un leopardo remover su maculas? Similemente tu non poterea comenciar facer le bon, proque tu semper faceva le mal”.

²⁴Le Senior dice: “Ecce proque io va dispersar te como vannatura que es sufflate via per le vento del deserto. ²⁵Isto es tu sorte, le destino al qual io te appunctava, proque tu me oblidava e poneva tu fide in deos mendace. ²⁶Pro ille ration io sublevara tu gonna usque a coperir tu facie e tu ignominia apparera a omnes como un adultera in disgratia! ²⁷Gente de Jerusalem! Io videva tu culto adultere, tu impudente prostitution, e tu luxuriose desiros de altere deos. Io videva tu disgustose actos de culto super le colles per tote le campania. Tu es condemnate al destruction^[6]! Quanto to continuara esser immunde?’”.

Notas

1. On poterea traducer “al Euphrate”, le fluvio, ma isto pare verisimile.
2. O “le superbia de Juda e le superbia de Jerusalem”
3. O litt. “ambula”.
4. O “in le Negev”.
5. O “de tu iniquitates”.
6. O “guai a te”!