Jeremia

28

Conflicto inter Jeremia e le false propheta Hanania

¹Le sequente evenimentos eveniva in le mesme anno, in le principio del regno de Zedekia, rege de Juda. Il esseva le quinte mense del quarte anno. Le propheta Hanania, filio de Azzur, qui esseva de Gibeon, parlava a Jeremia in le Templo del Senior al presentia del sacerdotes e de tote le populo. Ille diceva: ²“Le Senior del universo, le Deo de Israel, dice: “Io frangera le jugo de servitude al rege de Babylon. ³Intra duo annos, tote le tresores que Rege Nebuchadnezzar removeva de iste loco e portava a Babylon essera retornate. ⁴Io facera alsi retornar in iste loco Jehoiakim, filio de Jeconia de Juda, e tote le exiliatos qui esseva deportate a Babylon. Io certo frangera le jugo de servitude al rege de Babylon. Io, le Senior, ha parlate!”.

⁵Alora le propheta Jeremia respondeva al propheta Hanania in presentia del sacerdotes e de tote le populo qui stava in le Templo del Senior. ⁶Le propheta Jeremia diceva: “Amen! Que le Senior face tote isto! Que le Senior realisa iste tu prophetia! Que le Senior face retornar a in iste loco ab Babylon tote le articulos preciose removite del Templo del Senior e le populo qui esseva deportate in exilio. ⁷Ma audi nunc le parolas solemne que io te dice al presentia de tote iste gente. ⁸Le prophetas antique qui esseva ante me e ante te ab le initio, prophetisava contra multe grande nationes, semper preveniente de guerras, disastros e plagas. ⁹Assi, si un propheta prophetisa pace e prosperitate, ille debe demonstrar que ille ha ration. Solmente quando su predictiones se realisa, nos potera saper que vermente ille esseva commissionate per le Senior”.

¹⁰Alora le propheta Hanania prendeva le jugo del collo del propheta Jeremia e lo frangeva. ¹¹Pois, in presentia de tote le populo, ille diceva: “Le Senior dice: In le mesme maniera io frangera le jugo de servitude de omne gentes a Rege Nebuchadnezzar de Babylon ante que duo annos termina”. Post haber audite isto, Jeremia quitava le area del Templo.

¹²Proximemente, post que le propheta Hanania habeva frangite le jugo que ille portava sur su collo, un message del Senior perveniva a Jeremia. Illo diceva: ¹³“Vade e dice a Hanania: ‘Isto dice le Senior: Tu frangeva un jugo de ligno, ma tu lo reimplaciava con un jugo de ferro! ¹⁴Quia le Senior del universo, le Deo de Israel, dice: ‘Io poneva un jugo de ferro sur le collos de tote iste gentes, ut illos servi Rege Nebuchadnezzar de Babylon. E illos certo le servira. Io le dava dominio mesmo super le animales salvage’”.

¹⁵Deinde, le propheta Jeremia diceva al propheta Hanania: “Audi, Hanania! Le Senior non te commissionava! Tu face que iste populo crede in mendacios! ¹⁶Assi, le Senior dice: ‘Ecce, io te removera del facie del Terra. tu morira iste mesme anno, quia tu ha consiliate le rebellion contra le Senior’”. ¹⁷Assi, in le septime mense de celle mesme anno le propheta Hanania moriva.

Notas