Le Proverbios

Capitulo 21

¹Le corde^[1] del rege es in le mano del Senior sicut rivos de aquas; ille lo verte ubicunque ille vole.

²Tote le vias per le quales un persona ambula, es bon a su proprie oculos, ma le Senior los perscruta e los evaluta.

³Operar rectemente e justemente place al Senior magis quam le offertas de sacrificios.

⁴Oculos orgoliose e un corde fer - lo que le impios cole - es peccato.

⁵Cogitationes diligente semper resulta in prosperitate, ma omnes qui es hastive in lor decisiones se retrova semper in paupertate.

⁶Tresores accumulate per le medio de mendacios^[2] es solmente nebulas e un trappa mortal.

⁷Le violentia del impios les trahera via omnes, quia illes refusava facer lo que es juste.

⁸Le conducta del persona perverse es fraudulente, ma illo del persona munde es recte.

⁹Seder in un angulo del mansarda es melior quam viver in le domo insimul a un uxor litigiose.

¹⁰Le impios desira le mal: illes non ha ulle misericordia pro lor proximo.

¹¹Quando le irrisor es punite, le imbecille deveni sage; quando un sagio es instruite, ille acquire cognoscentia.

¹²Le Justo sape lo que eveni in le domo del impios: ille facera cader les in ruina.

¹³Qui se tappa le aures ante al clamor del pauperes, essera alsi ignorate quando illes mesme essera necessitose

¹⁴Un dono facite in secreto extingue le ira e un offerta de corruption passate sub le tabula mesmo le maxime indignation.

¹⁵Le justitia face le gaudio del justos ma illo terrifica qui face le mal.

¹⁶Le persona qui erra ab le via del prudentia cadera in compania del mortos.

¹⁷Illes qui ama le placeres devenira povre; illes qui ama vino e luxuria non devenira unquam ric.

¹⁸Le impios deveni un redemption pro le justos e le iniques es prendite in le placia del rectes.

¹⁹Habitar sol in un deserto es melior quam viver con un uxor contentiose e querelante.

²⁰Il ha tresores desirabile e oleo de oliva in le habitation del sage, ma un homine imprudente dissipa toto lo que ille possede.

²¹Qui perseque justitia e misericordia, trova vita, justitia e gloria.

²²Le sage conquire le citate del forte e destrue le fortalessa in le qual ille confide.

²³Qui custodia su bucca e su lingua, custodia su vita ab angustias.

²⁴Un persona superbe e arrogante, cuje nomine es “le Irrisor”, opera superbia sin limites.

²⁵Lo que le pigre desira le occidera, quia su manos refusava laborar.

²⁶Il ha personas avide que per tote le die concupisce e desira, ma qui es juste dona e non sparnia.

²⁷Le sacrificios del impios es abominabile, tanto magis quanto illos es offerite con mal intentiones.

²⁸Le teste mendace perira, ma a un teste credibile essera permittite parlar.

²⁹Un persona impie monstra esser hardite, ma qui es recte es preste a corriger su via.

³⁰Nulle sapientia, intelligentia, o planos human pote resister contra le Senior.

³¹Mesmo si multe cavallos es preparate pro le die del bello, le victoria pertine al Senior.

↑ “Corde” es un metonymia de subjecto; illo significa le habilitate de facer decisiones, non le decisiones ipse.
↑ O “con un lingua mendace”.