Biblia/Vetule Testamento/Proverbios/Proverbios 31

Le Proverbios

Capitulo 31

Parolas de Lemuel

¹Parolas de Lemuel, rege de Massa, le message prophetic^[1] que su matre le doceva: ²“Oh filio mie, filio de mi sino, oh filio de mi votos: ¹³Non dissipar tu substantias^[2] con feminas, ni con les qui causa le ruina de reges. ⁴Il non conveni a reges, oh Lemuel, biber troppo vino, o a rectores^[3] appeter alcohol. ⁵Quia, si illes bibe troppo, illes poterea oblidar le leges e non render justitia al pauperes. ⁶Alcohol es pro le morentes, e vino pro les qui es amarisate. ⁷Que illes bibe e oblida lor paupertate, e non se recorda plus de lor angustias. ⁸Que tu voce se eleva forte^[4] in favor de les qui non pote parlar a lor defensa; secura justitia a les qui es opprimite. ⁹Si, eleva forte tu voce in favor de les qui es paupere e inope, e provide render les justitia.

Un femina de character nobile

¹⁰Qui pote trovar un femina virtuose e capabile^[5]? Su valor es multo plus grande que rubinos. ¹¹u marito pote plenmente confider in illa; illa grandemente inricchi su vita. ¹²Illa le benefica e non le causa ulle damno per tote le dies de su vita. ¹³Illa trova lana e lino e habilemente los texe con su manos. ¹⁴Illa es simile a un nave mercantil que porta su nutrimento de longe. ¹⁵Illa se leva mane quando ancora il es obscur e prepara le jentaculo pro su familia, planante le deberes de su servitrices. ¹⁶Illa vade inspicer un agro e lo eme; con le fructo de su manos illa planta un vinia. ¹⁷Illa es energic e forte, illa labora vigorosemente. ¹⁸Illa se assecura que su affaires es profitabile; su lampadas remane accendite usque a tarde nocte, ¹⁹Su manos es constantemente occupate al bobina e su digitos es active al fuso. ²⁰Illa extende su manos verso le personas inope e aperi su bracios verso le necessitose. ²¹Illa non time le hiberno^[6] pro su familia, quia illa ha providite pro omnes vestimentos calide. ²²Illa face su proprie coperilectos; illa se vesti de lino fin e de cottas purpuree. ²³Su marito es ben cognite al portas del citate, ubi ille sede con le altere ancianos regente. ²⁴Illa produce robas de lino e los vende, e charpas a vender al mercatores. ²⁵Illa es vestite de fortia e dignitate, e ride sin timor del futuro. ²⁶Quando illa parla, su parolas es plen de sapientia e da instructiones con benignitate. ²⁷Diligentemente illa survelia tote le affaires de su familia: nemo poterea accusar la de esser pigre^[7]. ²⁸Su filios semper la benedice; su marito la lauda e la dice: ²⁹“In le mundo il ha multe feminas virtuose e capabile, sed tu omne illas supera.”. ³⁰Charme es deceptive e le beltate non dura, ma un femina qui respecta^[8] le Senior essera grandemente laudate. ³¹Recompensa la pro tote lo que illa compliva! Que su operas declara publicamente^[9] su laude!

Notas

1. O “oraculo”.
2. O “fortias”.
3. O “magistratos”.
4. O “aperi tu ore pro”.
5. O “forte”, o “de character nobile”.
6. O “frigor del nive”.
7. O “illa non mangia le pan del pigressa”.
8. O “time”.
9. O “al portas del citate”.