Biblia/Vetule Testamento/Psalmos/Psalmos 104

Psalmos

104. Benedice, anima mie, le Senior!

Le psalmista lauda Deo como le Creator e Rector del mundo, qui da e sustene le vita..

¹Benedice, anima mie le Senior! Oh Senior, mi Deo! Tu es magnific. Majestate e splendor es tu vestimentos. ²Ille se coperi de lumine como un roba. Ille extende le celos sicut le tela de un cortina, ³e dispone le trabes del cameras superior de su palatio super le nubes del pluvia. Ille face del nubes su carro, e viagia super le alas del ventos. ⁴Ille face del ventos su messageros, e del flammas ignee su ministros.

⁵Ille establi le Terra super su fundationes; propter isto illo es inamovibile. ⁶Aquas profunde lo coperiva sicut un vestimento; le aquas esseva plus alte que le montanias. ⁷Tu crito faceva retraher le aquas; al sono de tu voce tonitruante illos fugiva - ⁸durante que le montanias ascendeva e le valleas descendeva - usque al loco que tu decretava pro illos. ⁹Tu establiva pro illos un termino que illos non transgrede; le aquas non coperira plus le Terra.

¹⁰Ille transforma le fontes in torrentes; illos flue inter le montanias. ¹¹Illos provide aqua pro tote le animales del agros; le asinos salvage ibi appacia lor sete; ¹²Le aves del celo habita apud le torrentes; illos pipa inter le arbustos. ¹³Ille riga le montanias ab le cameras superior de su palatio; le terra es plen del fructos que tu face crescer. ¹⁴Ille provide herbas pro le bestial, e plantas del terra que le homines pote cultivar e transformar in nutrimento, ¹⁵producer vino que rende gaudiose le cordes e oleo de oliva que face relucer facies, ma alsi le pan que sustene le vita. ¹⁶Le arbores del Senior recipe tote le pluvia que illos necessita, le cedros del Libano que ille plantava, ¹⁷ubi le aves nidifica, apud le semperverdes in le quales le hairon habita. ¹⁸Alto in le montanias vive le capras salvage; le taxones del roccas trova securitate inter precipitios.

¹⁹Ille faceva le luna a signar le tempores e le sol se pone secundo un plano regular. ²⁰Tu manda le tenebras, e il deveni nocte, durante le qual omne le animales selvatic repta. ²¹Le leones rugi ut capturar predas e ab Deo illos quere lor nutrimento. ²²Quando le sol se leva, illos se retira e dormi in lor leoniera. ²³Alora homines sorti pro facer lor labor, e illes travalia usque ad vespere.

²⁴Oh Senior, que varietate de cosas vivente tu ha facite! Tu exhibiva multe maestria^[1] in facer los; le Terra es plen de tu creaturas. ²⁵Ecce hic es le mar, vaste e late, que abunda de innumerabile creaturas natante, cosas vivente, tan parve como grande. ²⁶Ibi naves transi per illo, e hic nata le balena^[2], que tu faceva ut jocar in illo. ²⁷Omne le creaturas expecta de te que tu los provide le nutrimento que illos necessita^[3]. ²⁸Quando tu lo approvisiona a illos e illos lo recipe, tu aperi tu mano e illos es implite de bon cosas. ²⁹Quando tu averte de illos tu facie, illos se affolla. Quando tu reprende de illos lor sufflo vital, illos mori e retorna in pulvere. ³⁰Quando tu manda a illes tu sufflo que da vita, le vita es create e tu replena le facie del Terra. ³¹Que le gloria del Senior permane in eterno! Que le Senior trova placer in su obras! ³²Ille respice le terra e lo face tremer; ille tange le montanias e illos incipe fumigar.

³³Io va cantar al Senior per tote mi vita; io va cantar laudes al Senior usque a mi ultime sufflo. ³⁴Que mi elocution^[4] le sia agradate, quia io me allegra in le Senior! ³⁵Que tote le peccatores dispare del Terra e le iniques se eclipsa! Benedice, anima mie le Senior!

Notas

1. O “sapientia”.
2. O “le Leviathan”, considerate un monstro marin.
3. O “a su tempore”.
4. O “pensamentos”.