Biblia/Vetule Testamento/Psalmos/Psalmos 110

Psalmos

110. Le Senior dice a mi Senior: Sede te a mi dextera

In iste psalmo regal, le psalmista annuncia le oraculo de Deo verso le rege davidic. Le prime parte del oraculo se trova in verso 1, le secunde in verso 4. In le versos 2-3 le psalmista se adressa al rege, durante que in le versos 5-7 ille pare adressar se a Deo.

¹Un psalmo de David. Le Senior dice a mi Senior: Sede te a mi dextera, usque io face de tu inimicos un scabello pro tu pedes. ²Le Senior extendera tu dominio potente ab Jerusalem; tu dominara tu inimicos. ³Tu populo te sequera de bon grado quando tu vadera pugnar. Tu es vestite de robas sancte e tu fortia essera renovate cata die como le rore matinal. ⁴Le Senior faceva iste promissa sub juramento e non lo revocara: “Tu essera pro semper un sacerdote secundo le exemplo de Melchizedek”. ⁵Le Senior sta a tu dextera pro proteger te. Ille percutera multe reges quando su ira essera discatenate. ⁶Ille exequera su judicio de condemnation contra le nationes. Ille implera le valleas de cadaveres; ille fracassara multe capites sur vaste campos de battalia. ⁷Ille bibera ab torrentes longe le via. Ille essera victoriose.