Biblia/Vetule Testamento/Psalmos/Psalmos 31

Psalmos

31. In te io ha trovate asylo

Le Psalmista fiduciosemente pete al Senior de guardar le. Inimicos le menacia e mesmo su amicos le ha derelinquite, ma ille confide que le Senior va vindicar le. In le versos final (19-24), que apparentemente esseva scribite de post le responsa al precaria initial, le Psalmista regratia le Senior pro haber le liberate.

¹ Pro le maestro del choro. Un Psalmo de David. In te io ha trovate asylo. Non permitte que unquam io sia humiliate. Que mi liberation sia tu vindicantia. ² Inclina a me tu aure, libera me celeremente. Que tu sia mi rocca de protection, un fortalessa ubi io pote remaner in securitate. ³ Quia tu es mi fortitude e mi refugio: propter tu nomine conduce e guida me. ⁴ Libera me del rete que illes tendeva pro attrappar me, quia tu es mi loco de refugio. ⁵ In tu manos io confide mi vita: tu va liberar me, oh Senior, quia tu es le Deo fidel. ⁶ Io odia illes que adora idolos van, ma io confide in le Senior. ⁷Io va exultar e allegrar me in tu fidelitate, quia tu respiceva mi affliction^[1]. ⁸ Tu non me livrava in le manos de mi inimicos; tu me poneva in un placia secur.

⁹Habe misericordia pro me, Senior, quia io es tribulate! Mi oculos es turbate de amaritude, io perdeva tote mi fortias^[2]. ¹⁰ Quia mi vita se approxima a terminar in dolor, mi annos in gemitos; le peccato ha exhaurite mi fortias, e mi ossos ha devenite fragile. ¹¹ Propter tote mi inimicos le gente me disprecia, mi vicinos es consternate in vider me tanto suffrer; illes qui me cognosce es horrificate de mi condition; illes qui me vide foras per le vias fugi ab me. ¹² Io esseva oblidate de omnes sicut un homine qui moriva e nemo plus pensa a ille. Io es considerate tam inutile quam un vaso infringite. ¹³ Io ha audite tote le rumor que se diffundeva a mi reguardo, le novas terrificante que proveni de omne direction. Quando illes conspira contra me, illes cogita como illes poterea facer terminar mi vita.

¹⁴ Nonobstante tote isto, io confide^[3] in te. Io declara: “Tu es mi Deo!”. ¹⁵ Mi destino es in tu manos solmente. Libera me del manos de mi inimicos e de les que me perseque! ¹⁶ Surride a tu servitor! Libera me propter tu fidelitate^[4]! ¹⁷ Oh Senior, que io non sia humiliate, quia io invoca tu adjuta. Que le impios erubesce de vergonia e que vade al inferno in lamentos. ¹⁸ Que le bucca del mentitores tace pro semper - le bucca que parla defiantemente contra le innocente, con arrogantia e contempto.

¹⁹ Quanto abundante es tu benedictiones, illos que tu reserva pro tu fideles loyal. Tu los profunde al vista de omnes super tote illes que trova asylo apud te. ²⁰ Tu les occulta con te, ubi illes es salve de attaccos calumniose. ²¹Le Senior merita esser laudate, quia ille ben demonstava su stupefaciente fidelitate verso me, quando io esseva assediate per multe inimicos. ²²Troppo cito io concludeva que io habeva essite excidite de tu presentia. Ma tu audiva le voce de mi orationes dum io clamava ad te.

²³ Ama le Senior, vos omnes su fideles^[5]! Le Senior custodia illes que ha integritate, ma ille plenmente repaga qui age con arrogantia. ²⁴ Sia forte e confidente, vos omnes qui spera in le Senior!

Notas

1. O “humilitate”.
2. O “mi corpore e mi anima marcesce”.
3. O “spera”.
4. O “misericordia”.
5. O “sanctos”.