Biblia/Vetule Testamento/Psalmos/Psalmos 84

Psalmos

84. Quanto agradabile es le loco ubi tu vive

Le Psalmista exprime su desiro de esser al presentia de Deo in le templo de Jerusalem, quia le Senior es le protector de su populo

¹Pro le magistro del choro: un psalmo del descendentes de Koreh, a accompaniar se per un instrumento a corda. Quanto agradabile es le loco ubi tu vive, oh Senior del universo! ²Mi anima concupisce languorosemente de entrar in le cortes del templo del Senior! Mi corde e mi integre esser^[1] exulta in le Deo vivente. ³Mesmo le passere trova ibi un domo e le hirundine face su nido e pone su pullos apud tu altares, oh Senior del universo, mi Rege e mi Deo! ⁴Beate es qui habita in tu domo e te lauda sin cessar. ⁵Beate es le homine, cuje auxilio veni de te e qui in su corde desira ardentemente ascender a tu templo.

⁶Quando illes transi per le vallea del affliction^[2], Deo les provide fontes. Mesmo le pluvia matutin lo coperi con stagnos de aqua. ⁷Illes es sustenite passo a passo^[3] e cata un de illes se presenta coram Deo in Sion. ⁸Oh Deo del universo, exaudi mi oration! Audi, oh Deo de Jacobo! Interludio.

⁹Oh Deo, reguarda con favor le rege, nostre protector! Manifesta tu favor a ille que tu consecrava^[4]!

¹⁰Un singule die in le cortes de tu templo es melior que mille passate in qualcunque altere loco. Io prefererea esser le portero del domo de mi Deo, plus tosto que habitar in le domos de peccatores. ¹¹Quia le Senior Deo es nostre Sol e nostre scuto de protection. Ille da gratia e gloria. Le Senior non va privar de bon cosas qui face lo que es juste^[5]. ¹²Oh, Senior del universo, beate es le homine qui spera in te.

Notas

1. Litt. “mi carne”.
2. O “de Baca”.
3. O “illes vade de fortitude a fortitude”.
4. Litt. “le Christo”.
5. O “qui ambula in innocentia”, “qui ha integritate”.