Biblia/Vetule Testamento/Psalmos/Psalmos 96

Psalmos

96. Canta al Senior un nove cantico

Le psalmista advoca omnes a laudar le Senior, le soveran creator del mundo, que preserva e promove le justitia in le mundo.

¹Canta al Senior un nove cantico. Que le terra integre canta al Senior! ²Canta al Senior, benedice su nomine. Annuncia de die in die como ille salva! ³Annuncia inter le gentes su gloria. Annuncia a tote le populos su meravilias, ⁴quia le Senior es magne e certo digne de laude. Ille es incomparabilemente^[1] meraviliose, ⁵quia omne le deos de altere gentes es sin valor: il esseva de facto le Senior a facer le celos. ⁶Magnificentia e beltate emana de ille^[2]; su sanctuario es firmemente establite^[3] e belle. ⁷Ascribe a ille, oh familias del nationes, ascribe a ille gloria e potentia. ⁸Ascribe al Senior le gloria^[4] debite a su nomine. Apporta un offerta e entra in su cortes. ⁹Adora le Senior in sancte splendor. Que tote le terra treme coram ille. ¹⁰Dice a tote le gentes: “Le Senior regna!”. Le orbe del terra es ben establite; illo non pote esser removite. Ille judica le populos con equitate. ¹¹Que le celo se allegra e que le terra sia felice. Que le mar e toto lo que illo contine crita de gaudio. ¹²Que le campos e toto lo que es in illos celebra. Tunc exultara tote le arbores del forestas, ¹³ante le Senior, quia ille veni. Proque ille veni a judicar le terra. Ille judicara le orbe del terra con justitia, e le populos secundo su veritate.

Notas

1. O “plus meraviliose que omne altere deo”.
2. O “es coram ille”.
3. O “forte”.
4. O “splendor”.