Biblia/Vetule Testamento/Reges/1Reges 4

1 Reges

4

Le corte regal de Salomon e su administratores

¹Le rege Salomon nunc regnava super omne Israel, ²e istes esseva su supreme officieros:

Azaria, filio de Zadok, esseva le sacerdote- ³Elioreph e Ahia, filios de Sisa, esseva le secretarios del corte^[1]. ⁴Benaia, filio de Jehoiada, esseva le commandante del armea. Zadok e Abiathar esseva sacerdotes. ⁵Azaria, filio de Nathan, esseva le superintendente del prefectos^[2]. Zabud, filio de Nathan, un sacerdote, esseva un consiliero fiducial del rege. ⁶Ahishar esseva le administrator del proprietates de palatio. Adoniram, filio de Abda, esseva responsabile del conscription pro obras public.

⁷Salomon habeva alsi dece-duo governatores^[3] de districtos super omne Israel. Illes esseva responsabile de provider victualias pro le familia regal. Cata uno de illes arrangiava le provisiones necessari pro un singule mense del anno. ⁸Istes es le nomines del dece-duo governatores:

Ben Hir, in le pais collinose de Ephraim. ⁹Ben-deker, in Makaz, Shaalbin, Beth-shemesh, e Elon-bethanan. ¹⁰Ben-hesed, in Arubboth, includente Socoh e omne le territorio de Hepher. ¹¹Ben-abinadab, in tote le area de Naphodot-dor (ille esseva maritate a Taphat, un del filias de Salomon). ¹²Baana, filio de Ahilud, in Taanach e Megiddo, tote le area de Beth-shan apud Zarethan subtus Juzreen, e tote le territorio ab Beth-shan usque ultra Abel-meholah e usque ultra Jokmeam. ¹³Ben-geber, in Ramoth-gilead, includite le citates de Jair (assi nominate pro Jair del tribo de Manasse) in Gilead, e in le region de Argob de Bashan, includite sexanta grande urbes fortificate con barras de bronzo a lor portas. ¹⁴Ahinadab, filio de Iddo, in Mahanaim. ¹⁵Ahimaaz, in Nephtali. (Ille esseva maritate a Basemath, un altere filia de Salomon). ¹⁶Baana, filio de Hushai, in Asher e in Aloth. ¹⁷Jehoshaphat, filio de Paruah, in Issachar. ¹⁸Shimei, filio de Ela, in Beniamin. ¹⁹Geber, filio de Uri, in le territorio de Gilead, includite le territorios del Rege Sihon del Amoritas e del Rege Og de Bashan. Il habeva alsi un governator super le territorio de Juda. ²⁰Le populo de Juda e de Israel esseva tanto numerose quanto le sablo sur le costa del mar. illes habeva in abundantia a mangiar e a biber, e esseva multo felice.

Le ricchessa e le fama de Salomon^[4]

²¹Salomon dominava super tote le regnos ab le fluvio Euphrate in le nord usque al terra del Philisteos e al confinios de Egypto in le sud. Le populos conquirite de ille nationes mandava tributos a Salomon e continuava servir le durante tote le dies de su vita. ²²Le exigentia de alimentos pro le palatio regal esseva de 150 modios de farina fin e 300 modios de cereales; ²³10 boves ingrassiate, 20 bestial nutrite in le pasturas, e cento oves o capras, e anque arietes, gazellas, cervos, e aves domestic ben nutrite.

²⁴Le dominio de Salomon se extendeva per tote le regnos a west del fluvio Euphrate, ab Tiphsa a Gaza. E il habeva pace super tote su confinios. ²⁵Durante le dies del vita de Salomon, tote Juda e Israel viveva in pace e securitate. E ab Dan in le nord usque a Beersheba in le sud, cata familia habeva su proprie casa e jardin.

²⁶Salomon habeva in su stallos 4000 cavallos de traction e le dotationes de su carros de guerra esseva de 12.000 homines.

²⁷Cata un de su governatores de districto provideva fidelmente alimentos pro Rege Salomon e su corte, e cata uno de illes se assecurava que nihil mancava durante le mense que le esseva assignate. ²⁸Illes apportava assi le necessari hordeo e palea pro le cavallos regal in lor stabulos.

²⁹Deo dava a Salomon un sapientia e un prudentia multo grande, e cognoscentia tanto vaste quanto le sablo sur le costas del mar. ³⁰De facto, su sapientia esseva mesmo plus grande que tote le sapientes del Oriente e le sapientes de Egypto. ³¹Illes esseva plus sapiente que quicunque altere, includite Ethan le Ezrahita e le filios de Mahol - Heman, Calcol, e Darda. Su fama se extendeva per tote le nationes circumstante. ³²Ille componeva circa 3000 proverbios e scribeva 1005 canticos. ³³Ille poteva parlar con autoritate super omne sorta de plantas, ab le grande cedros del Libano usque al parve hyssopo que cresce del crepas in un muro. Ille poteva alsi parlar de animales, aves, parve creaturas e pisces. ³⁴In ultra, reges de omne nationes mandava lor ambassadores solmente pro audir le sapientia de Salomon.

Notas

1. O “scribas”, “cancelleros”.
2. Governatores del districtos.
3. O “prefectos”.
4. Comenciante de 4:21 le numeration del versos usque a 5:18 de nostre version differe del numeration del texto hebraic (BHS). Ab 6:21 illo retorna esser le mesme