Biblia/Vetule Testamento/Reges/2Reges 2

2 Reges

2

Le assumption de Elias

¹Justo^[1] ante que le Senior assumeva Elias al celo in un huracan, Elias con Eliseo veniva ab Gilgal. ²Elias diceva a Eliseo: “Remane hic, proque le Senior me inviava a Bethel. Ma Eliseo diceva: “Quanto il es secur que le Senior vive, e tu vive, io non te abandonara”. Assi illes descendeva a Bethel. ³Alcun membros del corporation del prophetas^[2] in Bethel vadeva assi a incontrar^[3] Eliseo e le diceva: “Sape tu que hodie le Senior portara via tu maestro de te^[4]?”. Ille respondeva: “Si, io lo sape, tace vos”!

⁴Elias le diceva: “Remane hic, proque le Senior me inviava a Jericho!” Ma ille replicava: “Quanto il es secur que le Senior vive, e tu vive, io non te abandonara”. Assi illes vadeva a Jericho. ⁵Alcun membros del corporation del prophetas^[2] in Jericho, approchava Eliseo e les diceva: “Sape tu que hodie le Senior portara via tu maestro de te^[5]?”. Ille respondeva: “Si, io lo sape, tace vos^[6]”!

⁶Elias le diceva: “Remane hic, proque le Senior me inviava al Jordano!” Ma ille replicava: “Quanto il es secur que le Senior vive, e tu vive, io non te abandonara”. Assi illes procedeva insimul. ⁷Le cinquanta membros del corporation del prophetas vadeva con illes e se poneva opposite a illes a un certe distantia, durante que Elias e Eliseo stava apud le Jordano. ⁸Elias alora prendeva su mantello, lo replicava e con illo colpava le aqua. Le aqua alora se divideva, e le duo transiva sur terra sic.

⁹Quando illes habeva transite, Elias diceva a Eliseo: “Que pote io facer pro te ante que io essera portate via de te?” Eliseo respondeva: “Pote io reciper un duple portion del spirito prophetic que te energisa?”. ¹⁰Elia replicava: “Isto es un requesta difficile^[7]! Si tu me vide quando io essera portate via, illo evenira, ma si tu non me vide, illo non evenira”.

¹¹Durante que illes camminava insimul e parlava, tosto appareva un carro de foco trainate per cavallos de foco. Illos se disponeva inter Elias e Eliseo^[8], e Elias ascendeva al celo como in un huracan. ¹²Durante que Eliseo guardava, ille critava: “Patre mie! Patre mie! Le carro e le cavalleros de Israel!”. Alora ille non plus poteva vider le, pois ille sasiva su vestimento e lo lacerava in duo pecias. ¹³Ille colligeva le mantello de Elias, que habeva cadite ab ille e retornava e ille stava sur le ripa del Jordano. ¹⁴Ille pois prendeva le mantello que esseva cadite ab Elias, colpava le aqua per illo, e diceva: “Ubi es le Senior, le Deo de Elias?”. Quando ille colpava le aqua, illo se divideva e Eliseo transiva le flumine.

¹⁵Quando le membros del corporation prophetic de Jericho que stava a un certe distantia videva lo que Eliseo habeva facite, illes diceva: “Le spirito que energisava Elias es nunc in Eliseo” Illes se approchava pro incontrar le e se inclinava a terra reverentemente ante ille. ¹⁶Illes le diceva: “Ecco, il ha cinquanta homines abile con tu servitores. Permitte que illes vade a cercar tu maestro, proque le vento que le Senior mandava poterea haber le portate via e facite cader in uno del collinas o in uno del valleas”. Ma Eliseo replicava: “Non invia les”. ¹⁷Ma illes esseva tanto insistente que ille deveniva embarassate. Assi ille diceva: “Invia les a cercar” Alora illes inviava le cinquanta homines a cercar, ma illes non trovava Elias. ¹⁸Quando illes retornava, Eliseo esseva in Jericho. Ille les diceva: “Forsan io non diceva vos de non vader?”.

Eliseo demonstra su autoritate

¹⁹Le homines del citate diceva a Eliseo: “Ecce, iste citate ha un optime collocation, como tu, senior nostre, pote perspicer. Le aqua, tamen, es pessime e le terreno non es productive. ²⁰Eliseo alora diceva: “Apporta me un nove vaso e mitte in illo sal”. Illes faceva assi. ²¹Deinde ille sortiva al fonte que suppliva le citate de aqua, e jectava in illo le sal. E ille diceva: “Isto es lo que dice le Senior: ‘Io purificava iste aqua. Illo non causara plus ni morte ni infertilitate”. ²²Ergo le aqua ha remanite pur usque a hodie, secundo le parola que Eliseo habeva dicite.

²³De ibi, Eliseo ascendeva verso Bethel. Durante que ille camminava per ille via, un gruppo de pueros de ille citate comenciava burlar se de ille dicente: “Ascende, calve! Ascende, calve!”. ²⁴Alora Eliseo se reverteva e quando les videva, les malediceva in le nomine del Senior. Alora duo ursas sortiva del bosco e divelleva quaranta-duo de illes. ²⁵De ibi Eliseo vadeva al monte Carmel, e finalmente retornava a in Samaria.

Notas

1. O “quando”.
2. O “le filios del prophetas”.
3. O “exiva”.
4. O litt. “de tu capite”.
5. O litt. “de tu capite”.
6. O “face silentio”!
7. O “Tu demandava un cosa difficile!”.
8. O “illes faceva un division inter illes”.