Bozataw

by Ájiniyaz

Keter boldıq endi bizler bash alıp,
Xosh aman bol, bizden qaldıń, Bozataw,
Xoshlasalı qara kózge yash alıp,
Xosh aman bol, bizden qaldıń, Bozataw.

Er jigit basına múshkil is túshti,
Yúrek-baǵrım ǵamnıń otına túshti,
Elatıń ústińnen serpilip kóshti,
Xosh, aman bol, bizden qaldıń, Bozataw.

Ziywarıń xoshlasar qádrińni bilip,
Kózini jaslatar, barını tilip,
Aman bolsa, hal sorasar bir kelip,
Xosh, aman bol, bizden qaldıń, Bozataw.

Sen baǵ ediń búlbil ushtı zaǵ qaldı,
Pútkil siynem jandı, ishte daǵ qaldı,
Qıysıq porqan ataw, seni jaw aldı,
Bası qutlı, sońı wáyran, Bozataw.

Kimseniń anası, kimniń ámmesi,
Kimseniń aǵası, kimniń inisi,
Kimseniń qız-uǵlı, kimniń sińlisi,
Átirek, Gúrlen, Xajar astı, Bozataw.