Che tan tert sproma cuntra n te vënt?
- Che tan tert sproma cuntra n te vënt?
Che tan tert sproma cuntra n te vënt?
Le fi cun le pere él, jí vái ch'al é n spavënt;
Le pere so fi ti brac bëgn dür y strënt tëgn,
Dür y strënt, por chësc i dál tan cialt sëgn.
- Ci as' pa, oh fi, porcí t'ascognes' le bel müs? -
Pere, ne vëighes' le re daimpró da chi rüs?
Le re di lëgns cun coda, cun corona? -
N tach de nio, mi fi, ater n'él che te coiona. -
"Bel pice möt, ne n'os' t'un gní cun me? Ví,
Bel damat fajuns' pa intrami, n'os' gní?
Ciüfs assá che tofa bun te pói dé,
Mia uma le guant te dá d'arjënt y indoré". -
Pere, oh pere, ne n'aldes', coch'al sona?
Le re di lëgns da d'ega plan rajona? -
Pice, oh pice, sta chit y scolta bel plan,
Le vënt él che t'aldes te chëstes brüsces soflan. -
"Oh bel möt, cun me cun me gní mësses',
Bëgn traté da mies mitans gní desses';
Mies mitans da sëra roda y bala,
Cianta intan che t'indormedësces, n os' na tara?" -
Pere, oh pere, iló te chël scür bëgn vëighes'
Sëgn les fies dl re di lëgns da d'eghes? -
Pice, oh pice, saurí les vëighi dötes,
Grijes péres, nia n'él ater co rötes. -
"Ch'i te portes amur, to corp me sforza,
Donca a bones ví, sce ne t'os la forza". -
Pere, oh pere, al pëia y me toca, le bur re,
Le re di lëgns da d'ega, fat m'ál gran me. -
Le pere se tëm y spaventé vál debota
Le pice söl brac che süsta sciöche da bota,
Röia cun gran fadia, cun pëna dan porta -
Le pere tignî ti brac so bel püre pice mort.