Chiusa del componimento

by Carlo Antonio Luzzago

So dur de cûr, gne mai gho vist j'ugg ras
se nò de rabbia, e so nassit za un pes.
So quel ch'è bè, e ch'è mal, e quel ch'è pes,
e gho un po de pel dura à sul mostàs.

Vorref mo dì a parlar en bô lenguàs,
ch'ho vest delle Tragedie inans d'ades
recitade da zent che pul dà les,
che gho pianzit, comià se fus de sas

ma Isida, e Sara le m'ha tat commos,
che per pianzer sò stat un pes sul brus,
e gho luggiàt en fì comià un bambos

oh, se l'Autor present à lù el gha fus
se nel scriver no l'ha trat gna un sangiòs,
engramit el saràf i grang brugg mus.

Ma, se j'ugg nom stralùs,
vegh che tugg pians amò a tutt'andà,
che un fiùl par che gh'fia mort, o 'l sò bobà.

E quest ma fa pensà:
se le n' fa pianzer tagg colla finziô
quagg luggiaràf se la disès de bô?

Manc mal che s'muda tô,
che sente a sollevàm de ste gran stretta
da un cantà, che risuscita, e deletta.

Ah MODA benedetta!
Deferenta de tutte quelle mode
che gira dre al capresse, e mai jè sode.

Quest l'è quel che me gode,
che quelle fa vegnì la luna a tagg,
vo col cantà em tignì tugg consolagg.