Codex diplomaticus Anhaltinus/193

1309. Juli 12. Mühlberg. Markgraf Waldemar von Brandenburg verträgt sich unter Vermittelung des Grafen  Albrecht I von Anhalt mit dem Markgrafen Friedrich von Meissen.

     Wie Woldemar van der gnaden Godes marcgreve tu Brandenburch, tu Landisberch unde tu Lusiz bekennen unde betu^ͤghen in dissem iegenwerdigen brieve, dat wie scholen du^ͤn alle dat, dat unse trewe man her Apeke van Barboy, her Bode van Yleburch, her Conrat van Reder, her Lu^ͤdeke van Wedele unde her Bernard van Plozzeck mit den vif ridderen, die unse lieve veddere marcgreve Vrederick van Mysne dartu gesettet heft, eindrechtichliken heyten umme alle twydracht, die is unde gewesen heft twischen unsen veddern den vorbnu^ͤmeden marcgreven Vredericke af ein syde unde uns unde unsen lieven swager marcgreven Johanne af ander syde. Wer dat desse vorbenu^ͤmeden teyne nicht eindrechtig kunden werden, wat danne unse lieve swager greve Albrecht van Anhalt, den wie an beyden syden dartu koren hebben, twischen eren reden spriecht, dat schole wie du^ͤn. Dit scholen de vorbenu^ͤmeden teyne eindrechtichliken hu^ͤde kundigen unde heyten. Is dat sie tweyen, wat uns denne heit unse swager greve Albrecht, dat schole wie dun, dat scal ock hu^ͤde geschyen. Wat uns desse vorbescreven teyne eindrechtichliken heyten oder greve Albrecht, is dat sie entwey dragen, dat schole wie du^ͤn binnen vier weken na dessem dage hu^ͤden. Dede wie des nicht, so schole wie riden in tu Berlyn mit unsem swagere greven Albrecht, mit hern Bernard van Tzrele, hern Boden van Ylebu^ͤrch, hern Hannes van Tzrele, hern Vredericke van Torgowe, hern Wedegen van Kamenz, hern Kerstian van Gherardesdorpp, hern Luthen van Scrieversdorpp, hern Vredericke van Eckstede unde mit hern Henninge van Benz, unde scholen dar nummer utekomen, wie en hebben dat vu^ͤlda^ͤn. Dit hebbe wie en trewen gelovet unsem swager greve Albrecht mit unsen ridderen, die hirvor bescreven sta^ͤn. Uppe dat dit vaste unde stede si, so hebbe wie dessen brief heyten scriven unde besegelen mit unsem insegele.
     Desse brief is gegeven unde gescreven in der sta^ͤtd tu Moleberch, na Godes bo^ͤrt dusent iar driehundert iar in deme negeden iare, in sunte Margareten avende.

Aus dem Original im Hauptstaatsarchive zu Dresden gedr: Riedel cod. dipl. Brand II. 1. 281 (zum 11. Juli).