Comié
Comié.
Lüch tremendo, burt, salvare,
Chît y da temëi, n salüt!
Mesanöt sonada le vare
Frëma a mi chiló, pür möt.
Su, arbandoné, doman
Frara passarái, la munt,
Le ri destin me tlama; plan!
Döt chësc soius porcí söl frunt?
Sunsi fosc tan mat a crëiʼ
Robes chʼ ester vëi ne pó?
Can te cortina ái a me temëi
Scomencé dai morc chiló?
Él ingian y ma spavënt?
O verité cun gran morvëia?
No, degun incantamënt!
Lüch salvare, chësc iadʼ me möia.
Dí, segnal, chi che tʼ es, dí!
Angel pes' gnü jö dal cil,
Tüa belëza tʼ á tradí,
Bela plü che milʼ y milʼ!
Sëgn me fejesʼ dʼ gní daimpró?
Speta, i vëgnʼ, mo no te mü!
Tëma ái bëgn, mo i vëgnʼ pa impó,
Bëgn che tʼ es por me cez de nü.
Ëra santa, vé to fi!
Oma santa, ví, n abrac,
N baje lapró bel snel, spo dí
Tröp y dî cun cör bonac!
Dí, n abrac ciodí ne me das?
Tüa usc aldí porcí nʼ la pói?
Frëida y zënza moto stas,
I edli slominusc y moi!
Ah, cun le dëit me mostres le cil!
Dí mʼ osʼ chʼ i mʼ injignʼ por lʼ iadʼ
Fat te vigni menüt da milʼ?
Ora él bëgn, iʼ le vëighʼ, chʼ i vadʼ.
Grazia, intëne intëni sëgn,
Prëia por me pro Chël Bel Dî,
- Plü che düc ái debojëgn –
Temʼ pro te sön paraisc n de.
Rion tʼ un vasʼ, cignan de sce!
Milʼ y cënt salüc te dái,
Sperʼ te n cört de gní a te pié
Y nʼ ester despartí plü mai.
Lüch tremendo, burt, salvare,
Chît y da temëi, salüc!
Morc, a reveder sëgn! mi afarʼ
Ó chʼ i tolʼ comié da düc.