Dalunc dla patria
Dalunc dla patria.
Dalunc dla patria dlunʼ drumblenn,
dalunc tres net y ont,
mo porteste demez dassënn,
ciaval da fü liront.
Soront y su te cösc vagun
i sun atló sonté.
Ci nëi chʼ al é defora dlunch,
y vigne rü dlacé.
Y dlungia ia desco bai
sʼ an sciampa vigne lën,
ombries fosces fej i vai,
y al ci la löna vën.
Ciamó na ota ciari endô
a chi bi crëps dʼ arjont.
Na frizia i vëighi bën ciamó
dalunc tal firmamont.
Ince chi ne vëighi plü!
Dagnora plü y plü ennant
mo porta ia le ciaval da fü,
a döt i sciampel dant.
O beles munts dla patria, adio,
a canchʼ i vëgni endô!
Y fosc ne dörera plü dio,
chʼ i passi endô atló.