Datuvot bizugik
Neymon de NEYFELDT VIKTOR.
In zif T..... süt stadom, kel labom nemi nepoedik «Sositasüt» e söl Gan, tedal olsik, nu fienal, labedom us domi jönik.
In dom ot, man yunik, nomo Spär, älödom, nufacemi sembal. Kodöt yunana äbinon legudik, ladälabid sofik, klots oma äbinons fe boso pedegebik ab klinik e nulüd oma äbinom vemo balik.
Ifinom studis asü cinanügenel e do älofon cälami ome, deno, söl Spär no älensumom lofi at; ibo ävobom len datuv gletobidik. Adesänom menodami lemüfas, dat vegoms ko spälüd de kildils tel kolata e äspelom en gloli e moni mödik; bevüno zib vädelik oma äkosietom in bodil smalik, in bos de fömad e in vat flifik mödik.
Nügenel yunik kolkömom semdelo su sleb vomüli blönik e levenudik. Beigolof, ab benosmel semik, des flols, iblibom. Söl Spär äfovom tö pos minuts anik vegi. Odelo äkolkömom denu ofi, e of ädaledof ven yunan àkinom glidi, ab äkoldunof oti. Glid e gegliv äzitoms vädelo e yunans, pos dels nemödik, äpükoms kobo.
Vomül Valeria äbinof läd liegik, bi domasöl Gan äbinom fat ofik, kel älödom in stök balid doma ot, kela nuf ätegom lödi mükik söla Spär. Ämekof lanimi nügenele yunik visitön fati ofa e mekön matalofi; söl Spär änokom also, semdel, len yan söla Gan e äsagom pos glid:
- Dälob obe demanön nami vomüla Valeria.
- Matalof at mekol nemü kim?
- In nem de ob it, o söl!
- Magifö! No li binol ködutan oba?
- Si, lödob in nufacem telid!
- Li binos vamik us?
- Binos ya in balsul, e no binos tu vamik us.
- E döl somik li-ävedom deno in kap olik? Valeria labedof matagivi de frans balion lafik e ol, söl matasteifal, debol ainogo köduti obe sis muls kil: Kisi labedol?
- No binob adüpo liegik, ab ovöbob, me datuv gletik, moni mödik.
- Milagö! - Alik kanom sagön atosi. Nolob beno das datuvels semik no laboms guni gudik su koap e laboms liegis mödik in kap e in nilud. Binos vemo cogik tupön obi demü matalof somik. Vendeli gudik, söl datuvel!
Söl Spär ämogolom lügiko.
Muls tel ifegoloms. Söl Gan älabom, in sälun, föni nulik, magifik e ledelidik. Glefid äzitom us e amüton fönön demü kalod gretik. Finü glefid, fön äsmokom sovemo, das sog lölik älüvom säluni e demü atos domasöl ävedom poso lezunik. Ämekom pavokön bumamaseli oma, söli Xoil, kele äsagom:
- Fön kostom moni mödik e demo smokom!
- Ob it edugob bumami cima, no sötom, no kanom smokön.
- Smokom deno, no kanon blibön in sälun!
- Li-mekol fönön me boad u me kolat?
- Gebob boadi.
- Blüfolös gebön kolati e fön no osmokom.
Atos äjenos, ab smok kolatas ti ätuäfom plisenelis in sälun. Söl Gan ävödom en bumamaseli sikiküm[1] zifa, kel, exämöl föni e cimi, äsagom:
- Kim binom, cuk ut, kel ebumom cimi at?
- Söl Xol, bumamasel oba.
- Binom velato xol. Cim paveitomös e fön no osmekom fovo. Cim binom tu nabik.$
Vob at pädunon fa bumamasel sikik e fön no äsmokom timilo; ab ven kalot äkömom, söl Glan ämanifom vemo logis e äkratom kapi. Äpelom, e pos dels za jöl fön äbeginom denu smokön. Kisi dunön?
Söl Gan ävödom en ko patals, ko kanals difik, vlaiks ämenodoms föni e cimi, alan änosom kelosi votan imekom e söl liegik äpelom, äpelom ai, nen sek pevipöl.
Yanan äsagom semdelo söle okik:
- No devolös demü smokam föna! Epükob en ko ködutan, kel lödom in nufacem e binom nügenel. Ot sagom menodön föni e cimi ünü düpil te bal e garanom seki.
- If odunom atosi olegivob plo yelafoldil bal köduti ome. Sagolöd ome, das kömom foviko al ob.
Söl Spär nokom nu telidna len yan mana liegik, kel, logöl yunani, sagom:
- Agö! Li binol ol önakanal et gletik?
- Lesi, e pos düpil bal fön no osmökom!
- If odunol atosi ogetol kelosi vipol.
- Söl divik, li ogevol i nami vomüla Valeria obe?
- Lio?... Al menodön föni vilol das legivob ole domi lölik? Jinos obe, das no binol vemo mükik! Stimob yunanis bafik, ibo i ob ebinob pöfik vöno e kanob danön liegi te dunöfs obik, ab vitim pedemanöl binom tu gletik!
- Vilob vitimi nonik, säkolös en vomüli!
- Kapälob nu. Mekolös vobi pebömetöl e ovödobs poso!
- Labedob kläni nola e voba. Vokolös bumamaselis valik zifa at e nek okanom yufön. Vobob soaliko, no nedob mönelis, ab okikob yani e nek sötom logedön da kikahog.
- Bömetob atosi. Kikod no steifol plivilegi?
- Binob pöfik, no kanob pelön delidis. Li-ogevol begi obik?
- Piano, piano, söl smokakanal! No plidos obe labön lesnali zi nökeb. Binob man cödik, binob man gudik e stimob letäleni.
Söl Gan pävokom, pos düpil bal, fa nügenel yunik, päfönos, fön ämekom vami lesumik nen veged smoka. Domasöl äsagom nu vomüle Valeria:
- Bitopob ole söli Spär, nügenel bafikün zifa obsik, ab ba li sevol ya omi?
- Si, fat löfik!
- If fön et no osmokom ünü vigs tel e if vilol lensumön matalofi oma, omekobs matabömeti. Li-binol en kotenik?
- Si, fat löfik, o[2] fon no osmokom fövo!
Vomül Valeria ävedof somo läd Spär.
Läd Spär ämotof, pos yel bal, pulili jönik; atos ägälos vemo söli Gan. Sog gletik äbinom pötü godavatam sonlila in sälun, ko fön famafulik äpakom vami nen smok. S"l Gan äsagom, pötü fin glefida, lüsone:
- Son löfik! datuvot ola älabom seki gletik. Mon nakömom nu se läns yulopik e melopik, ovedol man liegik i nen matagiv jiela Valeria; ab labedol datuvi bizugik votik, kikod no lepöfüdol i oti?
- Datuvi kiom?
- Binon man vemo mükik! Kläni ola al neletön smoki.
Söl Spär äbeginom nu smilön so vemo, das plisenels ästunoms en; fino äsagom:
- No pükobsöd dö datuvot at!
- Lesi, pükobsöd dös! Söls e läds, fön et esmokom vöno e pos vob blefik lüsona oba nevelo esmokom!
- Mütol pükön obi dö atos. Benö! Mekob stipis oba.
- Stipis kiom? No labob jisonis votik e spelob, das no binol slamel, kel kanom matön vomis mödumik!
Lüfat, lümot e sog lölik äsmiloms atna. Söl Spär äsagom täno boso tlepiko:
- Fat löfik, li vlol fögivon[3] käfi pegeböl fa ob e fa jiman oba?
- Vilob, vilob; ab binob velato nulälik, also konolös velati!
- Nololsöd o flens löfik, das datuvot bizugik at pemekom fa Valeria. Elödob in nufacem kela litöp stadom nilü cim föna. Esatos pladön su manifod cima dini sembal a. s. smabovi al mekön smokön föni. Valeria ebüdof e ob elobedob sosus yanan iblinom büdi. Löf äbinom e obinom ai tidel gudikün plo löföls, jüs fats lusölelik osibinoms. - Kapälol nu, o fat löfik, das leno kanob dagetön plivilegi gönü datuv subimik at!
Tep velatik smila e läsevama ävedom nu bevü plisenels. Söl Gan äblibom begino fefik e ämekom logodi boso lonedik, ab jöto äkidom ladliko « Spärili » smalik e äsmilom kobü votiks. .... Ifögivom. -
NOETS. (Vükifonät)
Se Nunal nulik 1891, Nüm: 4, Pad: 18.