Dränklied

Vivant alle dey söch froien
Bey der Behcher klonk,
Und der Váhter Bröch ernoien,
Wo öm stattlich dronk
Ous dem Mágeltschen, ’su heyszen
Sey ö Glás mátt nichen Feyszen.

Dátt kaint öm neit neddersehtzen,
Mauszt öt stálpen norr,
Wey ön Trichtert; eingden lehtzen
Mauszt öm söch. Ferwohr!
Muncher mauszt dátt ze fill Lehtzen
Un dem ohndern Dohg bekrehtzen.

Ritter heyszen datt den Humpen.
Schrecklich gruhsz wohr diör.
Neit zem Dreinken, norr zem Lumpen
Nohmen sey dien hiör.
Wéy verándern söch de Zedien!
Wiör wörd ná esu ást ledien? ―

Mehsig söin och bey dem behcher.
Striöwt wiör Ihren leiwt;
Neymest leht söch ná ön Zehcher
Gáhre schailden; preifft
Sorgsem, wey fil kohn öm dreinken
Ohnen ángdern Dásch ze seinken.

Ohnen Roi kohn öm söch froien
Ná beym Behcherklonk,
Und esu, esu gedoien
Stattlich Spöis und Dronk.
Lastig dohnst öm draff ám Roien,
Dorf for neymestem söch schoien.