Ele bizdi pútkil dúnya biledi (Ájiniyazov)
Sen kórgen jerlerdiń kórdim kóbisin,
Men bir sóz aytayın kóńliń jibisin,
Kórdim Chirchik, Ural, Kavkaz tawların,
Kóp kórdim táǵdirdin dórtli degishin.
Kavkazda «kóp erdim seniń izińe»,
Ámiw suwın alqas ettim sózime,
Abxaziya alıstaǵı aǵayin,
Kavkazdı da «kóp maqtama kózime».
Men hám keship óttim talay ótkeldi,
Kórdim Kavkazdaǵı gózzal «Kók kóldi»,
Óziń jazǵan jańa «zaman aǵımı»,
Meni shadlıq shámenine ápkeldi.
Nálet aytıp azatlıqtıń jawına,
«Ǵázep penen mindim Mashuq tawına,
«Gózzal Yupshara»nı jubatayın dep,
Kirdim Aricanıń aq otawına.
«Kewil aytıp» knyaz qızı — Ninaǵa,
Kózdiń jasın tógip aldım Kuraǵa,
Mcatmanda qásiyetli tóbeshik,
Pushkin hám bul jerge kelgen ǵaybana.
Tabanım kóp tiydi qıyır-qıyaǵa,
Bardım óziń kórgen Livadiyaǵa,
Rica kólinde júzdim balıqtay,
Máńgi qalsam ba dep Abxaziyada.
Degen menen, meni Shımbay arbadı,
Qaytıwdan ózgeshe ilaj qalmadı,
Bul dúnyanıń «bir beyishi» bolǵan jer,
Shaxamannıń shańlaǵınday bolmadı.
Túrkmen qızlarına «aydım toqıdım»,
Qazaq qızlarına óleń oqıdım,
Ázber, noǵay awılların gezgende,
Seniń qosıqlarıń boldı naqılım.
Sonda keypim Mushmuladay gúl atıp,
Magnoliya maqpal iyis taratıp,
«Ushan suwdan» ilham alıp, yosh alıp,
Qosıq jaza berdim qarday boratıp.
«Altın jaǵıs» juwsa túslik jiyegin,
«Ay-petr» alıstan sozdı iyegin,
«Qarlıǵash uyası» turdı teńselip,
Qulap ketpegey dep iyin tiredim.
Bunıń bári Sizge degen sıylasıq,
Pursat qayda jazatuǵın jaylasıp,
Qosıq jazıw «qıl kópirden ótkendey»,
Óziń-aq kór qabırǵańa oylasıp.
... Isenemen, sonday kúnler keledi,
Ele bizdi pútkil dúnya biledi,
Sebep Berdaq, Ájiniyazdıń watanı,
Qosıq máńgi qonıp qalǵan jer edi.
Sen Berdaqsan pútin úyde tuwılǵan,
Ájiniyazsań sóz seydinin suwırǵan,
Sen — Abbazsań poeziya patshası,
Al, men — teńnen úsh ıqlımnıń ulıman.