Galine e capoon
Galine e capoon
Cocodèe, vegnii chì teutte,
che se tratta d’interèss;
cocodè, chì atourno in circol
e vegnìme bèn aprèss:
forsi incoo, se soum bèn faa
counquistoumm la libertàa.
Citto, e atènte a la me predica:
me che so Flousoufia,
me che leggi semp’ la Storia,
e òo studiat Poulastrogia,
g’òo trouvat che nòn galine
sioumm persoune pouvarine.
G’òo sbagliat fòrs el preämbol?
Nòn cantoumm, ma, a dila s’cetta,
a ste mond douvrèssem pianzer:
oh che vita maledetta!
Se stimoumm del páscol bòn
per finii in del pugnatòn.
Foumm di ov? J’è le amò tepid,
che ’na man senza pietàa
la ni a spazza subit subit,
e i ne vol an’ criticàa
se quai dé j’è picoulen;
goumm da faa di nimalen?
………………………………
Vedarii, chì per la Pasqua,
che spavènt! che distruziòn!
ov in poucc, ov dur, ov tèner,
in fritada e zambajòn…
Sti car òmm i manda in panza
de nòn mader la speranza!
J’ov pu bèi (vardè che calcol!)
i j’àa tèn per daa a couvàa:
e quai dé dopo la nascita
senza gnan’ fai batezàa,
per segnàa sti poulesen
i ghe taja en qual’ diden!
De la nostra carne (oh, rabbia!)
J’òmm i fa le so pitanze;
fin le pieume le ghe còmouda,
e sti scieur senza crëanze
i se scalda, a lett, i pee,
soura, sott, dinanz, dedree. Me dirèss de faa ’n gran sciopero.
Se se, bene! – le rispond
…………………………………
Trii capòn fora de gabia,
a scoultàa ste vousamènt,
Anca nòn, i dis, foumm sciopero
anca nòn sioumm malcountènt;
quest l’è ’n viver maledètt:
andaroumm dal scieur Perfètt;
e vouroumm ben ciar espóneghe
el deritt e la resòn:
tanti insult, tante calunnie,
per finii po in pindoulòn!...
E’ ’l quest chì ste Cristianisim?
E’ ’l quest chì ste Soucialisim?
E cous’èla mò ste infamia
de tajane fin la cresta!
Che figura foumm da sórech
Senza ournat in seu la testa!
Lour che i prova, se ghe pias,
a tajas j’ourecce o ’l nas.
……………………………
J’òch, quacc quacc che stava a sènter
sta questiòn di malcountènt,
pian pianen j’è andat a l’albi
a ingousas coumoudamènt;
e quei pòi che gh’è restat
anca ’l past i g’àa smenat.
……………………………