Hdy podaš ty so, wutroba?

nadpis	Hdy podaš ty so, wutroba?
awtor	Jakub Bart-Ćišinski
lěto
žórło	http://texty.citanka.cz/
licenca	public domain
nota	stary prawopis

    Ty dźiwja krej, o zastań w spěchu
    A zabyć wukni, wutroba!
    Weŕ! Nam'kać budźeš zboža třěchu
    We znjesenju a zabyću.

    Hlej! Słónco hasnje, róža zhinje,
    A ptačkow spěwy doklinča;
    Kćěw rozpadnje a wóń so minje,
    Hdyž wótre wětry zawuja.

    Hdyž zbože wšě je prjec kaž woda,
    Tu zemja płašć so wodźěje
    A něma do bole so poda -
    Hdy podaš ty so, wutroba?