Il pitschen Savojard

by Gian Fadri Caderas

[ 15 ]

Il pitschen Savojard.

»La fam mieu stomi bain tormainta;
La spessa naiv am vel' il sguard;
Pü d'üu co passa, nun consainta
Ün pled benign al Savojard.«

Presentimaint in cour madüra:
Che mê saro damaun da me?
He fam, he fam, la not ais s-chüra .....
Il puls ais flaivel pü cu mê!

»Il grand Signur in sa dimora
As s-chod' al fö d'ün bun chamin;
Ch'import' ad el, scha'l gnir d'aurora
La mort avro a me miss fin!«

»Nun poss chanter, la vusch am mauncha,
Mieu orgelet nun ho pü sun!
Il pover orfan chi nun smauncha,
Chi mê dad el ho compassiun?«

»Eau spordsch il maun, üngün nu'm oda!
Üngün per me nun ho co cour!
Il fled mieus mauns pü non res-choda,
Am saint mancher, eau croud, eau mour!

[ 16 ]

»Que ais pür vaira, l'opulenza,
Il comod viver faun smancher,
Cha bgers oppress dall' indigenza,
Tres fam, tres fraid staun bod cruder!«

La giuventün' in richa sèla
S'allegr' als suns da dutsch accord;
Sün via intaunt il miser dschela!
Ad el ils staints, la düra mort!«

»»Indürast fam?«« am dschet mi' amda,
»»Vo con tieu orgel a Paris,
Il paun nun maunch' in citted granda;
Il Savojard ais sgür bainvis!««

»»Tü nun hest bap, ta mamm' eir ella
Glivret quist an sieu lung partir;
Profitt' infaunt, fin l'or' ais bella,
Tü poust damaun digià partir.««

»Ed eau partit da ma valleda,
E da mieus munts cridand zuond fich;
Da Frauntscha bell' ais la contreda
Mo ma Savoja smaunch eau brich!«

Ȇn nosch cussagl mi' amd' am daiva!
Ma val, mieus munts, eau crid per vus!
Che sort il tschel am reservaiva,
In quaist Paris usche pompus!«

[ 17 ]

»Morir tres fam u fraid sün via;
Mê nun udir ün cher, dutsch pled.
Ch'import' al rich, scha mour el ria!
Nun od il sbreg d'la poverted!«

La mort benign' a sofferenza
Succuors prastet al povr' infaunt.
La vair' amia dell' indigenza
Tschunchet sa vit' in greiv momaint.

Il vent dell' alba fraida, smorta,
Las cordas d'l orgel fo scruschir,
Ün sun da led da quellas sorta
Pel cher compagn, chi get morir.

4 Meg 1867.