Immen/De kukkuk

[003]De kukkuk röppet kukkuk -- wu lankwilig!
      Dat dei ok gar nist bätres lehren well!
      Freujahr un lange leben röppt e hell
Un hat bi sinen raupen et sau ilig!

Wenn doch de minschen ar de kukkuk deen!
      Doch hüte dit un morgen dat, denn dit --
      Roth, jäl un blau un esselgrau un witt!
Se mött eimal et leben sik verleen!

Wat ik an kukkuk noch nich kann verdragen --
      Int fremme nest legt hei jetrost sin ei;
      Dat is ja sonnen kukkuk einderlei!
Dei -- erst ne lüttje wagenstertje fragen? --

Is nu de junge utebreuet --
      en grül -- wat dei nich alle runderpakkt!
      Dat wert mal inepakkt un utepakkt!
Wu sik de wagenstertje drower freuet!

[004]Un is de kukkuk vullens opetrekket --
      Hei schimpet op de wagenstertje lut,
      Dei't mit ne meine doch sau brav -- sau gut,
Kein wunder, wenn de vöggelkens ne nekket.

Kein wunder, dat he owerall sik schuet!
      Hei dräggt sik stännig asch- un esselgrau;
      En sündern un verbräkern geiht et sau,
Dei keinen mehr -- sik sülwest nich mehr truet!

Dat mag e wol -- sik snäweln, eier leggen!
      Sau hat de fule dat vergnügen ok;
      Doch wu't emal nah suren sweete rok --
Kukkuk -- darower leite veel sik seggen!! --