In üna val
In üna val.
Idillic lö, idol da mia amia,
Plaschaivla val, sorrir del paradis,
O verd' oasi d'pêsch ed armonia;
O quaunt serain passessan lo ils dis!
Il god antic coruna la verdüra;
Alpinas fluors favellan ün dutsch pled;
Dalöntsch dal muond in solitaria dmura,
Noss' orma dvainta tschel d'serenited.
Lo la natür' in mistica favella
Respuond al clam del cour oppress, chalcho;
E percurrind il god, il pro, la sella,
Ün ais containt, felizi e beo.
Be paun e lat ans spordsch' allo la maisa;
Il verd tapet ais lam e cher s-chabe;
Del opulent, ch'ais mê la richa spaisa,
In tieu cunfrunt, o simpel past usche?
O lö idillic, aint nel cour imprima
La pêsch chi regna in tieu sain prüvo;
Inflamm' in el la püra zarta rima,
Cha la natüra ho dal tschel erto.
O smaunch' amia que chi chalcha quia!
Vo, pellegrina in quel lö zuond cher
E dun' ün pled da spraunz' all' orma mia;
Ed ama'm saimper sco amih sincer.
17 Avrigl 1871.