Jv/Alkitab/Purwaning Dumadi/39

^39:1 ​꧊ꦪꦸꦱꦸꦥ꦳꧀ꦢꦶꦒꦮꦮꦺꦴꦁꦮꦺꦴꦁ​꧊ꦆꦱ꧀ꦩꦲꦺꦭ꧀ꦩꦼꦚꦁꦠꦤꦃ​꧊ꦩꦺꦱꦶꦂ꧈​ꦭꦤ꧀ꦢꦶꦠꦸꦏꦸ​꧊ꦥꦺꦴꦠꦶꦥ꦳ꦂ꧈​ꦏꦺꦴꦩꦤ꧀ꦝꦤ꧀ꦏꦼꦲꦩꦤ꧀ꦤꦤ꧀ꦏꦿꦠꦺꦴꦤ꧀꧉​

^39:2 ​꧊ꦪꦸꦱꦸꦥ꦳꧀ꦢꦶꦏꦤ꧀ꦛꦶꦢꦺꦤꦶꦁꦄꦭ꧀ꦭꦃ꧈​ꦔꦤ꧀ꦠꦶꦥꦼꦒꦮꦺꦪꦤ꧀ꦏꦸꦲꦥꦮꦲꦺꦱꦶꦁꦢꦶꦥꦱꦿꦃꦲꦏꦺ꧈​ꦧꦺꦫꦺꦱ꧀꧉​ꦝꦺꦮꦺꦏ꧀ꦏꦺꦩꦁꦒꦺꦴꦤ꧀ꦲꦶꦁꦲꦺꦴꦩꦃꦲꦺꦧꦼꦤ꧀ꦢꦫꦤꦺ꧉​

^39:3 ꦧꦉꦁꦮꦼꦫꦸꦃꦪꦺꦤ꧀​꧊ꦪꦸꦱꦸꦥ꦳꧀ꦩꦲꦸꦢꦶꦏꦤ꧀ꦛꦶꦢꦺꦤꦶꦁꦄꦭ꧀ꦭꦃꦭꦤ꧀ꦱꦫꦸꦥꦤꦶꦁꦥꦼꦒꦮꦺꦪꦤ꧀ꦏꦸꦱꦶꦁꦢꦶꦕꦼꦏꦼꦭ꧀ꦧꦺꦫꦺꦱ꧀꧈​

^39:4 ꦧꦼꦤ꧀ꦢꦫꦤꦺꦠꦽꦱ꧀ꦤꦏꦫꦺꦴ​꧊ꦪꦸꦱꦸꦥ꦳꧀ꦭꦤ꧀ꦢꦶꦥꦶꦠꦪꦔꦸꦫꦸꦱ꧀ꦱꦶꦲꦺꦴꦩꦃꦲꦺꦭꦤ꧀ꦧꦤ꧀ꦝꦤꦺꦏꦧꦺꦃ꧉​

^39:5 ꦮꦶꦮꦶꦠ꧀ꦮꦼꦏ꧀ꦠꦸꦏꦸꦮꦶꦒꦸꦱ꧀ꦠꦶꦄꦭ꧀ꦭꦃꦩ꧀ꦧꦼꦂꦏꦃꦲꦶꦧꦿꦪꦠ꧀ꦠꦺꦮꦺꦴꦁ​꧊ꦩꦺꦱꦶꦂꦩꦲꦸꦭꦤ꧀ꦧꦫꦁꦢꦂꦧꦺꦏ꧀ꦏꦺꦏꦧꦺꦃ꧈​ꦱꦶꦁꦲꦤꦲꦶꦁꦲꦺꦴꦩꦃꦭꦤ꧀ꦲꦶꦪꦱꦶꦁꦲꦤꦲꦶꦁꦥꦊꦩꦃꦲꦤ꧀ꦤꦺ꧈​ꦩꦼꦂꦒꦱꦏ​꧊ꦪꦸꦱꦸꦥ꦳꧀꧉​

^39:6 ꦏꦧꦺꦃꦧꦫꦁꦢꦂꦧꦺꦏ꧀ꦏꦺꦢꦶꦏꦺꦴꦤ꧀ꦔꦸꦫꦸꦱ꧀ꦱꦶ​꧊ꦪꦸꦱꦸꦥ꦳꧀꧈​ꦔꦤ꧀ꦠꦶ​꧊ꦥꦺꦴꦠꦶꦥ꦳ꦂꦮꦶꦱ꧀ꦲꦺꦴꦫꦩꦼꦫꦸꦃꦲꦶꦛꦼꦏ꧀ꦏ꧀ꦭꦶꦮꦼꦂꦫꦺꦔꦺꦴꦩꦃ꧈​ꦔꦼꦂꦠꦶꦤꦺꦩꦸꦁꦩꦁꦔꦤ꧀꧉​​꧊ꦪꦸꦱꦸꦥ꦳꧀ꦏꦸꦮꦶꦒꦒꦃꦭꦤ꧀ꦫꦸꦥꦤꦺꦧꦒꦸꦱ꧀꧉​

^39:7 ꦱꦸꦮꦺꦱꦸꦮꦺꦧꦺꦴꦗꦺꦴꦤꦺ​꧊ꦥꦺꦴꦠꦶꦥ꦳ꦂꦏꦱ꧀ꦩꦫꦤ꧀ꦏꦫꦺꦴ​꧊ꦪꦸꦱꦸꦥ꦳꧀꧈​ꦭꦤ꧀ꦤꦺꦴꦤꦺꦴꦩ꧀ꦩꦤ꧀ꦩꦲꦸꦢꦶꦧꦸꦗꦸꦏ꧀ꦢꦶꦲꦼꦗꦏ꧀ꦠꦸꦫꦸꦧꦼꦧꦉꦁꦔꦤ꧀꧉​

^39:8 ꦤꦁꦔꦶꦁ​꧊ꦪꦸꦱꦸꦥ꦳꧀ꦲꦺꦴꦫꦒꦼꦊꦩ꧀꧈​ꦥꦔꦸꦕꦥ꧀ꦥꦺ꧈​"ꦚꦸꦮꦸꦤ꧀ꦔꦥꦸꦤ꧀ꦠꦼꦤ꧀꧉​ꦧꦼꦤ꧀ꦢꦫꦏꦸꦭꦱꦩ꧀ꦥꦸꦤ꧀ꦩꦱꦿꦃꦲꦏꦼꦤ꧀ꦱꦼꦢꦪꦏꦒꦸꦁꦔꦤ꧀ꦤꦶꦥꦸꦤ꧀ꦝꦠꦼꦁꦏꦸꦭ꧈​ꦔꦤ꧀ꦠꦺꦴꦱ꧀ꦩ꧀ꦧꦺꦴꦠꦼꦤ꧀ꦩꦼꦁꦒꦭꦶꦃꦩꦼꦤꦥꦩꦼꦤꦥ꧉​

^39:9 ꦥꦔ꧀ꦮꦲꦺꦴꦱ꧀ꦏꦸꦭꦩ꧀ꦧꦺꦴꦠꦼꦤ꧀ꦧꦺꦢꦏꦭꦶꦪꦤ꧀ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀꧉​ꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦧꦫꦁꦱꦼꦠꦸꦁꦒꦭ꧀ꦏꦺꦩꦮꦺꦴꦤ꧀ꦲꦶꦁꦏꦁꦩ꧀ꦧꦺꦴꦠꦼꦤ꧀ꦏꦥꦱꦿꦃꦲꦏꦼꦤ꧀ꦝꦠꦼꦁꦥꦔ꧀ꦮꦲꦺꦴꦱ꧀ꦏꦸꦭ꧈​ꦏꦼꦗꦮꦶꦒꦂꦮꦤꦶꦥꦸꦤ꧀꧉​ꦩꦼꦤꦥꦏꦸꦭꦠꦼꦒꦼꦭ꧀ꦔ꧀ꦭꦩ꧀ꦥꦃꦲꦶꦥꦶꦪꦮꦺꦴꦤ꧀ꦏꦢꦺꦴꦱ꧀ꦩꦼꦏꦠ꧀ꦠꦼꦤ꧀ꦭꦤ꧀ꦢꦩꦼꦭ꧀ꦢꦺꦴꦱꦲꦶꦁꦔꦂꦱꦤꦶꦥꦸꦤ꧀ꦄꦭ꧀ꦭꦃ?"

^39:10 ꦱꦼꦤꦗꦤ꧀ꦱꦧꦼꦤ꧀ꦢꦶꦤꦢꦶꦧꦸꦗꦸꦏ꧀꧈​ꦤꦁꦔꦶꦁ​꧊ꦪꦸꦱꦸꦥ꦳꧀ꦠꦼꦠꦼꦥ꧀ꦲꦺꦴꦫꦒꦼꦊꦩ꧀ꦤꦁꦒꦥ꧀ꦥꦶ꧉​

^39:11 ꦲꦶꦁꦱꦮꦶꦗꦶꦤꦶꦁꦢꦶꦤꦤꦭꦶꦏꦩ꧀ꦭꦼꦧꦸꦔꦺꦴꦩꦃꦲꦉꦥ꧀ꦚꦩ꧀ꦧꦸꦠ꧀ꦒꦮꦺ꧈​ꦲꦶꦁꦚ꧀ꦗꦼꦫꦺꦴꦲꦺꦴꦩꦃꦏꦺꦴꦤꦺꦴꦥꦶꦤꦸꦗꦸꦲꦺꦴꦫꦲꦤꦮꦺꦴꦁ꧉​

^39:12 ꦧꦺꦴꦗꦺꦴꦤꦺ​꧊ꦥꦺꦴꦠꦶꦥ꦳ꦂꦧꦚ꧀ꦗꦸꦂꦔ꧀ꦒꦺꦴꦕꦺꦏ꧀ꦏꦶꦗꦸꦧꦃꦲꦺ​꧊ꦪꦸꦱꦸꦥ꦳꧀ꦏꦫꦺꦴꦕ꧀ꦭꦛꦸ꧈​"ꦲꦪꦺꦴꦠꦸꦫꦸꦏꦫꦺꦴꦲꦏꦸ꧉"​ꦤꦁꦔꦶꦁ​꧊ꦪꦸꦱꦸꦥ꦳꧀ꦩ꧀ꦧꦼꦫꦺꦴꦢ꧀ꦩ꧀ꦭꦪꦸ;ꦗꦸꦧꦃꦲꦺꦢꦶꦠꦶꦁꦒꦭ꧀ꦲꦤꦲꦶꦁꦠꦔꦤ꧀ꦤꦺꦧꦼꦤ꧀ꦢꦫꦤꦺ꧉​

^39:13 ꦧꦉꦁ​꧊ꦪꦸꦱꦸꦥ꦳꧀ꦩ꧀ꦭꦪꦸꦩꦼꦠꦸ꧈​ꦤꦶꦁꦒꦭ꧀ꦗꦸꦧꦃꦲꦺ꧈​

^39:14 ꦧꦺꦴꦗꦺꦴꦤꦺ​꧊ꦥꦺꦴꦠꦶꦥ꦳ꦂꦩꦲꦸꦚꦼꦭꦸꦏ꧀ꦏꦶꦧꦠꦸꦂꦧꦠꦸꦂꦫꦺꦏꦫꦺꦴꦕ꧀ꦭꦛꦸ꧈​"ꦢꦼꦊꦁꦔꦼꦤ꧀!ꦮꦺꦴꦁ​꧊ꦆꦧꦿꦤꦶꦱꦶꦁꦢꦶꦒꦮꦩꦿꦺꦤꦺꦧꦺꦴꦗꦺꦴꦏꦸꦏꦸꦮꦶꦲꦉꦥ꧀ꦱꦼꦩ꧀ꦧꦿꦤꦏꦫꦺꦴꦲꦏꦸ꧉​ꦝꦺꦮꦺꦏ꧀ꦏꦺꦩ꧀ꦭꦼꦧꦸꦲꦤꦲꦶꦁꦏꦩꦂꦏꦸ꧈​ꦲꦉꦥ꧀ꦩꦼꦏ꧀ꦱꦔꦸꦩ꧀ꦥꦸꦭ꧀ꦭꦶꦲꦏꦸ꧈​ꦤꦁꦔꦶꦁꦲꦏꦸꦤꦸꦭꦶꦕꦼꦭꦸꦏ꧀ꦕꦼꦭꦸꦏ꧀ꦱꦼꦫꦸ꧉​

^39:15 ꦧꦉꦁꦲꦏꦸꦕꦼꦭꦸꦏ꧀ꦕꦼꦭꦸꦏ꧀꧈​ꦝꦺꦮꦺꦏ꧀ꦏꦺꦧꦚ꧀ꦗꦸꦂꦩ꧀ꦭꦪꦸꦩꦼꦠꦸ꧈​ꦗꦸꦧꦃꦲꦺꦢꦶꦠꦶꦁꦒꦭ꧀ꦲꦤꦲꦶꦁꦱꦤ꧀ꦝꦶꦁꦏꦸ꧉"​

^39:16 ꦗꦸꦧꦃꦩꦲꦸꦢꦶꦱꦺꦭꦺꦃꦲꦏꦺꦲꦶꦁꦱꦤ꧀ꦝꦶꦁꦔꦺ꧈​ꦔꦤ꧀ꦠꦶꦱꦶꦁꦭꦤꦁꦠꦼꦏ꧉​

^39:17 ꦮꦺꦴꦁꦮꦢꦺꦴꦤ꧀ꦩꦲꦸꦧꦚ꧀ꦗꦸꦂꦔꦺꦴꦛꦏ꧀ꦲꦛꦶꦏ꧀ꦕꦿꦶꦠꦏꦪꦲꦶꦁꦔꦉꦥ꧀ꦩꦲꦸ꧈​ꦢꦶꦏꦤ꧀ꦝꦏ꧀ꦏꦏꦺꦏꦫꦺꦴꦧꦺꦴꦗꦺꦴꦤꦺ꧈​ꦠꦼꦩ꧀ꦧꦸꦁꦔꦺ꧈​"ꦠꦶꦪꦁ​꧊ꦆꦧꦿꦤꦶꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦧꦼꦏ꧀ꦠꦩꦿꦶꦏꦶꦩꦼꦤꦶꦏꦱꦩ꧀ꦥꦸꦤ꧀ꦩ꧀ꦭꦼꦧꦼꦠ꧀ꦏꦩꦂꦏꦸꦭ꧈​ꦧꦝꦺꦱꦼꦩ꧀ꦧꦿꦤꦏꦭꦶꦪꦤ꧀ꦏꦸꦭ꧉​

^39:18 ꦤꦁꦔꦶꦁꦏꦸꦭꦭꦗꦼꦁꦧꦼꦔꦺꦴꦏ꧀ꦧꦼꦔꦺꦴꦏ꧀꧉​ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦭꦗꦼꦁꦩ꧀ꦭꦗꦼꦁꦭꦤ꧀ꦤꦶꦭꦂꦗꦸꦧꦃꦲꦶꦥꦸꦤ꧀ꦲꦶꦁꦱꦤ꧀ꦝꦶꦁꦏꦸꦭ꧉"​

^39:19 ​꧊ꦥꦺꦴꦠꦶꦥ꦳ꦂꦩꦸꦤ꧀ꦠꦧ꧀꧉​

^39:20 ​꧊ꦪꦸꦱꦸꦥ꦳꧀ꦢꦶꦏꦺꦴꦤ꧀ꦚꦼꦏꦼꦭ꧀ꦭꦤ꧀ꦢꦶꦊꦧꦺꦴꦏ꧀ꦏꦏꦺꦲꦶꦁꦏꦸꦚ꧀ꦗꦂꦫꦤ꧀꧈​ꦥꦁꦒꦺꦴꦤ꧀ꦤꦤ꧀ꦤꦺꦥꦫꦥꦸꦁꦒꦮꦏꦿꦠꦺꦴꦤ꧀ꦱꦶꦁꦢꦶꦠꦲꦤ꧀꧉​​꧊ꦪꦸꦱꦸꦥ꦳꧀ꦲꦸꦒꦢꦶꦠꦲꦤ꧀ꦲꦤꦲꦶꦁꦏꦺꦴꦤꦺꦴ꧉​

^39:21 ꦤꦁꦔꦶꦁ​꧊ꦪꦸꦱꦸꦥ꦳꧀ꦢꦶꦏꦤ꧀ꦛꦶꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦢꦶꦧꦼꦂꦏꦃꦲꦶ꧈​ꦩꦸꦭꦏꦼꦥꦭꦤꦺꦏꦸꦚ꧀ꦗꦂꦫꦤ꧀ꦏꦺꦴꦤꦺꦴꦠꦽꦱ꧀ꦤꦏꦫꦺꦴꦝꦺꦮꦺꦏ꧀ꦏꦺ꧉​

^39:22 ​꧊ꦪꦸꦱꦸꦥ꦳꧀ꦢꦶꦢꦢꦺꦏ꧀ꦏꦏꦺꦭꦸꦫꦃꦲꦺꦮꦺꦴꦁꦮꦺꦴꦁꦠꦲꦤ꧀ꦤꦤ꧀ꦭꦶꦪꦤꦺ꧈​ꦭꦤ꧀ꦢꦶꦥꦱꦿꦃꦲꦶꦥꦼꦒꦮꦺꦪꦤ꧀ꦏꦸꦏꦧꦺꦃꦱꦶꦁꦲꦤꦲꦶꦁꦏꦸꦚ꧀ꦗꦂꦫꦤ꧀ꦏꦺꦴꦤꦺꦴ꧉​

^39:23 ꦏꦼꦥꦭꦤꦺꦏꦸꦚ꧀ꦗꦂꦫꦤ꧀ꦮꦶꦱ꧀ꦲꦺꦴꦫꦥꦽꦭꦸꦔꦮꦠ꧀ꦲꦮꦠ꧀ꦠꦶꦲꦥꦱꦶꦁꦢꦶꦥꦱꦿꦃꦲꦏꦺꦩꦫꦁ​꧊ꦪꦸꦱꦸꦥ꦳꧀꧉​ꦩꦼꦂꦒꦢꦶꦏꦤ꧀ꦛꦶꦢꦺꦤꦶꦁꦄꦭ꧀ꦭꦃ꧈​ꦥꦼꦒꦮꦺꦪꦤ꧀ꦏꦸꦲꦥꦮꦲꦺꦱꦶꦁꦢꦶꦕꦼꦏꦼꦭ꧀​꧊ꦪꦸꦱꦸꦥ꦳꧀꧈​ꦧꦺꦫꦺꦱ꧀꧉​