Jv/Alkitab/Purwaning Dumadi/40

^40:1 ꦊꦠ꧀ꦱꦮꦼꦠꦫꦩꦁꦱꦲꦤꦥꦼꦒꦮꦺꦥꦼꦒꦮꦺꦏꦿꦠꦺꦴꦤ꧀ꦭꦺꦴꦫꦺꦴꦢꦶꦠꦲꦤ꧀ꦩꦼꦂꦒꦏꦼꦭꦸꦥꦸꦠ꧀ꦠꦤ꧀ꦏꦫꦺꦴꦱꦁꦥꦿꦧꦸ꧉​ꦱꦶꦁꦱꦶꦗꦶꦗꦸꦫꦸꦩꦶꦤꦸꦩ꧀ꦩꦤ꧀꧈​ꦪꦏꦸꦮꦶꦮꦺꦴꦁꦱꦶꦁꦏꦥꦱꦿꦃꦲꦤ꧀ꦔꦸꦫꦸꦱ꧀ꦱꦶꦲꦸꦚ꧀ꦗꦸꦏ꧀ꦏꦤ꧀ꦤꦺꦱꦁꦥꦿꦧꦸ꧈​ꦱꦶꦗꦶꦤꦺꦗꦸꦫꦸꦝꦲꦂꦫꦤ꧀꧈​ꦪꦏꦸꦮꦶꦮꦺꦴꦁꦱꦶꦁꦏꦥꦱꦿꦃꦲꦤ꧀ꦔꦸꦫꦸꦱ꧀ꦱꦶꦝꦲꦂꦫꦤ꧀꧉​

^40:2 ꦱꦁꦥꦿꦧꦸꦢꦸꦏꦧꦔꦼꦠ꧀ꦏꦫꦺꦴꦮꦺꦴꦁꦭꦺꦴꦫꦺꦴꦩꦲꦸ꧈​

^40:3 ꦩꦸꦭꦝꦮꦸꦃꦱꦸꦥꦪꦥꦝꦢꦶꦠꦲꦤ꧀ꦲꦶꦁꦏꦸꦚ꧀ꦗꦂꦫꦤ꧀ꦏꦿꦠꦺꦴꦤ꧀꧈​ꦥꦁꦒꦺꦴꦤ꧀ꦤꦤ꧀ꦤꦺ​꧊ꦪꦸꦱꦸꦥ꦳꧀ꦢꦶꦠꦲꦤ꧀꧉​

^40:4 ꦲꦤꦲꦶꦁꦏꦸꦚ꧀ꦗꦂꦫꦤ꧀ꦏꦺꦴꦤꦺꦴꦫꦢꦱꦸꦮꦺ꧈​ꦭꦤ꧀ꦏꦼꦥꦭꦏꦸꦚ꧀ꦗꦂꦫꦤ꧀ꦥꦿꦺꦤ꧀ꦠꦃꦩꦫꦁ​꧊ꦪꦸꦱꦸꦥ꦳꧀ꦔ꧀ꦭꦢꦺꦤ꧀ꦤꦶꦠꦲꦤ꧀ꦤꦤ꧀ꦭꦺꦴꦫꦺꦴꦩꦲꦸ꧉​

^40:5 ꦲꦶꦁꦱꦮꦶꦗꦶꦤꦶꦁꦧꦼꦔꦶ꧈​ꦮꦺꦴꦁꦭꦺꦴꦫꦺꦴꦩꦲꦸꦥꦝꦔꦶꦩ꧀ꦥꦶ꧉​ꦲꦶꦩ꧀ꦥꦺꦤ꧀ꦤꦺꦧꦺꦢꦧꦺꦢ꧉​

^40:6 ꦤꦭꦶꦏꦲꦺꦱꦸꦏ꧀ꦏꦺ​꧊ꦪꦸꦱꦸꦥ꦳꧀ꦠꦼꦏ꧈​ꦮꦺꦴꦁꦭꦺꦴꦫꦺꦴꦩꦲꦸꦲꦸꦭꦠ꧀ꦠꦺꦏꦠꦺꦴꦤ꧀ꦱꦸꦤ꧀ꦠꦿꦸꦠ꧀꧉​

^40:7 ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦠꦏꦺꦴꦤ꧀꧈​"ꦏꦺꦴꦏ꧀ꦏꦼꦠꦶꦔꦭ꧀ꦱꦼꦝꦶꦃ꧉​ꦩꦤꦥꦲꦶꦁꦏꦁꦢꦶꦥꦸꦤ꧀ꦫꦲꦺꦴꦱ꧀ꦱꦏꦼꦤ꧀?"

^40:8 ꦮꦁꦱꦸꦭ꧀ꦭꦤ꧀ꦤꦺ꧈​"ꦝꦺꦏ꧀ꦧꦼꦔꦶꦲꦏꦸꦥꦝꦔꦶꦩ꧀ꦥꦶ꧈​ꦤꦁꦔꦶꦁꦲꦶꦁꦏꦺꦤꦺꦲꦺꦴꦫꦲꦤꦮꦺꦴꦁꦱꦶꦁꦧꦶꦱꦤꦼꦫꦁꦔꦏꦺꦠꦼꦒꦼꦱ꧀ꦱꦺ꧉"​ꦕ꧀ꦭꦛꦸꦤꦺ​꧊ꦪꦸꦱꦸꦥ꦳꧀꧈​"ꦏꦸꦭꦏꦶꦤ꧀ꦠꦼꦤ꧀ꦤꦩꦸꦁꦒꦸꦱ꧀ꦠꦶꦄꦭ꧀ꦭꦃꦥꦶꦪꦩ꧀ꦧꦏ꧀ꦲꦶꦁꦏꦁꦩꦫꦶꦁꦔꦶꦏꦼꦱꦒꦼꦢ꧀ꦢꦤ꧀ꦤꦼꦫꦁꦔꦏꦼꦤ꧀ꦠꦼꦒꦼꦱ꧀ꦱꦶꦥꦸꦤ꧀ꦲꦶꦩ꧀ꦥꦺꦤ꧀꧉​ꦕꦺꦴꦧꦶꦥꦚ꧀ꦗꦼꦤꦼꦁꦔꦤ꧀ꦕꦫꦶꦪꦺꦴꦱ꧀ꦱꦏꦼꦤ꧀ꦲꦶꦩ꧀ꦥꦺꦤ꧀ꦥꦚ꧀ꦗꦼꦤꦼꦁꦔꦤ꧀꧉"​

^40:9 ꦗꦸꦫꦸꦩꦶꦤꦸꦩ꧀ꦩꦤ꧀ꦧꦚ꧀ꦗꦸꦂꦚꦿꦶꦠꦏ꧀ꦏꦏꦺꦲꦶꦩ꧀ꦥꦺꦤ꧀ꦤꦺ꧈​"ꦤꦺꦁꦏꦤꦤꦺꦏꦪꦏꦪꦲꦶꦁꦔꦉꦥ꧀ꦏꦸꦲꦤꦮꦶꦠ꧀ꦲꦁꦒꦸꦂ꧉​

^40:10 ꦲꦤꦥꦁꦔꦺꦠꦼꦭꦸ꧉​ꦧꦉꦁꦒꦺꦴꦝꦺꦴꦁꦔꦺꦥꦝꦠꦿꦸꦧꦸꦱ꧀꧈​ꦧꦚ꧀ꦗꦸꦂꦩꦼꦠꦸꦏꦼꦩ꧀ꦧꦁꦔꦺ꧈​ꦱꦂꦠꦩꦼꦠꦸꦮꦺꦴꦃꦲꦺ꧈​ꦩꦠꦼꦁꦩꦠꦼꦁ꧉​

^40:11 ꦏꦪꦤꦺꦲꦏꦸꦭꦒꦶꦚꦼꦏꦼꦭ꧀ꦭꦶꦒꦼꦭꦱ꧀ꦲꦸꦚ꧀ꦗꦸꦏ꧀ꦏꦤ꧀ꦤꦺꦱꦁꦥꦿꦧꦸ꧉​ꦲꦏꦸꦧꦚ꧀ꦗꦸꦂꦩꦼꦛꦶꦏ꧀ꦮꦺꦴꦃꦲꦁꦒꦸꦂꦩꦲꦸ꧈​ꦤꦸꦭꦶꦢꦏ꧀ꦥꦼꦉꦱ꧀ꦲꦤꦲꦶꦁꦒꦼꦭꦱ꧀꧈​ꦱꦂꦠꦢꦏ꧀ꦱꦲꦺꦴꦱ꧀ꦱꦏꦺꦱꦁꦥꦿꦧꦸ꧉"​

^40:12 ​꧊ꦪꦸꦱꦸꦥ꦳꧀ꦤꦸꦭꦶꦩꦁꦱꦸꦭ꧀ꦭꦶ꧈​"ꦩꦼꦤꦶꦏꦗꦂꦮꦤꦶꦥꦸꦤ꧀ꦩꦼꦏꦠ꧀ꦠꦼꦤ꧀:ꦥꦁꦠꦶꦒꦩꦼꦤꦶꦏꦠꦼꦒꦼꦱ꧀ꦱꦶꦥꦸꦤ꧀ꦠꦶꦒꦁꦢꦶꦤ꧀ꦠꦼꦤ꧀꧉​

^40:13 ꦱꦊꦧꦼꦠ꧀ꦠꦶꦁꦠꦶꦒꦁꦢꦶꦤ꧀ꦠꦼꦤ꧀ꦩꦼꦤꦶꦏꦱꦁꦥꦿꦧꦸꦧꦝꦺꦔ꧀ꦭꦸꦮꦂꦫꦶꦥꦚ꧀ꦗꦼꦤꦼꦁꦔꦤ꧀꧉​ꦥꦚ꧀ꦗꦼꦤꦼꦁꦔꦤ꧀ꦧꦝꦺꦏꦮꦁꦱꦸꦭ꧀ꦭꦏꦼꦤ꧀ꦝꦠꦼꦁꦥꦼꦢꦩꦼꦭ꧀ꦭꦤ꧀ꦥꦚ꧀ꦗꦼꦤꦼꦁꦔꦤ꧀ꦩꦭꦶꦃ꧈​ꦔ꧀ꦭꦢꦺꦴꦱ꧀ꦱꦶꦲꦸꦚ꧀ꦗꦸꦏ꧀ꦏꦤ꧀ꦤꦶꦥꦸꦤ꧀ꦱꦁꦥꦿꦧꦸꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦱꦩ꧀ꦥꦸꦤ꧀꧉​

^40:14 ꦤꦩꦸꦁꦩꦼꦤꦮꦶꦱꦩ꧀ꦥꦸꦤ꧀ꦮꦁꦱꦸꦭ꧀ꦩꦭꦶꦃꦝꦠꦼꦁꦥꦼꦢꦩꦼꦭ꧀ꦭꦤ꧀ꦥꦚ꧀ꦗꦼꦤꦼꦁꦔꦤ꧀꧈​ꦱꦩ꧀ꦥꦸꦤ꧀ꦏꦼꦱꦸꦥꦺꦤ꧀ꦝꦠꦼꦁꦏꦸꦭ꧉​ꦥꦚ꧀ꦗꦼꦤꦼꦁꦔꦤ꧀ꦔꦠꦸꦂꦫꦤꦥꦶꦂꦱꦝꦠꦼꦁꦱꦁꦥꦿꦧꦸꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦏꦸꦭ꧈​ꦱꦂꦠꦏꦸꦭꦏꦱꦸꦮꦸꦤ꧀ꦤꦭꦸꦮꦂꦱꦏꦶꦁꦏꦸꦚ꧀ꦗꦂꦫꦤ꧀ꦩꦼꦤꦶꦏ꧉​

^40:15 ꦏꦸꦭꦩꦼꦤꦶꦏꦊꦉꦱ꧀ꦱꦶꦥꦸꦤ꧀ꦢꦶꦥꦸꦤ꧀ꦕꦸꦭꦶꦏ꧀ꦱꦏꦶꦁꦧꦁꦱꦏꦸꦭ꧈​ꦲꦶꦁꦒꦶꦃꦩꦼꦤꦶꦏꦧꦁꦱ​꧊ꦆꦧꦿꦤꦶ꧉​ꦭꦤ꧀ꦲꦶꦁꦠꦤꦃ​꧊ꦩꦺꦱꦶꦂꦔꦿꦶꦏꦶꦏꦸꦭꦩ꧀ꦧꦺꦴꦠꦼꦤ꧀ꦤꦠꦺꦔ꧀ꦭꦩ꧀ꦥꦃꦲꦶꦥꦶꦪꦮꦺꦴꦤ꧀꧈​ꦲꦶꦁꦏꦁꦥꦤ꧀ꦠꦼꦱ꧀ꦏꦲꦸꦏꦸꦩ꧀ꦲꦶꦁꦏꦸꦚ꧀ꦗꦂꦫꦤ꧀꧉"​

^40:16 ꦧꦉꦁꦏꦿꦸꦔꦸꦪꦺꦤ꧀ꦲꦶꦩ꧀ꦥꦺꦤ꧀ꦤꦺꦗꦸꦫꦸꦩꦶꦤꦸꦩ꧀ꦩꦤ꧀ꦩꦲꦸꦩꦏ꧀ꦤꦤꦺꦧꦼꦕꦶꦏ꧀꧈​ꦗꦸꦫꦸꦝꦲꦂꦫꦤ꧀ꦧꦚ꧀ꦗꦸꦂꦚꦿꦶꦠꦏ꧀ꦏꦏꦺꦲꦶꦩ꧀ꦥꦺꦤ꧀ꦤꦺꦩꦫꦁ​꧊ꦪꦸꦱꦸꦥ꦳꧀:"ꦲꦏꦸꦲꦶꦪꦔꦶꦩ꧀ꦥꦶ꧉​ꦲꦤꦲꦶꦁꦏꦤꦤꦺꦲꦏꦸꦭꦒꦶꦚꦸꦁꦒꦶꦠꦺꦤꦺꦴꦁꦠꦼꦭꦸꦲꦶꦱꦶꦝꦲꦂꦫꦤ꧀꧉​

^40:17 ꦠꦺꦤꦺꦴꦁꦱꦶꦁꦤ꧀ꦝꦸꦮꦸꦂꦝꦺꦮꦺꦲꦶꦱꦶꦝꦲꦂꦫꦤ꧀ꦫꦸꦥꦫꦸꦥꦏꦒꦼꦩ꧀ꦱꦁꦥꦿꦧꦸ꧈​ꦤꦁꦔꦶꦁꦝꦲꦂꦫꦤ꧀ꦩꦲꦸꦢꦶꦛꦺꦴꦛꦺꦴꦭ꧀ꦭꦶꦩꦤꦸꦏ꧀ꦩꦤꦸꦏ꧀꧉"​

^40:18 ꦮꦁꦱꦸꦭ꧀ꦭꦤ꧀ꦤꦺ​꧊ꦪꦸꦱꦸꦥ꦳꧀꧈​"ꦗꦂꦮꦤꦶꦥꦸꦤ꧀ꦲꦶꦩ꧀ꦥꦺꦤ꧀ꦩꦼꦤꦶꦏꦩꦼꦏꦠ꧀ꦠꦼꦤ꧀:ꦠꦺꦤꦺꦴꦁꦠꦶꦒꦩꦼꦤꦶꦏꦠꦼꦒꦼꦱ꧀ꦱꦶꦥꦸꦤ꧀ꦠꦶꦒꦁꦢꦶꦤ꧀ꦠꦼꦤ꧀꧉​

^40:19 ꦠꦶꦒꦁꦢꦶꦤ꧀ꦠꦼꦤ꧀ꦩꦭꦶꦃꦱꦁꦥꦿꦧꦸꦧꦝꦺꦲꦸꦠꦸꦱ꧀ꦱꦤ꧀ꦤꦶꦒꦱ꧀ꦒꦸꦭꦸꦥꦚ꧀ꦗꦼꦤꦼꦁꦔꦤ꧀꧉​ꦧꦢꦤ꧀ꦥꦚ꧀ꦗꦼꦤꦼꦁꦔꦤ꧀ꦧꦝꦺꦢꦶꦥꦸꦤ꧀ꦒꦤ꧀ꦠꦸꦁꦭꦤ꧀ꦢꦢꦺꦴꦱ꧀ꦠꦼꦝꦤ꧀ꦤꦶꦥꦸꦤ꧀ꦥꦼꦏ꧀ꦱꦶꦥꦼꦏ꧀ꦱꦶ꧉"​

^40:20 ꦊꦠ꧀ꦠꦼꦭꦸꦁꦢꦶꦤ꧈​ꦪꦏꦸꦮꦶꦢꦶꦤꦮꦶꦪꦺꦴꦱ꧀ꦱꦤ꧀ꦤꦺꦱꦁꦥꦿꦧꦸ꧈​ꦥꦚ꧀ꦗꦼꦤꦼꦁꦔꦤ꧀ꦤꦺꦔꦤꦏ꧀ꦏꦏꦺꦏꦿꦩꦺꦪꦤ꧀ꦒꦼꦝꦺꦤ꧀ꦏꦁꦒꦺꦴꦥꦫꦲꦧ꧀ꦢꦶꦏꦧꦺꦃ꧉​ꦗꦸꦫꦸꦩꦶꦤꦸꦩ꧀ꦩꦤ꧀ꦭꦤ꧀ꦗꦸꦫꦸꦝꦲꦂꦫꦤ꧀ꦢꦶꦝꦮꦸꦃꦲꦶꦩꦼꦠꦺꦴꦏ꧀ꦏꦏꦺꦱꦏꦲꦶꦁꦏꦸꦚ꧀ꦗꦂꦫꦤ꧀꧈​ꦢꦶꦒꦮꦲꦤꦲꦶꦁꦔꦉꦥ꧀ꦥꦺꦥꦫꦲꦧ꧀ꦢꦶꦏꦿꦠꦺꦴꦤ꧀ꦏꦧꦺꦃ꧉​

^40:21 ꦗꦸꦫꦸꦩꦶꦤꦸꦩ꧀ꦩꦤ꧀ꦢꦶꦧꦭꦺꦏ꧀ꦏꦏꦺꦲꦶꦁꦥꦼꦒꦮꦺꦪꦤ꧀ꦤꦺꦩꦼꦤꦺꦃ꧈​

^40:22 ꦤꦁꦔꦶꦁꦗꦸꦫꦸꦝꦲꦂꦫꦤ꧀ꦢꦶꦲꦸꦏꦸꦩ꧀ꦥꦠꦶ꧉​ꦏꦼꦭꦏꦺꦴꦤꦺꦩꦲꦸꦏꦧꦺꦃꦕꦺꦥ꧀ꦭꦼꦱ꧀ꦏꦫꦺꦴꦱꦶꦁꦢꦶꦏꦤ꧀ꦝꦏ꧀ꦏꦏꦺ​꧊ꦪꦸꦱꦸꦥ꦳꧀꧉​

^40:23 ꦤꦁꦔꦶꦁꦗꦸꦫꦸꦩꦶꦤꦸꦩ꧀ꦩꦤ꧀ꦲꦺꦴꦫꦏꦺꦭꦶꦁꦔꦤ꧀ꦩꦫꦁ​꧊ꦪꦸꦱꦸꦥ꦳꧀꧈​ꦮꦶꦱ꧀ꦭꦭꦶꦧꦧꦂꦥꦶꦱꦤ꧀꧉​