Jv/Alkitab/Purwaning Dumadi/41

^41:1 ꦊꦠ꧀ꦫꦺꦴꦁꦠꦲꦸꦤ꧀ꦱꦁꦥꦿꦶꦔꦺꦴꦤ꧀ꦔꦶꦩ꧀ꦥꦶ꧈​ꦏꦪꦏꦪꦭꦒꦶꦗꦸꦩꦼꦤꦼꦁꦲꦶꦁꦱꦥꦶꦁꦒꦶꦂꦫꦶꦁꦧꦼꦔꦮꦤ꧀​꧊ꦤꦶꦭ꧀꧉​

^41:2 ꦢꦸꦩꦢꦏ꧀ꦏꦤ꧀ꦲꦤꦱꦥꦶꦊꦩꦸꦊꦩꦸ꧈​ꦏꦸꦭꦶꦠ꧀ꦠꦺꦏ꧀ꦭꦶꦩꦶꦱ꧀꧈​ꦗꦸꦩꦼꦝꦸꦭ꧀ꦱꦏꦏꦭꦶ;ꦧꦚ꧀ꦗꦸꦂꦚꦼꦁꦒꦸꦠ꧀ꦱꦸꦏꦼꦠ꧀ꦲꦶꦁꦱꦥꦶꦁꦒꦶꦂꦫꦺꦏꦭꦶꦩꦲꦸ꧉​

^41:3 ꦲꦺꦴꦫꦊꦠ꧀ꦱꦸꦮꦺꦲꦤꦱꦥꦶꦥꦶꦠꦸꦭꦶꦪꦤꦺꦲꦸꦒꦗꦸꦩꦼꦝꦸꦭ꧀꧈​ꦤꦁꦔꦶꦁꦏꦸꦫꦸꦏꦸꦫꦸ꧈​ꦥꦽꦱꦱꦠ꧀ꦩꦸꦁꦧꦭꦸꦁꦏꦫꦺꦴꦏꦸꦭꦶꦠ꧀꧉​ꦥꦝꦔꦢꦼꦒ꧀ꦲꦶꦁꦱꦤ꧀ꦝꦶꦁꦔꦺꦱꦥꦶꦱꦥꦶꦱꦶꦁꦊꦩꦸꦊꦩꦸꦩꦲꦸ꧉​

^41:4 ꦱꦥꦶꦱꦶꦁꦏꦸꦫꦸꦏꦸꦫꦸꦩꦲꦸꦤꦸꦭꦶꦩꦁꦔꦤ꧀ꦱꦥꦶꦱꦶꦁꦊꦩꦸꦊꦩꦸ꧉​ꦱꦁꦥꦿꦧꦸꦧꦚ꧀ꦗꦸꦂꦔ꧀ꦭꦶꦭꦶꦂ;

^41:5 ꦤꦁꦔꦶꦁꦧꦚ꧀ꦗꦸꦂꦧꦭꦶꦱꦫꦺꦭꦤ꧀ꦔꦶꦩ꧀ꦥꦶꦩꦼꦤꦺꦃ꧉​ꦤꦺꦁꦏꦤꦤꦺꦥꦶꦂꦱꦲꦤꦮꦸꦭꦺꦤ꧀ꦒꦤ꧀ꦢꦸꦩ꧀ꦥꦶꦠꦸ꧈​ꦲꦲꦺꦴꦱ꧀ꦲꦲꦺꦴꦱ꧀꧈​ꦠꦸꦂꦠꦸꦮꦠꦸꦮ꧈​ꦗꦸꦩꦼꦝꦸꦭ꧀ꦱꦏꦢꦩꦺꦤ꧀ꦱꦶꦗꦶ꧉​

^41:6 ꦧꦚ꧀ꦗꦸꦂꦲꦤꦮꦸꦭꦺꦤ꧀ꦥꦶꦠꦸꦭꦶꦪꦤꦺ꧈​ꦱꦶꦁꦒꦧꦸꦒ꧀ꦭꦤ꧀ꦒꦼꦱꦼꦁ꧈​ꦏꦪꦤꦺꦏꦼꦧꦿꦔꦱ꧀ꦢꦺꦤꦶꦁꦲꦔꦶꦤ꧀ꦱꦏꦲꦶꦁꦱꦼꦒꦫꦮꦼꦝꦶ꧉​

^41:7 ꦮꦸꦭꦺꦤ꧀ꦒꦤ꧀ꦢꦸꦩ꧀ꦱꦶꦁꦒꦧꦸꦒ꧀ꦧꦚ꧀ꦗꦸꦂꦚꦥ꧀ꦭꦺꦴꦏ꧀ꦮꦸꦭꦺꦤ꧀ꦒꦤ꧀ꦢꦸꦩ꧀ꦱꦶꦁꦩꦼꦤ꧀ꦠꦼꦱ꧀꧌ꦲꦲꦺꦴꦱ꧀꧍꧉​ꦱꦁꦥꦿꦧꦸꦤꦸꦭꦶꦔ꧀ꦭꦶꦭꦶꦂꦭꦤ꧀ꦥꦶꦂꦱꦪꦺꦤ꧀ꦩꦸꦁꦔꦶꦩ꧀ꦥꦶ꧉​

^41:8 ꦲꦺꦱꦸꦏ꧀ꦏꦺꦱꦁꦥꦿꦧꦸꦲꦺꦴꦫꦏꦼꦥꦺꦤꦏ꧀ꦥꦼꦁꦒꦭꦶꦃꦲꦺ꧈​ꦩꦸꦭꦤꦺꦧꦚ꧀ꦗꦸꦂꦝꦮꦸꦃꦤꦶꦩ꧀ꦧꦭ꧀ꦭꦶꦱꦏꦺꦃꦲꦺꦠꦸꦏꦁꦱꦶꦲꦶꦂꦭꦤ꧀ꦥꦫꦲꦸꦭꦩꦱꦠꦤꦃ​꧊ꦩꦺꦱꦶꦂ꧉​ꦲꦶꦩ꧀ꦥꦺꦤ꧀ꦤꦺꦤꦸꦭꦶꦢꦶꦕꦿꦶꦠꦏ꧀ꦏꦏꦺ꧈​ꦤꦁꦔꦶꦁꦲꦺꦴꦫꦲꦤꦮꦺꦴꦁꦱꦶꦗꦶꦮꦲꦺꦱꦶꦁꦧꦶꦱꦤꦼꦫꦁꦔꦏꦺꦠꦼꦒꦼꦱ꧀ꦱꦺ꧉​

^41:9 ꦗꦸꦫꦸꦩꦶꦤꦸꦩ꧀ꦩꦤ꧀ꦩꦠꦸꦂꦩꦫꦁꦱꦁꦥꦿꦧꦸ꧈​"ꦱꦩꦁꦏꦺꦏꦸꦭꦧꦝꦺꦧ꧀ꦭꦏ꧈​ꦧꦶꦭꦶꦃꦏꦸꦭꦤꦠꦺꦔ꧀ꦭꦩ꧀ꦥꦃꦲꦶꦲꦶꦁꦏꦁꦩ꧀ꦧꦺꦴꦠꦼꦤ꧀ꦊꦉꦱ꧀꧉​

^41:10 ꦱꦁꦥꦿꦧꦸꦤꦭꦶꦏꦱꦼꦩꦤ꧀ꦠꦼꦤ꧀ꦢꦸꦏꦝꦠꦼꦁꦗꦸꦫꦸꦝꦲꦂꦫꦤ꧀ꦭꦤ꧀ꦝꦠꦼꦁꦏꦸꦭ꧈​ꦭꦗꦼꦁꦤ꧀ꦝꦮꦸꦃꦲꦏꦼꦤ꧀ꦱꦸꦥꦢꦺꦴꦱ꧀ꦏꦸꦭꦏꦼꦏꦭꦶꦃꦢꦶꦥꦸꦤ꧀ꦏꦸꦚ꧀ꦗꦂꦫꦲꦶꦁꦒꦿꦶꦪꦤꦶꦥꦸꦤ꧀ꦏꦺꦴꦩꦤ꧀ꦝꦤ꧀ꦏꦼꦲꦩꦤ꧀ꦤꦤ꧀ꦏꦿꦠꦺꦴꦤ꧀꧉​

^41:11 ꦲꦶꦁꦱꦼꦠꦸꦁꦒꦭ꧀ꦭꦶꦁꦢꦭꦸꦏꦸꦭꦏꦼꦏꦭꦶꦃꦱꦩꦶꦔꦶꦩ꧀ꦥꦶ꧈​ꦲꦶꦁꦏꦁꦒꦝꦃꦠꦼꦒꦼꦱ꧀ꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀꧉​

^41:12 ꦲꦶꦁꦏꦸꦚ꧀ꦗꦂꦫꦔꦿꦶꦏꦸꦮꦺꦴꦤ꧀ꦠꦼꦤ꧀ꦤꦺꦤꦺꦩ꧀ꦩꦤ꧀​꧊ꦆꦧꦿꦤꦶ꧈​ꦫꦺꦚ꧀ꦕꦁꦔꦶꦥꦸꦤ꧀ꦏꦺꦴꦩꦤ꧀ꦝꦤ꧀ꦏꦼꦲꦩꦤ꧀ꦤꦤ꧀ꦏꦿꦠꦺꦴꦤ꧀꧉​ꦏꦸꦭꦏꦼꦏꦭꦶꦃꦚꦿꦶꦪꦺꦴꦱ꧀ꦱꦏꦼꦤ꧀ꦲꦶꦩ꧀ꦥꦺꦤ꧀ꦏꦸꦭꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀ꦝꦠꦼꦁꦤꦺꦤꦺꦩ꧀ꦩꦤ꧀ꦮꦲꦸ꧈​ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦭꦗꦼꦁꦤꦼꦫꦁꦔꦏꦼꦤ꧀ꦩꦏ꧀ꦤꦤꦶꦥꦸꦤ꧀꧉​

^41:13 ꦱꦼꦢꦪꦏꦼꦭꦩ꧀ꦥꦃꦲꦤ꧀ꦏꦢꦺꦴꦱ꧀ꦲꦶꦁꦏꦁꦢꦶꦥꦸꦤ꧀ꦠꦼꦫꦁꦔꦏꦼꦤ꧀꧈​ꦲꦶꦁꦒꦶꦃꦩꦼꦤꦶꦏ꧈​ꦧꦶꦭꦶꦃꦱꦁꦥꦿꦧꦸꦧꦝꦺꦩꦁꦱꦸꦭ꧀ꦭꦏꦼꦤ꧀ꦏꦸꦭꦝꦠꦼꦁꦥꦼꦢꦩꦼꦭ꧀ꦭꦤ꧀ꦏꦸꦭꦩꦭꦶꦃ꧈​ꦤꦁꦔꦶꦁꦔꦸꦏꦸꦩ꧀ꦥꦼꦗꦃꦗꦸꦫꦸꦝꦲꦂꦫꦤ꧀꧉"​

^41:14 ꦱꦁꦥꦿꦧꦸꦧꦚ꧀ꦗꦸꦂꦲꦸꦠꦸꦱ꧀ꦱꦤ꧀ꦤꦶꦩ꧀ꦧꦭ꧀ꦭꦶ​꧊ꦪꦸꦱꦸꦥ꦳꧀꧈​ꦭꦤ꧀ꦱꦤꦭꦶꦏꦲꦶꦏꦸꦲꦸꦒꦢꦶꦮꦼꦠꦺꦴꦏ꧀ꦏꦏꦺꦱꦏꦏꦸꦚ꧀ꦗꦂꦫꦤ꧀꧉​ꦱꦮꦶꦱ꧀ꦱꦺꦕꦸꦏꦸꦂꦭꦤ꧀ꦱꦭꦶꦤ꧀ꦥꦼꦔꦁꦒꦺꦴ꧈​​꧊ꦪꦸꦱꦸꦥ꦳꧀ꦤꦸꦭꦶꦱꦺꦴꦮꦤ꧀ꦲꦶꦁꦔꦂꦱꦤꦺꦱꦁꦥꦿꦶꦔꦺꦴꦤ꧀꧉​

^41:15 ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦪꦸꦱꦸꦥ꦳꧀꧈​"ꦲꦏꦸꦔꦶꦩ꧀ꦥꦶ꧈​ꦤꦁꦔꦶꦁꦲꦺꦴꦫꦲꦤꦮꦺꦴꦁꦱꦶꦁꦧꦶꦱꦤꦼꦫꦁꦔꦏꦺꦩꦏ꧀ꦤꦤꦺ꧉​ꦲꦏꦸꦢꦶꦏꦤ꧀ꦝꦤꦶꦮꦺꦴꦁ꧈​ꦪꦺꦤ꧀ꦏꦺꦴꦮꦺꦧꦶꦱꦤꦼꦫꦁꦔꦏꦺꦲꦶꦩ꧀ꦥꦺꦤ꧀꧉"​

^41:16 ꦮꦁꦱꦸꦭ꧀ꦭꦤ꧀ꦤꦺ​꧊ꦪꦸꦱꦸꦥ꦳꧀꧈​"ꦱꦤꦺꦱ꧀ꦏꦸꦭꦒꦸꦱ꧀ꦠꦶ꧈​ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦥꦶꦪꦩ꧀ꦧꦏ꧀ꦲꦶꦁꦏꦁꦧꦝꦺꦩꦫꦶꦁꦔꦶꦏꦼꦠꦿꦔꦤ꧀꧉"​

^41:17 ꦱꦁꦥꦿꦧꦸꦧꦚ꧀ꦗꦸꦂꦔꦤ꧀ꦢꦶꦏ꧈​"ꦲꦶꦁꦱꦗꦿꦺꦴꦤꦶꦁꦲꦶꦩ꧀ꦥꦺꦤ꧀ꦏꦸꦩꦲꦸꦏꦪꦏꦪꦲꦏꦸꦭꦒꦶꦔꦢꦼꦒ꧀ꦲꦶꦁꦥꦶꦁꦒꦶꦂꦧꦼꦔꦮꦤ꧀​꧊ꦤꦶꦭ꧀꧉​

^41:18 ꦱꦏꦏꦭꦶꦩꦲꦸꦧꦚ꧀ꦗꦸꦂꦗꦸꦩꦼꦝꦸꦭ꧀ꦱꦥꦶꦥꦶꦠꦸꦱꦶꦁꦊꦩꦸꦊꦩꦸꦭꦤ꧀ꦏꦸꦭꦶꦠ꧀ꦠꦺꦏ꧀ꦭꦶꦩꦶꦱ꧀꧈​ꦤꦸꦭꦶꦥꦝꦚꦼꦁꦒꦸꦠ꧀ꦱꦸꦏꦼꦠ꧀ꦲꦶꦁꦱꦥꦶꦁꦒꦶꦂꦫꦺꦏꦭꦶ꧉​

^41:19 ꦢꦸꦩꦢꦏ꧀ꦏꦤ꧀ꦲꦤꦱꦥꦶꦥꦶꦠꦸꦭꦶꦪꦤꦺꦗꦸꦩꦼꦝꦸꦭ꧀꧈​ꦏꦸꦫꦸꦏꦸꦫꦸꦥꦽꦱꦱꦠ꧀ꦩꦸꦁꦧꦭꦸꦁꦏꦫꦺꦴꦏꦸꦭꦶꦠ꧀꧉​ꦢꦸꦫꦸꦁꦠꦲꦸꦲꦏꦸꦮꦼꦫꦸꦃꦱꦥꦶꦱꦶꦁꦲꦺꦭꦺꦏ꧀ꦏꦺꦏꦪꦔꦺꦴꦤꦺꦴꦲꦶꦁꦠꦤꦃ​꧊ꦩꦺꦱꦶꦂꦏꦧꦺꦃ꧉​

^41:20 ꦱꦥꦶꦱꦶꦁꦏꦸꦫꦸꦏꦸꦫꦸꦩꦲꦸꦥꦝꦩꦁꦔꦤ꧀ꦱꦥꦶꦱꦶꦁꦊꦩꦸꦊꦩꦸꦔꦤ꧀ꦠꦶꦲꦼꦤ꧀ꦠꦺꦏ꧀ꦏꦧꦺꦃ꧉​

^41:21 ꦲꦺꦮꦱꦼꦩꦺꦴꦤꦺꦴꦱꦥꦶꦱꦶꦁꦏꦸꦫꦸꦏꦸꦫꦸꦩꦲꦸꦲꦶꦱꦶꦃꦠꦼꦠꦼꦥ꧀ꦥꦝꦏꦸꦫꦸꦤꦺꦏꦪꦱꦢꦸꦫꦸꦁꦔꦺꦩꦁꦔꦤ꧀꧉​ꦲꦏꦸꦧꦚ꧀ꦗꦸꦂꦔ꧀ꦭꦶꦭꦶꦂ꧉​

^41:22 ꦧꦉꦁꦠꦸꦫꦸꦩꦼꦤꦺꦃ꧈​ꦲꦏꦸꦔꦶꦩ꧀ꦥꦶꦩꦼꦤꦺꦃ꧈​ꦏꦪꦏꦪꦮꦼꦫꦸꦃꦲꦤꦮꦸꦭꦺꦤ꧀ꦒꦤ꧀ꦢꦸꦩ꧀ꦥꦶꦠꦸꦩꦼꦤ꧀ꦠꦼꦱ꧀ꦩꦼꦤ꧀ꦠꦼꦱ꧀ꦠꦸꦂꦮꦶꦱ꧀ꦠꦸꦮ꧈​ꦩꦼꦠꦸꦱꦏꦢꦩꦺꦤ꧀ꦱꦶꦗꦶ꧉​

^41:23 ꦢꦸꦩꦢꦏ꧀ꦏꦤ꧀ꦲꦤꦮꦸꦭꦺꦤ꧀ꦒꦤ꧀ꦢꦸꦩ꧀ꦥꦶꦠꦸꦭꦶꦪꦤꦺꦗꦸꦩꦼꦝꦸꦭ꧀꧈​ꦤꦁꦔꦶꦁꦏꦸꦫꦸꦏꦸꦫꦸꦭꦤ꧀ꦏꦼꦧꦿꦔꦱ꧀ꦢꦺꦤꦶꦁꦲꦔꦶꦤ꧀ꦤꦶꦁꦱꦼꦒꦫꦮꦼꦝꦶ꧉​

^41:24 ꦮꦸꦭꦺꦤ꧀ꦒꦤ꧀ꦢꦸꦩ꧀ꦱꦶꦁꦏꦸꦫꦸꦏꦸꦫꦸꦩꦲꦸꦤꦸꦭꦶꦔꦸꦤ꧀ꦠꦭ꧀ꦮꦸꦭꦺꦤ꧀ꦱꦶꦁꦩꦼꦤ꧀ꦠꦼꦱ꧀ꦩꦼꦤ꧀ꦠꦼꦱ꧀꧉​ꦲꦶꦩ꧀ꦥꦺꦤ꧀ꦲꦶꦏꦶꦮꦶꦱ꧀ꦢꦏ꧀ꦕ꧀ꦂꦶꦠꦏ꧀ꦏꦏꦺꦩꦫꦁꦥꦫꦠꦸꦏꦁꦱꦶꦲꦶꦂ꧈​ꦤꦁꦔꦶꦁꦱꦶꦗꦶꦮꦲꦺꦲꦺꦴꦫꦲꦤꦱꦶꦁꦧꦶꦱꦤꦼꦫꦁꦔꦏꦺꦠꦼꦒꦼꦱ꧀ꦱꦺ꧉"​

^41:25 ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦩꦠꦸꦂ꧈​"ꦲꦶꦩ꧀ꦥꦺꦤ꧀ꦏꦼꦏꦭꦶꦃꦩꦼꦤꦶꦏꦩꦏ꧀ꦤꦤꦶꦥꦸꦤ꧀ꦱꦩꦶ꧉​ꦒꦸꦱ꧀ꦠꦶꦄꦭ꧀ꦭꦃꦩꦫꦶꦁꦔꦶꦱꦸꦩꦼꦉꦥ꧀ꦝꦠꦼꦁꦥꦚ꧀ꦗꦼꦤꦼꦁꦔꦤ꧀꧈​ꦩꦼꦤꦥꦲꦶꦁꦏꦁꦧꦝꦺꦏꦼꦭꦩ꧀ꦥꦃꦲꦤ꧀꧉​

^41:26 ꦊꦩ꧀ꦧꦸꦥꦶꦠꦸꦲꦶꦁꦏꦁꦊꦩꦊꦩꦱꦂꦠꦮꦸꦭꦺꦤ꧀ꦥꦶꦠꦸꦲꦶꦁꦏꦁꦩꦼꦤ꧀ꦠꦼꦱ꧀ꦩꦼꦤ꧀ꦠꦼꦱ꧀ꦩꦼꦤꦶꦏꦠꦼꦒꦼꦱ꧀ꦱꦶꦥꦸꦤ꧀ꦱꦩꦶ꧈​ꦲꦶꦁꦒꦶꦃꦩꦼꦤꦶꦏꦩꦁꦱꦩꦶꦫꦃꦠꦼꦝꦥꦶꦠꦸꦁꦠꦲꦸꦤ꧀꧉​

^41:27 ꦊꦩ꧀ꦧꦸꦥꦶꦠꦸꦏꦼꦫꦏꦼꦫꦲꦶꦁꦏꦁꦗꦸꦩꦼꦝꦸꦭ꧀ꦱꦼꦱꦩ꧀ꦥꦸꦤꦶꦥꦸꦤ꧀ꦩꦼꦤꦶꦏ꧈​ꦱꦂꦠꦮꦸꦭꦺꦤ꧀ꦒꦤ꧀ꦢꦸꦩ꧀ꦥꦶꦠꦸꦲꦶꦁꦏꦁꦏꦼꦫꦭꦤ꧀ꦏꦼꦧꦿꦔꦱ꧀ꦢꦺꦤꦶꦁꦲꦔꦶꦤ꧀ꦤꦶꦁꦱꦼꦒꦤ꧀ꦠꦼꦤ꧀ꦮꦼꦝꦶ꧈​ꦩꦼꦤꦶꦏꦔꦶꦧꦫꦠ꧀ꦠꦏꦼꦤ꧀ꦩꦁꦱꦥꦕꦼꦏ꧀ꦭꦶꦏ꧀ꦲꦶꦁꦏꦁꦭꦩꦶꦤꦶꦥꦸꦤ꧀ꦥꦶꦠꦸꦁꦠꦲꦸꦤ꧀꧉​

^41:28 ꦏꦸꦭꦮꦲꦸꦱꦩ꧀ꦥꦸꦤ꧀ꦩꦠꦸꦂ꧈​ꦧꦶꦭꦶꦃꦒꦸꦱ꧀ꦠꦶꦄꦭ꧀ꦭꦃꦥꦫꦶꦁꦱꦸꦩꦼꦉꦥ꧀ꦝꦠꦼꦁꦱꦁꦥꦿꦧꦸꦩꦼꦤꦥꦲꦶꦁꦏꦁꦧꦝꦺꦏꦼꦭꦩ꧀ꦥꦃꦲꦤ꧀꧉​

^41:29 ꦧꦝꦺꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦩꦁꦱꦩꦶꦫꦃꦠꦼꦝꦮꦿꦢꦶꦤ꧀ꦲꦶꦁꦱꦤꦼꦒꦫꦶ​꧊ꦩꦺꦱꦶꦂ꧉​

^41:30 (41:30-31)ꦤꦁꦔꦶꦁꦱꦼꦱꦩ꧀ꦥꦸꦤꦶꦥꦸꦤ꧀ꦩꦼꦤꦶꦏꦧꦝꦺꦮꦺꦴꦤ꧀ꦠꦼꦤ꧀ꦥꦲꦶꦭꦤ꧀ꦲꦶꦁꦏꦁꦭꦩꦶꦤꦶꦥꦸꦤ꧀ꦲꦶꦁꦒꦶꦃꦥꦶꦠꦸꦁꦠꦲꦸꦤ꧀꧈​ꦔꦤ꧀ꦠꦺꦴꦱ꧀ꦠꦶꦪꦁꦧꦝꦺꦏꦼꦱꦸꦥꦺꦤ꧀ꦝꦠꦼꦁꦩꦁꦱꦩꦶꦫꦃꦠꦼꦝꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦲꦭꦩ꧀ꦩꦶ꧈​ꦲꦮꦶꦠ꧀ꦥꦲꦶꦭꦤ꧀ꦤꦶꦥꦸꦤ꧀ꦧꦝꦺꦲꦒꦼꦁꦱꦔꦼꦠ꧀꧈​ꦔꦤ꧀ꦠꦺꦴꦱ꧀ꦢꦩꦼꦭ꧀ꦕꦼꦁꦏꦂꦫꦶꦁꦱꦶꦠꦶ꧉​

^41:31 (41:30)

^41:32 ꦢꦺꦤꦺꦱꦸꦥꦼꦤꦤꦶꦥꦸꦤ꧀ꦱꦁꦥꦿꦧꦸꦔꦤ꧀ꦠꦺꦴꦱ꧀ꦫꦩ꧀ꦧꦃꦏꦥꦶꦁꦏꦭꦶꦃ꧈​ꦩꦼꦤꦶꦏꦠꦼꦒꦼꦱ꧀ꦱꦶꦥꦸꦤ꧀꧈​ꦧꦶꦭꦶꦃꦥꦽꦏꦮꦶꦱ꧀ꦩꦼꦤꦶꦏꦱꦩ꧀ꦥꦸꦤ꧀ꦢꦢꦺꦴꦱ꧀ꦏꦼꦏꦚ꧀ꦕꦶꦁꦔꦤ꧀ꦤꦶꦥꦸꦤ꧀ꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦩ꧀ꦧꦺꦴꦠꦼꦤ꧀ꦏꦺꦁꦔꦶꦁꦏꦲꦺꦮꦃꦲꦤ꧀꧈​ꦠꦸꦂꦧꦝꦺꦲꦺꦁꦒꦭ꧀ꦏꦼꦭꦩ꧀ꦥꦃꦲꦤ꧀꧉​

^41:33 ꦩꦶꦭꦤꦶꦥꦸꦤ꧀ꦥꦿꦪꦺꦴꦒꦶꦱꦔꦼꦠ꧀ꦩꦼꦤꦮꦶꦱꦁꦥꦿꦧꦸꦔꦸꦥꦢꦺꦴꦱ꧀ꦠꦶꦪꦁꦲꦶꦁꦏꦁꦭꦤ꧀ꦠꦶꦥ꧀ꦱꦲꦮꦶꦕꦏ꧀ꦱꦤ꧈​ꦲꦶꦁꦏꦁꦱꦒꦼꦢ꧀ꦏꦲꦁꦏꦠ꧀ꦢꦢꦺꦴꦱ꧀ꦥꦼꦔꦒꦼꦁꦲꦶꦁꦤꦼꦒꦫꦶꦔꦿꦶꦏꦶ꧉​

^41:34 (41:34-35)ꦏꦼꦗꦮꦶꦩꦼꦤꦶꦏꦱꦁꦥꦿꦧꦸꦲꦸꦒꦶꦏꦸꦭꦲꦠꦸꦂꦫꦶꦔꦁꦏꦠ꧀ꦥꦼꦒꦮꦺꦥꦼꦒꦮꦺꦤꦺꦱꦤꦺꦱ꧀ꦱꦶꦥꦸꦤ꧀꧈​ꦲꦶꦁꦏꦁꦏꦥꦫꦶꦁꦔꦤ꧀ꦥꦔ꧀ꦮꦲꦺꦴꦱ꧀ꦤꦫꦶꦏ꧀ꦱꦥꦿꦒꦁꦱꦭ꧀ꦭꦶꦥꦸꦤ꧀ꦱꦼꦢꦪꦥꦤꦺꦤ꧀ꦤꦤ꧀ꦒꦤ꧀ꦢꦸꦩ꧀ꦱꦼꦭꦩꦶꦤꦶꦥꦸꦤ꧀ꦩꦁꦱꦏꦭꦸꦧꦺꦂꦫꦤ꧀ꦥꦶꦠꦸꦁꦠꦲꦸꦤ꧀ꦮꦲꦸ;ꦢꦶꦥꦸꦤ꧀ꦠꦤ꧀ꦝꦺꦴꦮꦲꦶꦁꦏꦶꦛꦏꦶꦛꦱꦂꦠꦏꦗꦒꦶ꧉​

^41:35 (41:34)

^41:36 ꦒꦤ꧀ꦢꦸꦩ꧀ꦮꦲꦸꦢꦢꦺꦴꦱ꧀ꦱꦠꦤ꧀ꦝꦺꦴꦤ꧀ꦠꦼꦝꦏꦁꦒꦺꦩꦁꦱꦥꦶꦠꦸꦁꦠꦲꦸꦤ꧀ꦱꦩꦁꦱꦠꦤꦃ​꧊ꦩꦺꦱꦶꦂꦔꦭꦩ꧀ꦩꦶꦥꦲꦶꦭꦤ꧀꧉​ꦱꦿꦤꦩꦼꦏꦠ꧀ꦠꦼꦤ꧀ꦫꦏꦾꦠ꧀ꦩ꧀ꦧꦺꦴꦠꦼꦤ꧀ꦧꦝꦺꦔꦭꦩ꧀ꦩꦶꦥꦼꦗꦃꦏꦭꦶꦂꦫꦼꦤ꧀꧉"​

^41:37 ꦱꦁꦥꦿꦶꦔꦺꦴꦤ꧀ꦭꦤ꧀ꦥꦫꦥꦼꦒꦮꦺꦤꦺꦚꦫꦸꦗꦸꦏ꧀ꦏꦶꦥꦤꦼꦩꦸꦤꦺ​꧊ꦪꦸꦱꦸꦥ꦳꧀꧉​

^41:38 ꦩꦸꦭꦔꦤ꧀ꦢꦶꦏꦩꦫꦁꦥꦫꦥꦼꦒꦮꦺꦥꦼꦒꦮꦺꦩꦲꦸ꧈​"ꦲꦥꦲꦤꦮꦺꦴꦁꦱꦶꦁꦭꦸꦮꦶꦃꦩꦸꦩ꧀ꦥꦸꦤꦶꦏꦼꦠꦶꦩ꧀ꦧꦁꦏꦫꦺꦴ​꧊ꦪꦸꦱꦸꦥ꦳꧀꧈​ꦩꦼꦂꦒꦝꦺꦮꦺꦏ꧀ꦏꦺꦏꦢꦸꦤꦸꦁꦔꦤ꧀ꦫꦺꦴꦃꦲꦺꦄꦭ꧀ꦭꦃ?"

^41:39 ꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦪꦸꦱꦸꦥ꦳꧀꧈​"ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦩꦫꦶꦁꦔꦶꦮꦼꦫꦸꦃꦲꦶꦏꦶꦏꦧꦺꦃꦩꦫꦁꦏꦺꦴꦮꦺ꧈​ꦢꦢꦶꦕꦼꦛꦪꦺꦤ꧀ꦏꦺꦴꦮꦺꦭꦸꦮꦶꦃꦭꦤ꧀ꦠꦶꦥ꧀ꦭꦤ꧀ꦭꦸꦮꦶꦃꦮꦶꦕꦏ꧀ꦱꦤꦏꦼꦠꦶꦩ꧀ꦧꦁꦏꦫꦺꦴꦱꦥꦮꦲꦺ꧉​

^41:40 ꦏꦺꦴꦮꦺꦧꦏꦭ꧀ꦢꦏ꧀ꦲꦁꦏꦠ꧀ꦢꦢꦶꦒꦸꦧꦼꦂꦤꦸꦂꦲꦶꦁꦤꦼꦒꦫꦏꦺꦤꦺ꧈​ꦭꦤ꧀ꦫꦏꦾꦠ꧀ꦏꦧꦺꦃꦧꦏꦭ꧀ꦔ꧀ꦭꦏꦺꦴꦤ꧀ꦤꦶꦲꦥꦱꦶꦁꦏꦺꦴꦏ꧀ꦥꦿꦺꦤ꧀ꦠꦃꦲꦏꦺ꧉​ꦲꦺꦴꦫꦲꦤꦮꦺꦴꦁꦱꦶꦁꦔꦸꦁꦏꦸꦭ꧀ꦭꦶꦥꦔ꧀ꦮꦱꦩꦸ꧈​ꦏꦼꦗꦧꦲꦏꦸꦝꦺꦮꦺ꧉"​

^41:41 (41:41-42)ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦔ꧀ꦭꦺꦴꦭꦺꦴꦱ꧀ꦱꦼꦱꦸꦥꦺꦤꦺꦕꦥ꧀ꦏꦿꦗꦤ꧀ꦱꦏꦲꦱ꧀ꦠꦤꦺ꧈​ꦢꦶꦲꦼꦁꦒꦺꦴꦏ꧀ꦏꦏꦺꦲꦶꦁꦢꦿꦶꦗꦶꦤꦺ​꧊ꦪꦸꦱꦸꦥ꦳꧀꧈​ꦏꦫꦺꦴꦔꦤ꧀ꦢꦶꦏ꧈​"ꦮꦶꦮꦶꦠ꧀ꦱꦲꦶꦏꦶꦏꦺꦴꦮꦺꦢꦏ꧀ꦢꦢꦺꦏ꧀ꦏꦏꦺꦒꦸꦧꦼꦂꦤꦸꦂꦲꦶꦁꦱꦠꦤꦃ​꧊ꦩꦺꦱꦶꦂꦏꦧꦺꦃ꧉"​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦢꦶꦲꦼꦁꦒꦺꦴꦤ꧀ꦤꦶꦗꦸꦧꦃꦭꦺꦤꦲꦭꦸꦱ꧀꧈​ꦭꦤ꧀ꦢꦶꦏꦭꦸꦁꦔꦶꦏꦭꦸꦁꦲꦼꦩꦱ꧀꧈​

^41:42 (41:41)

^41:43 ꦱꦂꦠꦢꦶꦠꦸꦩ꧀ꦥꦏ꧀ꦏꦏꦺꦲꦶꦁꦏꦿꦺꦠꦏꦼꦥꦿꦧꦺꦴꦤ꧀꧉​ꦥꦼꦔꦮꦭ꧀ꦭꦺꦱꦁꦥꦿꦶꦔꦺꦴꦤ꧀ꦩ꧀ꦭꦏꦸꦲꦶꦁꦔꦉꦥ꧀ꦥꦺꦏꦫꦺꦴꦲꦭꦺꦴꦏ꧀ꦲꦭꦺꦴꦏ꧀꧈​"ꦩꦶꦁꦒꦶꦂ꧉​ꦩꦶꦁꦒꦶꦂ꧉"​ꦩꦼꦁꦏꦺꦴꦤꦺꦴ​꧊ꦪꦸꦱꦸꦥ꦳꧀ꦢꦶꦲꦁꦏꦠ꧀ꦢꦢꦶꦒꦸꦧꦼꦂꦤꦸꦂꦲꦶꦁꦠꦤꦃ​꧊ꦩꦺꦱꦶꦂꦏꦧꦺꦃ꧉​

^41:44 ꦱꦁꦥꦿꦶꦔꦺꦴꦤ꧀ꦔꦤ꧀ꦢꦶꦏꦩꦫꦁ​꧊ꦪꦸꦱꦸꦥ꦳꧀꧈​"ꦲꦏꦸꦱꦶꦁꦢꦢꦶꦫꦗ꧈​ꦤꦁꦔꦶꦁꦠꦤ꧀ꦥꦥꦭꦶꦭꦃꦩꦸꦮꦺꦴꦁꦲꦶꦁꦱꦠꦤꦃ​꧊ꦩꦺꦱꦶꦂꦲꦺꦴꦫꦏꦼꦤꦤꦶꦤ꧀ꦢꦏ꧀ꦏꦏꦺꦲꦥꦲꦥ꧉"​

^41:45 (41:45-46)ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦩꦫꦶꦁꦔꦶꦤꦩꦧꦱ​꧊ꦩꦺꦱꦶꦂꦩꦫꦁ​꧊ꦪꦸꦱꦸꦥ꦳꧀꧈​ꦪꦏꦸꦮꦶ:​꧊ꦗ꦳ꦥ꦳꧀ꦤꦠ꧀​꧊ꦥꦲꦤꦺꦪꦃ꧉​ꦲꦸꦒꦢꦶꦥꦫꦶꦁꦔꦶꦱꦶꦱꦶꦃꦲꦤ꧀꧈​ꦗꦼꦤꦼꦁꦔꦺ​꧊ꦄꦱ꧀ꦤꦠ꧀꧈​ꦲꦤꦏ꧀ꦏꦺ​꧊ꦥꦺꦴꦠꦶꦥ꦳ꦺꦫ꧈​ꦲꦶꦩꦩ꧀ꦲꦶꦁ​꧊ꦲꦺꦭꦶꦪꦺꦴꦥꦺꦴꦭꦶꦱ꧀꧉​ꦤꦭꦶꦏꦢꦶꦲꦁꦏꦠ꧀ꦢꦢꦶꦒꦸꦧꦼꦂꦤꦸꦂꦩꦲꦸ​꧊ꦪꦸꦱꦸꦥ꦳꧀ꦲꦸꦩꦸꦂꦠꦼꦭꦸꦁꦥꦸꦭꦸꦃꦠꦲꦸꦤ꧀꧉​​꧊ꦪꦸꦱꦸꦥ꦳꧀ꦤꦸꦭꦶꦩꦸꦤ꧀ꦢꦸꦂꦱꦏꦲꦶꦁꦔꦂꦱꦤꦺꦱꦁꦥꦿꦶꦔꦺꦴꦤ꧀꧈​ꦩꦶꦢꦼꦂꦤ꧀ꦢ꧀ꦭꦗꦃꦲꦶꦠꦤꦃ​꧊ꦩꦺꦱꦶꦂꦏꦧꦺꦃ꧉​

^41:46 (41:45)

^41:47 ꦱꦗꦿꦺꦴꦤꦺꦥꦶꦠꦸꦁꦠꦲꦸꦤ꧀ꦠꦤꦃ​꧊ꦩꦺꦱꦶꦂꦔꦭꦩ꧀ꦩꦶꦩꦁꦱꦩꦸꦫꦃꦥꦔꦤ꧀꧈​ꦥꦩꦼꦠꦸꦤꦺꦧꦸꦩꦶꦔꦤ꧀ꦠꦶꦠꦸꦫꦃꦠꦸꦫꦃ꧉​

^41:48 ​꧊ꦪꦸꦱꦸꦥ꦳꧀ꦔꦸꦩ꧀ꦥꦸꦭ꧀ꦭꦏꦺꦒꦤ꧀ꦢꦸꦩ꧀ꦩꦲꦸ꧈​ꦢꦶꦠꦤ꧀ꦝꦺꦴꦲꦤꦲꦶꦁꦏꦸꦛꦏꦸꦛ꧉​ꦲꦶꦁꦱꦧꦼꦤ꧀ꦏꦸꦛꦢꦶꦲꦼꦢꦼꦒꦭꦸꦩ꧀ꦧꦸꦁꦏꦁꦒꦺꦴꦤꦤ꧀ꦝꦺꦴꦒꦤ꧀ꦢꦸꦩ꧀ꦥꦩꦼꦠꦸꦤꦺꦥꦊꦩꦃꦲꦤ꧀ꦲꦶꦁꦱꦏꦶꦮꦠꦼꦔꦼꦤ꧀ꦤꦺ꧉​

^41:49 ꦱꦏꦶꦁꦲꦏꦺꦃꦲꦺꦒꦤ꧀ꦢꦸꦩ꧀ꦔꦤ꧀ꦠꦶꦏꦪꦮꦼꦝꦶꦤꦺꦱꦼꦒꦫ꧈​ꦩꦸꦭꦤꦺꦧꦚ꧀ꦗꦸꦂꦮꦶꦱ꧀ꦲꦺꦴꦫꦢꦶꦲꦺꦠꦸꦁꦩꦼꦤꦺꦃꦥꦶꦫꦱꦶꦁꦩ꧀ꦭꦼꦧꦸꦭꦸꦩ꧀ꦧꦸꦁ꧉​

^41:50 ꦱꦢꦸꦫꦸꦁꦔꦺꦩꦁꦱꦥꦲꦶꦭꦤ꧀​꧊ꦪꦸꦱꦸꦥ꦳꧀ꦮꦶꦱ꧀ꦢꦸꦮꦺꦲꦤꦏ꧀ꦭꦤꦁꦭꦺꦴꦫꦺꦴ꧈​ꦥꦠꦸꦠ꧀ꦠꦤ꧀ꦱꦏ​꧊ꦄꦱ꧀ꦤꦠ꧀꧉​

^41:51 ꦥꦔꦸꦕꦥ꧀ꦥꦺ​꧊ꦪꦸꦱꦸꦥ꦳꧀꧈​"ꦄꦭ꧀ꦭꦃꦮꦶꦱ꧀ꦔ꧀ꦒꦮꦺꦲꦏꦸꦭꦭꦶꦏꦫꦺꦴꦱꦏꦺꦃꦲꦺꦏꦱꦸꦱꦃꦲꦤ꧀ꦏꦸꦭꦤ꧀ꦏꦫꦺꦴꦧꦿꦪꦠ꧀ꦠꦺꦧꦥꦏ꧀ꦏꦸ꧉"​ꦩꦸꦭꦤꦺꦲꦤꦏ꧀ꦏꦺꦢꦶꦗꦼꦤꦼꦁꦔꦏꦺ:​꧊ꦩꦤꦱꦾꦺ꧉​

^41:52 ꦢꦺꦤꦺꦲꦤꦏ꧀ꦏꦺꦱꦶꦁꦏꦥꦶꦤ꧀ꦝꦺꦴꦢꦶꦗꦼꦤꦼꦁꦔꦏꦺ:​꧊ꦌꦥ꦳ꦿꦲꦶꦩ꧀꧈​ꦥꦔꦸꦕꦥ꧀ꦥꦺ꧈​"ꦄꦭ꧀ꦭꦃꦩꦫꦶꦁꦔꦶꦲꦤꦏ꧀ꦲꦤꦲꦶꦁꦠꦤꦃꦥꦁꦒꦺꦴꦤ꧀ꦤꦤ꧀ꦏꦸꦤꦤ꧀ꦝꦁꦏꦼꦱꦿꦏꦠ꧀꧉"​

^41:53 ꦧꦉꦁꦩꦁꦱꦥꦶꦠꦸꦁꦠꦲꦸꦤ꧀ꦩꦸꦫꦃꦥꦔꦤ꧀ꦮꦶꦱ꧀ꦫꦩ꧀ꦥꦸꦁ꧈​

^41:54 ꦠꦤꦃ​꧊ꦩꦺꦱꦶꦂꦧꦚ꧀ꦗꦸꦂꦏꦠꦼꦂꦗꦁꦥꦲꦶꦭꦤ꧀ꦔꦤ꧀ꦠꦶꦥꦶꦠꦸꦁꦠꦲꦸꦤ꧀ꦭꦮꦱ꧀ꦱꦺ꧈​ꦏꦪꦱꦶꦁꦢꦶꦏꦤ꧀ꦝꦏ꧀ꦏꦏꦺꦢꦺꦤꦶꦁ​꧊ꦪꦸꦱꦸꦥ꦳꧀꧉​ꦩꦭꦃꦱꦗꦒꦢ꧀ꦏꦧꦺꦃꦏꦠꦼꦂꦗꦁꦥꦲꦶꦭꦤ꧀꧈​ꦩꦸꦁꦲꦶꦁꦠꦤꦃ​꧊ꦩꦺꦱꦶꦂꦝꦺꦮꦺꦱꦶꦁꦲꦤꦥꦔꦤ꧀꧉​

^41:55 ꦧꦉꦁꦥꦝꦏꦼꦏꦸꦫꦁꦔꦤ꧀ꦥꦔꦤ꧀꧈​ꦫꦏꦾꦠ꧀​꧊ꦩꦺꦱꦶꦂꦧꦚ꧀ꦗꦸꦂꦥꦝꦚꦸꦮꦸꦤ꧀ꦥꦔꦤ꧀ꦩꦫꦁꦱꦁꦥꦿꦶꦔꦺꦴꦤ꧀꧉​ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦝꦮꦸꦃꦏꦫꦺꦴꦮꦺꦴꦁꦮꦺꦴꦁꦩꦲꦸꦱꦸꦥꦪꦥꦝꦱꦺꦴꦮꦤ꧀​꧊ꦪꦸꦱꦸꦥ꦳꧀ꦭꦤ꧀ꦤꦸꦫꦸꦠ꧀ꦠꦲꦶꦁꦱꦥꦿꦺꦤ꧀ꦠꦃꦲꦺ꧉​

^41:56 ꦧꦉꦁꦥꦲꦶꦭꦤ꧀ꦤꦺꦱꦪꦤꦼꦩꦼꦤ꧀ꦭꦤ꧀ꦮꦿꦠꦱꦠꦤꦃ​꧊ꦩꦺꦱꦶꦂꦏꦧꦺꦃ꧈​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦩ꧀ꦧꦸꦏꦏ꧀ꦭꦸꦩ꧀ꦧꦸꦁꦭꦸꦩ꧀ꦧꦸꦁꦒꦤ꧀ꦢꦸꦩ꧀ꦩꦺꦏꦧꦺꦃꦱꦂꦠꦢꦶꦲꦼꦢꦺꦴꦭ꧀ꦏꦫꦺꦴꦮꦺꦴꦁ​꧊ꦩꦺꦱꦶꦂ꧉​

^41:57 ꦮꦺꦴꦁꦱꦏꦩꦚ꧀ꦕꦤꦼꦒꦫꦲꦶꦪꦥꦝꦩꦿꦺꦴꦤꦺꦴꦠꦸꦏꦸꦒꦤ꧀ꦢꦸꦩ꧀ꦏꦫꦺꦴ​꧊ꦪꦸꦱꦸꦥ꦳꧀꧈​ꦩꦼꦂꦒꦤꦼꦒꦫꦱꦗꦒꦢ꧀ꦥꦝꦏꦠꦼꦂꦗꦁꦥꦲꦶꦭꦤ꧀ꦒꦼꦝꦺ꧉​