Jv/Alkitab/Purwaning Dumadi/47

^47:1 ​꧊ꦪꦸꦱꦸꦥ꦳꧀ꦔꦗꦏ꧀ꦱꦼꦢꦸꦭꦸꦂꦫꦺꦭꦶꦩꦱꦺꦴꦮꦤ꧀ꦱꦁꦥꦿꦶꦔꦺꦴꦤ꧀꧉​ꦲꦸꦚ꧀ꦗꦸꦏ꧀ꦏꦺ꧈​"ꦧꦥꦏ꧀ꦭꦤ꧀ꦱꦼꦝꦺꦫꦺꦏ꧀ꦱꦼꦝꦺꦫꦺꦏ꧀ꦏꦸꦭꦱꦩ꧀ꦥꦸꦤ꧀ꦝꦠꦼꦁꦱꦏꦶꦁꦠꦤꦃ​꧊ꦏꦺꦤꦲꦤ꧀꧈​ꦩ꧀ꦧꦼꦏ꧀ꦠꦫꦗꦏꦪꦤꦶꦥꦸꦤ꧀꧈​ꦩꦺꦤ꧀ꦢꦭꦤ꧀ꦊꦩ꧀ꦧꦸ꧈​ꦠꦸꦮꦶꦤ꧀ꦧꦫꦁꦢꦂꦧꦺꦏ꧀ꦏꦶꦥꦸꦤ꧀ꦱꦼꦢꦪ꧉​ꦱꦩꦼꦤꦶꦏꦠꦏ꧀ꦱꦶꦃꦱꦩꦶꦮꦺꦴꦤ꧀ꦠꦼꦤ꧀ꦲꦶꦁꦠꦤꦃ​꧊ꦒꦺꦴꦱꦺꦤ꧀꧉"​

^47:2 ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦩꦲꦸꦧꦚ꧀ꦗꦸꦂꦢꦶꦏꦼꦤꦭ꧀ꦭꦏꦺꦏꦫꦺꦴꦱꦁꦥꦿꦶꦔꦺꦴꦤ꧀꧉​

^47:3 ꦥꦼꦤ꧀ꦢꦔꦸꦤꦺꦱꦁꦥꦿꦶꦔꦺꦴꦤ꧀ꦩꦫꦁꦮꦺꦴꦁꦮꦺꦴꦁꦩꦲꦸ꧈​"ꦥꦼꦒꦮꦺꦪꦤ꧀ꦩꦸꦲꦥ?"ꦮꦁꦱꦸꦭ꧀ꦭꦤ꧀ꦤꦺ꧈​"ꦏꦸꦭꦱꦩꦶꦔꦶꦔꦃꦫꦗꦏꦪ꧈​ꦏꦢꦺꦴꦱ꧀ꦥꦫꦊꦭꦸꦲꦸꦂꦏꦸꦭ꧈​ꦒꦸꦱ꧀ꦠꦶ꧉​ꦏꦸꦭꦩꦿꦶꦏꦶꦩꦼꦂꦒꦶꦤꦼꦒꦫꦶ​꧊ꦏꦺꦤꦲꦤ꧀꧈​ꦲꦶꦁꦏꦁꦏꦸꦭꦲꦼꦁꦒꦺꦤ꧀ꦤꦶ꧈​ꦱꦮꦼꦒ꧀ꦏꦠꦼꦂꦗꦁꦥꦲꦶꦭꦤ꧀꧉​ꦱꦏꦶꦁꦱꦔꦼꦠ꧀ꦠꦶꦥꦸꦤ꧀ꦔꦤ꧀ꦠꦺꦴꦱ꧀ꦲꦶꦁꦥꦥꦤ꧀ꦥꦔꦺꦤ꧀ꦤꦤ꧀ꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦫꦸꦩ꧀ꦥꦸꦠ꧀ꦏꦁꦒꦺꦤꦼꦝꦤꦶꦏꦺꦮꦤ꧀ꦏꦺꦮꦤ꧀ꦏꦸꦭ꧉​ꦏꦼꦥꦉꦁꦔꦏꦸꦭꦱꦩꦶꦩꦁꦒꦺꦤ꧀ꦲꦶꦁꦠꦤꦃ​꧊ꦒꦺꦴꦱꦺꦤ꧀꧉"​

^47:4 ꦏꦺꦱꦃꦏꦸꦭꦩꦿꦶꦏꦶꦩꦼꦂꦒꦶꦤꦼꦒꦫꦶ​꧊ꦏꦺꦤꦲꦤ꧀꧈​ꦲꦶꦁꦏꦁꦏꦸꦭꦲꦼꦁꦒꦺꦤ꧀ꦤꦶ꧈​ꦱꦮꦼꦒ꧀ꦏꦠꦼꦂꦗꦁꦥꦲꦶꦭꦤ꧀꧉​ꦱꦏꦶꦁꦱꦔꦼꦠ꧀ꦠꦶꦥꦸꦤ꧀ꦔꦤ꧀ꦠꦺꦴꦱ꧀ꦲꦶꦁꦥꦥꦤ꧀ꦥꦔꦺꦤ꧀ꦤꦤ꧀ꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦫꦸꦩ꧀ꦥꦸꦠ꧀ꦏꦁꦒꦺꦤꦼꦝꦤꦶꦏꦺꦮꦤ꧀ꦏꦺꦮꦤ꧀ꦏꦸꦭ꧉​ꦏꦼꦥꦉꦁꦔꦏꦸꦭꦱꦩꦶꦩꦁꦒꦺꦤ꧀ꦲꦶꦁꦠꦤꦃ​꧊ꦒꦺꦴꦱꦺꦤ꧀꧉"​

^47:5 ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦪꦸꦱꦸꦥ꦳꧀꧈​"ꦱꦫꦺꦃꦤꦺꦧꦥꦏ꧀ꦩꦸꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦩꦸꦮꦶꦱ꧀ꦠꦼꦏꦤ꧀ꦏꦺꦤꦺ꧈​

^47:6 ꦏꦉꦧꦺꦤ꧀ꦢꦢꦶꦮꦂꦒꦤꦺꦤꦼꦒꦫ​꧊ꦩꦺꦱꦶꦂ꧈​ꦭꦤ꧀ꦔ꧀ꦒꦫꦥ꧀ꦊꦩꦃꦲꦶꦁꦏꦺꦤꦺ꧈​ꦩꦥꦤ꧀ꦤꦲꦶꦁꦠꦤꦃ​꧊ꦒꦺꦴꦱꦺꦤ꧀꧉​ꦏꦸꦮꦶꦠꦤꦃꦱꦶꦁꦲꦥꦶꦏ꧀ꦝꦺꦮꦺꦱꦤꦼꦒꦫ​꧊ꦩꦺꦱꦶꦂ꧉​ꦪꦺꦤ꧀ꦲꦤꦱꦶꦁꦥꦶꦤ꧀ꦠꦼꦂ꧈​ꦥꦱꦿꦃꦲꦤꦚꦼꦏꦼꦭ꧀ꦫꦗꦏꦪꦏꦸꦥꦶꦱꦤ꧀꧉"​

^47:7 ​꧊ꦪꦸꦱꦸꦥ꦳꧀ꦲꦸꦒꦚꦺꦴꦮꦤ꧀ꦤꦏꦺꦧꦥꦏ꧀ꦤꦺ꧈​ꦢꦶꦠꦼꦥꦸꦁꦔꦏꦺꦏꦫꦺꦴꦱꦁꦥꦿꦶꦔꦺꦴꦤ꧀꧉​ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦢꦶꦧꦼꦂꦏꦃꦲꦶꦢꦺꦤꦶꦁ​꧊ꦪꦏꦸꦧ꧀꧉​

^47:8 ꦥꦼꦤ꧀ꦢꦔꦸꦤꦺꦩꦫꦁ​꧊ꦪꦏꦸꦧ꧀꧈​"ꦲꦸꦩꦸꦂꦱꦩ꧀ꦥꦺꦪꦤ꧀ꦥꦶꦤ꧀ꦠꦼꦤ꧀?"

^47:9 ꦮꦁꦱꦸꦭ꧀ꦭꦤ꧀ꦤꦺ​꧊ꦪꦏꦸꦧ꧀꧈​"ꦲꦸꦩꦸꦂꦏꦸꦭꦱꦠꦸꦱ꧀ꦠꦶꦒꦁꦢꦱꦠꦲꦸꦤ꧀ꦭꦤ꧀ꦱꦼꦭꦩꦶꦤꦶꦥꦸꦤ꧀ꦩꦼꦤꦶꦏꦔ꧀ꦭꦼꦩ꧀ꦧꦂꦫ꧉​ꦏꦠꦤ꧀ꦝꦶꦁꦏꦭꦶꦪꦤ꧀ꦲꦸꦩꦸꦂꦫꦶꦥꦸꦤ꧀ꦥꦫꦊꦭꦸꦲꦸꦂꦏꦸꦭ꧈​ꦲꦶꦁꦏꦁꦲꦸꦒꦶꦢꦢꦺꦴꦱ꧀ꦠꦶꦪꦁꦔ꧀ꦭꦼꦩ꧀ꦧꦂꦫ꧈​ꦲꦸꦩꦸꦂꦏꦸꦭꦠꦏ꧀ꦱꦶꦃꦱꦼꦏꦼꦝꦶꦏ꧀꧈​ꦠꦸꦂꦤꦩꦸꦁꦏꦼꦧꦏ꧀ꦏꦱꦁꦱꦫꦤ꧀꧉"​

^47:10 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ​꧊ꦪꦏꦸꦧ꧀ꦧꦚ꧀ꦗꦸꦂꦥꦩꦶꦠ꧀ꦠꦤ꧀ꦏꦫꦺꦴꦩ꧀ꦧꦼꦂꦏꦃꦲꦶꦱꦁꦥꦿꦶꦔꦺꦴꦤ꧀꧉​

^47:11 ​꧊ꦪꦸꦱꦸꦥ꦳꧀ꦔꦺꦒꦸꦃꦲꦏꦺꦥꦼꦩꦁꦒꦺꦴꦤꦺꦧꦥꦏ꧀ꦤꦺꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦲꦤꦲꦶꦁꦠꦤꦃ​꧊ꦩꦺꦱꦶꦂ꧉​ꦥꦝꦢꦶꦮꦺꦤꦺꦃꦲꦶꦊꦩꦃꦱꦶꦁꦧꦼꦕꦶꦏ꧀ꦝꦺꦮꦺꦲꦶꦁꦤꦼꦒꦫꦏꦺꦴꦤꦺꦴ꧈​ꦕꦼꦝꦏ꧀ꦏꦫꦺꦴꦏꦸꦛ​꧊ꦫꦩ꧀ꦱꦺꦱ꧀꧈​ꦏꦪꦱꦶꦁꦢꦶꦝꦮꦸꦃꦲꦏꦺꦱꦁꦥꦿꦶꦔꦺꦴꦤ꧀꧉​

^47:12 ꦧꦥꦏ꧀ꦤꦺꦭꦤ꧀ꦱꦤꦏ꧀ꦱꦼꦢꦸꦭꦸꦂꦫꦺꦠꦼꦏꦤ꧀ꦱꦶꦁꦕꦶꦭꦶꦏ꧀ꦝꦺꦮꦺꦥꦝꦢꦶꦕꦸꦏꦸꦥ꧀ꦥꦶꦥꦔꦤ꧀ꦤꦺ꧉​

^47:13 ꦥꦲꦶꦭꦤ꧀ꦤꦺꦒꦼꦝꦺꦧꦔꦼꦠ꧀ꦔꦤ꧀ꦠꦶꦮꦺꦴꦁꦱꦠꦤꦃ​꧊ꦩꦺꦱꦶꦂꦢꦭꦱ꧀ꦱꦤ꧀​꧊ꦏꦺꦤꦲꦤ꧀ꦥꦝꦤꦤ꧀ꦝꦁꦏꦼꦭꦸꦮꦺꦤ꧀꧉​

^47:14 ꦱꦧꦼꦤ꧀ꦲꦤꦮꦺꦴꦁꦠꦸꦏꦸꦒꦤ꧀ꦢꦸꦩ꧀​꧊ꦪꦸꦱꦸꦥ꦳꧀ꦚꦼꦠꦺꦴꦂꦫꦏꦺꦝꦸꦮꦶꦠ꧀ꦥꦼꦥꦪꦺꦴꦤꦺꦩꦲꦸꦩꦫꦁꦏꦼꦝꦠꦺꦴꦤꦺꦱꦁꦥꦿꦶꦔꦺꦴꦤ꧀꧉​

^47:15 ꦧꦉꦁꦲꦶꦁ​꧊ꦩꦺꦱꦶꦂꦭꦤ꧀ꦲꦶꦁ​꧊ꦏꦺꦤꦲꦤ꧀ꦮꦺꦴꦁꦮꦶꦱ꧀ꦥꦝꦲꦺꦴꦫꦢꦸꦮꦺꦝꦸꦮꦶꦠ꧀ꦏꦁꦒꦺꦴꦠꦸꦏꦸꦒꦤ꧀ꦢꦸꦩ꧀꧈​ꦮꦺꦴꦁꦮꦺꦴꦁꦧꦚ꧀ꦗꦸꦂꦤꦼꦩꦺꦴꦤ꧀ꦤꦶ​꧊ꦪꦸꦱꦸꦥ꦳꧀ꦭꦤ꧀ꦏꦤ꧀ꦝ꧈​"ꦏꦸꦭꦱꦩꦶꦚꦸꦮꦸꦤ꧀ꦠꦼꦝ꧉​ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦢꦶꦥꦸꦤ꧀ꦠꦺꦒꦏ꧀ꦏꦏꦼꦤ꧀ꦥꦼꦗꦃꦏꦭꦶꦂꦫꦼꦤ꧀꧉​ꦏꦸꦭꦱꦩ꧀ꦥꦸꦤ꧀ꦏꦠꦼꦭꦱ꧀ꦱꦤ꧀ꦲꦂꦠ꧈​ꦩꦶꦭꦚꦸꦮꦸꦤ꧀ꦢꦶꦥꦸꦤ꧀ꦲꦺꦒꦸꦃꦲꦏꦼꦤ꧀꧉"​

^47:16 ꦮꦁꦱꦸꦭ꧀ꦭꦤ꧀ꦤꦺ​꧊ꦪꦸꦱꦸꦥ꦳꧀꧈​"ꦪꦺꦤ꧀ꦝꦸꦮꦶꦠ꧀ꦩꦸꦲꦼꦤ꧀ꦠꦺꦏ꧀꧈​ꦩ꧀ꦧꦪꦂꦫꦔꦁꦒꦺꦴꦏꦺꦮꦤ꧀꧈​ꦲꦶꦔꦺꦴꦤ꧀ꦲꦶꦔꦺꦴꦤ꧀ꦩꦸ꧉"​

^47:17 ꦮꦺꦴꦁꦮꦺꦴꦁꦧꦚ꧀ꦗꦸꦂꦥꦝꦔꦼꦠꦼꦂꦫꦏꦺꦲꦶꦔꦺꦴꦤ꧀ꦲꦶꦔꦺꦴꦤ꧀ꦤꦺꦩꦫꦁ​꧊ꦪꦸꦱꦸꦥ꦳꧀ꦫꦸꦥꦗꦫꦤ꧀꧈​ꦮꦼꦝꦸꦱ꧀ꦒꦺꦩ꧀ꦧꦺꦭ꧀꧈​ꦮꦼꦝꦸꦱ꧀ꦗꦮ꧈​ꦱꦥꦶꦭꦤ꧀ꦏꦸꦭ꧀ꦢꦶ꧈​ꦢꦶꦲꦶꦗꦺꦴꦭ꧀ꦭꦏꦺꦥꦔꦤ꧀꧉​ꦢꦢꦶꦲꦶꦁꦠꦲꦸꦤ꧀ꦏꦸꦮꦶꦮꦺꦴꦁꦮꦺꦴꦁꦥꦝꦢꦶꦮꦺꦤꦺꦃꦲꦶꦥꦔꦤ꧀꧈​ꦭꦶꦫꦺꦴꦤ꧀ꦤꦤ꧀ꦏꦫꦺꦴꦏꦺꦮꦤ꧀ꦲꦶꦔꦺꦴꦤ꧀ꦲꦶꦔꦺꦴꦤ꧀꧉​

^47:18 ꦲꦶꦁꦠꦲꦸꦤ꧀ꦕꦤ꧀ꦝꦏ꧀ꦏꦺꦮꦺꦴꦁꦮꦺꦴꦁꦩꦲꦸꦥꦝꦤꦼꦩꦺꦴꦤ꧀ꦤꦶ​꧊ꦪꦸꦱꦸꦥ꦳꧀ꦩꦼꦤꦺꦃ꧈​ꦲꦠꦸꦂꦫꦺ꧈​"ꦒꦸꦱ꧀ꦠꦶ꧈​ꦮꦭꦺꦃꦮꦭꦺꦃꦩꦼꦤꦥ꧉​ꦏꦸꦭꦱꦩ꧀ꦥꦸꦤ꧀ꦱꦩꦶꦏꦠꦼꦭꦱ꧀ꦱꦤ꧀ꦲꦂꦠꦭꦤ꧀ꦏꦺꦮꦤ꧀ꦲꦶꦔꦃꦲꦶꦔꦃꦲꦤ꧀ꦏꦸꦭ꧈​ꦱꦩ꧀ꦥꦸꦤ꧀ꦏꦸꦭꦱꦲꦺꦴꦱ꧀ꦱꦏꦼꦤ꧀ꦥꦚ꧀ꦗꦼꦤꦼꦁꦔꦤ꧀ꦱꦼꦢꦪ꧉​ꦏꦸꦭꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦚꦲꦺꦴꦱ꧀ꦱꦏꦼꦤ꧀ꦩꦼꦤꦥꦩꦼꦤꦥ꧈​ꦏꦼꦗꦮꦶꦧꦢꦤ꧀ꦏꦸꦭꦭꦤ꧀ꦥꦱꦶꦠꦺꦤ꧀ꦏꦸꦭ꧉​

^47:19 ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦏꦸꦭꦢꦶꦥꦸꦤ꧀ꦠꦺꦒꦏ꧀ꦏꦏꦼꦤ꧀ꦥꦼꦗꦃꦏꦭꦶꦂꦫꦼꦤ꧀꧈​ꦚꦸꦮꦸꦤ꧀ꦢꦶꦥꦸꦤ꧀ꦲꦺꦒꦸꦃꦲꦏꦼꦤ꧀!ꦥꦱꦶꦠꦺꦤ꧀ꦏꦸꦭꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦱꦩꦶꦧꦼꦫ꧉​ꦱꦸꦩꦁꦒꦏꦸꦭꦲꦠꦸꦂꦫꦶꦩꦸꦤ꧀ꦝꦸꦠ꧀ꦧꦢꦤ꧀ꦏꦸꦭꦭꦤ꧀ꦥꦱꦶꦠꦺꦤ꧀ꦏꦸꦭ꧈​ꦏꦭꦶꦤ꧀ꦠꦺꦴꦤ꧀ꦤꦤꦠꦼꦝ꧉​ꦏꦸꦭꦧꦝꦺꦢꦢꦺꦴꦱ꧀ꦫꦺꦚ꧀ꦕꦁꦠꦸꦩ꧀ꦧꦱꦤ꧀ꦤꦶꦥꦸꦤ꧀ꦱꦁꦥꦿꦶꦔꦺꦴꦤ꧀ꦭꦤ꧀ꦥꦱꦶꦠꦺꦤ꧀ꦏꦸꦭꦏꦗꦼꦁꦔꦶꦥꦸꦤ꧀ꦢꦢꦺꦴꦱ꧀ꦏꦒꦸꦁꦔꦤ꧀ꦤꦶꦥꦸꦤ꧀꧉​ꦏꦸꦭꦚꦸꦮꦸꦤ꧀ꦢꦶꦥꦸꦤ꧀ꦥꦫꦶꦁꦔꦶꦒꦤ꧀ꦢꦸꦩ꧀ꦏꦁꦒꦺꦱꦔꦸꦒꦼꦱꦁꦭꦤ꧀ꦮꦶꦤꦶꦃꦱꦸꦥꦢꦺꦴꦱ꧀ꦱꦶꦠꦶꦏꦸꦭꦩ꧀ꦧꦺꦴꦠꦼꦤ꧀ꦧꦼꦫ꧉"​

^47:20 ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦤꦸꦏꦺꦴꦤ꧀ꦤꦶꦊꦩꦃꦱꦠꦤꦃ​꧊ꦩꦺꦱꦶꦂꦏꦧꦺꦃ꧉​ꦱꦧꦼꦤ꧀ꦮꦺꦴꦁꦏꦼꦥꦼꦏ꧀ꦱꦔꦼꦢꦺꦴꦭ꧀ꦭꦶꦊꦩꦃꦲꦺ꧈​ꦱꦏꦧꦔꦼꦠ꧀ꦠꦺꦥꦲꦶꦭꦤ꧀꧉​ꦩꦼꦁꦏꦺꦴꦤꦺꦴꦭꦧꦼꦠ꧀ꦠꦺ​꧊ꦪꦸꦱꦸꦥ꦳꧀꧈​ꦊꦩꦃꦱꦠꦤꦃ​꧊ꦩꦺꦱꦶꦂꦢꦢꦶꦏꦒꦸꦁꦔꦤ꧀ꦤꦺꦱꦁꦥꦿꦶꦔꦺꦴꦤ꧀꧉​

^47:21 ꦭꦤ꧀ꦏꦧꦺꦃꦮꦺꦴꦁꦱꦤꦼꦒꦫ​꧊ꦩꦺꦱꦶꦂꦢꦢꦶꦧꦠꦸꦂꦠꦸꦏꦺꦴꦤ꧀ꦤꦺ꧉​

^47:22 ꦩꦸꦁꦊꦩꦃꦲꦺꦥꦫꦲꦶꦩꦩ꧀ꦝꦺꦮꦺꦱꦶꦁꦲꦺꦴꦫꦢꦶꦠꦸꦏꦸ​꧊ꦪꦸꦱꦸꦥ꦳꧀꧉​ꦥꦫꦲꦶꦩꦩ꧀ꦲꦺꦴꦫꦥꦽꦭꦸꦔꦼꦢꦺꦴꦭ꧀ꦭꦶꦊꦩꦃ꧈​ꦩꦼꦂꦒꦥꦫꦲꦶꦩꦩ꧀ꦲꦸꦫꦶꦥ꧀ꦥꦺꦢꦶꦕꦸꦏꦸꦥ꧀ꦥꦶꦢꦺꦤꦶꦁꦱꦁꦥꦿꦶꦔꦺꦴꦤ꧀꧉​

^47:23 ꦕ꧀ꦭꦛꦸꦤꦺ​꧊ꦪꦸꦱꦸꦥ꦳꧀ꦩꦫꦁꦫꦏꦾꦠ꧀꧈​"ꦏꦺꦴꦮꦺꦭꦤ꧀ꦊꦩꦃꦩꦸꦮꦶꦱ꧀ꦢꦢꦶꦏꦒꦸꦁꦔꦤ꧀ꦤꦺꦱꦁꦥꦿꦶꦔꦺꦴꦤ꧀꧉​ꦏꦺꦴꦮꦺꦢꦏ꧀ꦮꦺꦤꦺꦃꦲꦶꦮꦶꦗꦶ꧈​ꦱꦼꦧꦂꦫꦼꦤ꧀ꦲꦤꦲꦶꦁꦥꦊꦩꦃꦲꦤ꧀ꦩꦸ꧉​

^47:24 ꦩ꧀ꦧꦺꦱꦸꦏ꧀ꦪꦺꦤ꧀ꦥꦤꦺꦤ꧀꧈​ꦱꦥꦿꦭꦶꦩꦤꦺꦥꦩꦼꦠꦸꦤꦺꦱꦲꦺꦴꦱ꧀ꦤꦩꦫꦁꦱꦁꦥꦿꦶꦔꦺꦴꦤ꧀꧉​ꦭꦶꦪꦤꦺꦲꦼꦁꦒꦺꦴꦤ꧀ꦤꦼꦤ꧀ꦮꦶꦗꦶꦭꦤ꧀ꦲꦼꦁꦒꦺꦴꦤ꧀ꦤꦼꦤ꧀ꦩꦁꦔꦤ꧀ꦏꦫꦺꦴꦧꦿꦪꦠ꧀ꦩꦸ꧉"​

^47:25 ꦮꦁꦱꦸꦭ꧀ꦭꦤ꧀ꦤꦺꦮꦺꦴꦁꦮꦺꦴꦁꦩꦲꦸ꧈​"ꦩꦠꦸꦂꦤꦸꦮꦸꦤ꧀ꦱꦔꦼꦠ꧀꧈​ꦒꦸꦱ꧀ꦠꦶ꧉​ꦩꦼꦂꦒꦶꦱꦏꦶꦁꦥꦶꦠꦸꦭꦸꦁꦔꦤ꧀ꦥꦚ꧀ꦗꦼꦤꦼꦁꦔꦤ꧀ꦏꦸꦭꦱꦩꦶꦱꦒꦼꦢ꧀ꦒꦼꦱꦁ꧉​ꦏꦸꦭꦱꦩꦶꦫꦶꦭꦢꦢꦺꦴꦱ꧀ꦲꦧ꧀ꦢꦶꦤꦶꦥꦸꦤ꧀ꦱꦁꦥꦿꦶꦔꦺꦴꦤ꧀꧉"​

^47:26 ꦧꦚ꧀ꦗꦸꦂꦢꦶꦒꦮꦺꦥꦽꦤꦠꦤ꧀ꦢꦺꦤꦶꦁ​꧊ꦪꦸꦱꦸꦥ꦳꧀ꦏꦁꦒꦺꦴꦱꦤꦼꦒꦫ​꧊ꦩꦺꦱꦶꦂꦏꦧꦺꦃ꧈​ꦪꦏꦸꦮꦶꦱꦥꦿꦭꦶꦩꦤꦺꦥꦩꦼꦠꦸꦤꦺꦥꦤꦺꦤ꧀ꦤꦤ꧀ꦏꦸꦢꦸꦢꦶꦱꦲꦺꦴꦱ꧀ꦱꦏꦺꦩꦫꦁꦱꦁꦥꦿꦶꦔꦺꦴꦤ꧀꧉​ꦥꦽꦤꦠꦤ꧀ꦩꦲꦸꦲꦶꦱꦶꦃꦢꦶꦲꦼꦁꦒꦺꦴꦔꦤ꧀ꦠꦶꦱꦼꦥꦿꦺꦤꦺ꧉​ꦩꦸꦁꦊꦩꦃꦲꦺꦥꦫꦲꦶꦩꦩ꧀ꦲꦺꦴꦫꦢꦢꦶꦏꦒꦸꦁꦔꦤ꧀ꦤꦺꦱꦁꦥꦿꦶꦔꦺꦴꦤ꧀꧉​

^47:27 ꦮꦺꦴꦁ​꧊ꦆꦱꦿꦲꦺꦭ꧀ꦥꦝꦩꦁꦒꦺꦴꦤ꧀ꦲꦤꦲꦶꦁꦠꦤꦃ​꧊ꦩꦺꦱꦶꦂ꧈​ꦲꦶꦁꦢꦲꦺꦫꦃ​꧊ꦒꦺꦴꦱꦺꦤ꧀꧈​ꦥꦝꦢꦢꦶꦱꦸꦒꦶꦃ꧈​ꦭꦤ꧀ꦧꦼꦧꦿꦤꦃꦲꦤ꧀ꦲꦤꦲꦶꦁꦏꦺꦴꦤꦺꦴ꧉​

^47:28 ​꧊ꦪꦏꦸꦧ꧀ꦲꦸꦫꦶꦥ꧀ꦥꦶꦠꦸꦭꦱ꧀ꦠꦲꦸꦤ꧀ꦲꦤꦲꦶꦁꦠꦤꦃ​꧊ꦩꦺꦱꦶꦂ꧈​ꦢꦢꦶꦚꦤ꧀ꦝꦏ꧀ꦲꦸꦩꦸꦂꦱꦠꦸꦱ꧀ꦥꦠꦁꦥꦸꦭꦸꦃꦥꦶꦠꦸꦠꦲꦸꦤ꧀꧉​

^47:29 ꦧꦉꦁꦮꦶꦱ꧀ꦕꦼꦝꦏ꧀ꦔꦗꦭ꧀ꦭꦺ꧈​ꦧꦚ꧀ꦗꦸꦂꦏꦺꦴꦁꦏꦺꦴꦤ꧀ꦤꦤ꧀ꦩꦫꦤꦶ​꧊ꦪꦸꦱꦸꦥ꦳꧀꧈​ꦲꦤꦏ꧀ꦏꦺ꧈​ꦠꦼꦩ꧀ꦧꦸꦁꦔꦺ꧈​"ꦠꦔꦤ꧀ꦩꦸꦠꦸꦩ꧀ꦥꦁꦤꦲꦤꦲꦶꦁꦕꦼꦛꦶꦏ꧀ꦏꦸꦭꦤ꧀ꦱꦸꦩ꧀ꦥꦃꦲꦪꦺꦤ꧀ꦏꦺꦴꦮꦺꦲꦺꦴꦫꦲꦉꦥ꧀ꦔꦸꦧꦸꦂꦲꦏꦸꦲꦤꦲꦶꦁꦠꦤꦃ​꧊ꦩꦺꦱꦶꦂ꧉​

^47:30 ꦲꦏꦸꦏꦸꦧꦸꦂꦫꦼꦤ꧀ꦲꦤꦲꦶꦁꦏꦸꦧꦸꦂꦫꦤ꧀ꦤꦺꦥꦫꦊꦭꦸꦲꦸꦂꦏꦸ꧉​ꦗꦶꦱꦶꦩ꧀ꦏꦸꦒꦮꦤꦼꦤ꧀ꦩꦿꦤꦭꦤ꧀ꦏꦸꦧꦸꦂꦫꦼꦤ꧀ꦲꦤꦲꦶꦁꦏꦸꦧꦸꦂꦫꦤ꧀ꦤꦺꦥꦫꦊꦭꦸꦲꦸꦂꦏꦸ꧉"​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦩꦁꦱꦸꦭ꧀ꦭꦶ꧈​"ꦝꦮꦸꦃꦲꦶꦥꦸꦤ꧀ꦧꦥꦏ꧀ꦧꦝꦺꦏꦸꦭꦲꦺꦱ꧀ꦠꦺꦴꦏ꧀ꦏꦏꦼꦤ꧀꧉"​

^47:31 ꦕ꧀ꦭꦛꦸꦤꦺ​꧊ꦪꦏꦸꦧ꧀꧈​"ꦏꦺꦴꦮꦺꦱꦸꦩ꧀ꦥꦃꦲ꧉"​​꧊ꦪꦸꦱꦸꦥ꦳꧀ꦤꦸꦭꦶꦱꦸꦩ꧀ꦥꦃ꧈​ꦭꦤ꧀​꧊ꦪꦏꦸꦧ꧀ꦧꦚ꧀ꦗꦸꦂꦱꦲꦺꦴꦱ꧀ꦥꦤꦸꦮꦸꦤ꧀꧉​