Jv/Alkitab/Purwaning Dumadi/49

^49:1 ​꧊ꦪꦏꦸꦧ꧀ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦤꦏ꧀ꦲꦤꦏ꧀ꦏꦺꦭꦤ꧀ꦢꦶꦏꦤ꧀ꦝꦤꦶ꧈​"ꦥꦝꦩꦿꦺꦤꦺꦪ꧈​ꦕꦼꦝꦏ꧀ꦏꦫꦺꦴꦲꦏꦸ꧉​ꦢꦏ꧀ꦏꦤ꧀ꦝꦤꦶꦲꦥꦱꦶꦁꦩ꧀ꦧꦺꦱꦸꦏ꧀ꦧꦏꦭ꧀ꦥꦝꦏꦺꦴꦏ꧀ꦲꦭꦩ꧀ꦩꦶ꧉"​

^49:2 "ꦲꦤꦏ꧀ꦲꦤꦏ꧀ꦏꦸ꧈​ꦥꦝꦔꦿꦸꦔꦺꦴꦏ꧀ꦤ꧈​ꦥꦝꦒꦠꦺꦏ꧀ꦤꦠꦼꦩ꧀ꦧꦸꦁꦔꦺ​꧊ꦆꦱꦿꦲꦺꦭ꧀꧈​ꦧꦥꦏ꧀ꦩꦸ꧉​

^49:3 ​꧊ꦫꦸꦧꦺꦤ꧀꧈​ꦲꦤꦏ꧀ꦏꦸꦱꦶꦁꦩ꧀ꦧꦉꦥ꧀꧈​ꦏꦺꦴꦮꦺꦏꦸꦮꦶꦏꦼꦏꦸꦮꦠ꧀ꦠꦤ꧀ꦏꦸꦱꦶꦁꦩꦲꦸꦗꦸꦢ꧀꧈​ꦮꦺꦴꦃꦱꦶꦁꦏꦮꦶꦠ꧀ꦠꦤ꧀ꦱꦏꦲꦼꦁꦒꦺꦴꦤ꧀ꦏꦸꦢꦢꦶꦮꦺꦴꦁꦭꦤꦁ꧈​ꦏꦺꦴꦮꦺꦱꦶꦁꦒꦒꦃꦥꦿꦏꦺꦴꦱꦝꦺꦮꦺꦲꦶꦁꦲꦤ꧀ꦠꦫꦤꦺꦲꦤꦏ꧀ꦲꦤꦏ꧀ꦏꦸ꧉​

^49:4 ꦏꦫꦺꦴꦱꦤ꧀ꦩꦸꦥꦽꦱꦱꦠ꧀ꦧꦚ꧀ꦗꦶꦂꦧꦤ꧀ꦝꦁ꧈​ꦤꦁꦔꦶꦁꦮꦸꦫꦸꦁꦢꦢꦶꦥꦼꦩ꧀ꦧꦉꦥ꧀꧈​ꦩꦼꦂꦒꦏꦺꦴꦮꦺꦮꦶꦱ꧀ꦔꦸꦩ꧀ꦥꦸꦭ꧀ꦭꦶꦧꦺꦴꦗꦺꦴꦤꦺꦧꦥꦏ꧀ꦩꦸ꧈​ꦭꦤ꧀ꦒꦮꦺꦗꦼꦩ꧀ꦧꦼꦂꦫꦺꦥꦼꦠꦸꦫꦺꦴꦤ꧀ꦏꦸ꧉​

^49:5 ꦏꦺꦴꦮꦺ​꧊ꦱꦶꦩꦺꦪꦺꦴꦤ꧀ꦭꦤ꧀​꧊ꦭꦺꦮꦶ꧈​ꦏꦺꦴꦮꦺꦥꦝꦱꦱꦼꦢꦸꦭꦸꦂ꧉​ꦒꦩꦤ꧀ꦩꦸꦏꦺꦴꦏ꧀ꦲꦼꦁꦒꦺꦴꦔꦿꦺꦴꦝꦥꦼꦏ꧀ꦱ꧉​

^49:6 ꦲꦏꦸꦲꦺꦴꦫꦱꦼꦤꦼꦁꦩꦺꦭꦸꦲꦶꦁꦥꦶꦉꦩ꧀ꦧꦸꦒꦤ꧀ꦤꦺ꧈​ꦩꦼꦂꦒꦪꦺꦤ꧀ꦮꦶꦱ꧀ꦩꦸꦂꦫꦶꦁꦠꦼꦒꦼꦭ꧀ꦩꦠꦺꦤ꧀ꦤꦶꦮꦺꦴꦁ꧉​ꦱꦥꦶꦭꦤꦁꦢꦶꦏꦼꦚ꧀ꦕꦺꦠ꧀ꦔꦤ꧀ꦠꦶꦭꦸꦩ꧀ꦥꦸꦃ꧈​ꦩꦸꦁꦏꦁꦒꦺꦴꦏꦼꦱꦼꦤꦼꦁꦔꦤ꧀꧉​

^49:7 ꦤꦼꦥ꧀ꦱꦸꦤꦺꦏꦼꦤꦲꦲꦶꦁꦱꦸꦥꦠ꧈​ꦱꦼꦩꦺꦴꦤꦺꦴꦲꦸꦒꦧꦿꦔꦱ꧀ꦱꦤ꧀ꦤꦺꦭꦤ꧀ꦲꦩ꧀ꦧꦼꦏ꧀ꦱꦶꦪꦤꦺ꧉​ꦏꦺꦴꦮꦺꦧꦏꦭ꧀ꦢꦏ꧀ꦱꦼꦧꦂꦮꦿꦠꦲꦶꦁꦱꦠꦤꦃ​꧊ꦆꦱꦿꦲꦺꦭ꧀꧉​ꦧꦏꦭ꧀ꦢꦏ꧀ꦥꦼꦚ꧀ꦕꦂꦥꦼꦚ꧀ꦕꦂꦲꦶꦁꦲꦤ꧀ꦠꦫꦤꦺꦱꦼꦢꦸꦭꦸꦂꦱꦼꦢꦸꦭꦸꦂꦫꦺ꧉​

^49:8 ​꧊ꦪꦺꦲꦸꦢ꧈​ꦏꦺꦴꦮꦺꦧꦏꦭ꧀ꦢꦶꦲꦊꦩ꧀ꦢꦺꦤꦶꦁꦥꦫꦱꦼꦢꦸꦭꦸꦂꦩꦸ꧈​ꦏꦺꦴꦮꦺꦧꦏꦭ꧀ꦩ꧀ꦧꦼꦏꦸꦏ꧀ꦒꦶꦛꦺꦴꦏ꧀ꦏꦶꦁꦩꦸꦁꦱꦸꦃꦩꦸ꧈​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦩꦸꦧꦏꦭ꧀ꦤꦸꦁꦏꦸꦭ꧀ꦩꦫꦁꦏꦺꦴꦮꦺ꧉​

^49:9 ​꧊ꦪꦺꦲꦸꦢꦏꦪꦲꦤꦏ꧀ꦏꦺꦱꦶꦔ꧈​ꦱꦮꦶꦱ꧀ꦱꦺꦩꦠꦺꦤ꧀ꦤꦶꦩꦁꦱꦤꦺꦧꦚ꧀ꦗꦸꦂꦧꦭꦶꦩꦼꦚꦁꦥꦤ꧀ꦝꦼꦭꦶꦏ꧀ꦏꦤ꧀ꦤꦺ꧈​ꦔꦸꦭꦺꦠ꧀ꦧꦚ꧀ꦗꦸꦂꦠꦸꦫꦸ꧉​ꦱꦥꦱꦶꦁꦮꦤꦶꦔ꧀ꦒꦼꦥꦺꦴꦏ꧀?

^49:10​꧊ꦪꦺꦲꦸꦢꦧꦏꦭ꧀ꦚꦼꦏꦼꦭ꧀ꦥꦔ꧀ꦮꦱꦤꦺꦏꦼꦥꦿꦧꦺꦴꦤ꧀꧈​ꦠꦸꦫꦸꦤ꧀ꦤꦺꦧꦏꦭ꧀ꦲꦤꦱꦶꦁꦢꦢꦶꦫꦗꦲꦶꦁꦱꦼꦭꦮꦱ꧀ꦭꦮꦱ꧀ꦱꦺ꧉​ꦧꦁꦱꦧꦁꦱꦧꦏꦭ꧀ꦥꦝꦱꦲꦺꦴꦱ꧀ꦧꦸꦭꦸꦧꦼꦏ꧀ꦠꦶꦩꦫꦁꦝꦺꦮꦺꦏ꧀ꦏꦺ꧈​ꦱꦂꦠꦚꦼꦩ꧀ꦧꦃꦭꦤ꧀ꦱꦸꦗꦸꦢ꧀ꦲꦤꦲꦶꦁꦔꦉꦥ꧀ꦥꦺ꧉​

^49:11ꦮꦶꦠ꧀ꦲꦁꦒꦸꦂꦱꦶꦁꦧꦼꦕꦶꦏ꧀ꦝꦺꦮꦺꦢꦶꦲꦼꦁꦒꦺꦴꦚꦚ꧀ꦕꦁꦏꦸꦭ꧀ꦢꦶꦤꦺ꧈​ꦥꦼꦔꦁꦒꦺꦴꦤꦺꦢꦶꦏꦸꦩ꧀ꦧꦃꦲꦶꦁꦲꦁꦒꦸꦂ꧈​ꦱꦶꦁꦲꦧꦁꦔꦺꦏꦪꦒꦼꦠꦶꦃ꧉​

^49:12ꦩꦿꦶꦥꦠ꧀ꦠꦺꦩ꧀ꦧꦿꦤꦁꦩꦼꦂꦒꦔꦺꦴꦩ꧀ꦧꦺꦲꦁꦒꦸꦂ꧈​ꦲꦸꦤ꧀ꦠꦸꦤꦺꦥꦸꦠꦶꦃꦩꦼꦂꦒꦔꦺꦴꦩ꧀ꦧꦺꦱꦸꦱꦸ꧉​

^49:13​꧊ꦗ꦳ꦺꦧꦸꦭꦺꦴꦤ꧀ꦧꦏꦭ꧀ꦩꦁꦒꦺꦴꦤ꧀ꦲꦶꦁꦥꦶꦁꦒꦶꦂꦫꦶꦁꦱꦼꦒꦫ꧉​ꦥꦿꦲꦸꦥꦿꦲꦸꦧꦏꦭ꧀ꦥꦝꦭꦧꦸꦃꦲꦶꦁꦥꦼꦭꦧꦸꦃꦲꦤ꧀ꦤꦺ꧉​ꦮꦶꦭꦪꦃꦲꦺꦗꦼꦩ꧀ꦧꦂꦫꦺꦧꦏꦭ꧀ꦠꦼꦏꦤ꧀ꦠꦥꦼꦭ꧀ꦮꦠꦼꦱ꧀ꦱꦺ​꧊ꦱꦶꦢꦺꦴꦤ꧀꧉​

^49:14​꧊ꦆꦱꦏꦂ꧈​ꦏꦪꦏꦸꦭ꧀ꦢꦶꦱꦶꦁꦫꦺꦴꦱ꧈​ꦔ꧀ꦭꦺꦩ꧀ꦥꦿꦏ꧀ꦲꦶꦁꦲꦤ꧀ꦠꦫꦤꦺꦏꦫꦸꦁꦏꦫꦸꦁꦩꦺꦴꦩꦺꦴꦠ꧀ꦠꦤ꧀꧉​

^49:15ꦪꦺꦤ꧀ꦮꦼꦫꦸꦃꦥꦁꦒꦺꦴꦤ꧀ꦤꦤ꧀ꦱꦶꦁꦧꦼꦕꦶꦏ꧀ꦏꦁꦒꦺꦴꦔꦱꦺꦴꦭꦤ꧀ꦠꦤꦃꦱꦶꦁꦚꦼꦤꦼꦁꦔꦏꦺ꧈​ꦒꦼꦒꦼꦂꦫꦺꦧꦚ꧀ꦗꦸꦂꦩꦼꦤ꧀ꦝꦏ꧀꧈​ꦤꦩ꧀ꦥꦤꦶꦩꦺꦴꦩꦺꦴꦠ꧀ꦠꦤ꧀꧈​ꦩꦸꦭꦤꦺꦢꦶꦥꦼꦏ꧀ꦱꦚꦩ꧀ꦧꦸꦠ꧀ꦒꦮꦺꦏꦪꦧꦠꦸꦂꦠꦸꦏꦺꦴꦤ꧀꧉​

^49:16ꦢꦺꦤꦺꦏꦺꦴꦮꦺ​꧊ꦝꦤ꧀꧈​ꦧꦏꦭ꧀ꦢꦢꦶꦲꦏꦶꦩ꧀ꦲꦶꦁꦲꦤ꧀ꦠꦫꦤꦺꦧꦁꦱꦩꦸ꧈​ꦠꦊꦂꦩꦸꦧꦏꦭ꧀ꦲꦺꦴꦫꦏꦭꦃꦏꦫꦺꦴꦠꦊꦂꦠꦊꦂꦭꦶꦪꦤꦺꦲꦶꦁ​꧊ꦆꦱꦿꦲꦺꦭ꧀꧉​

^49:17ꦏꦺꦴꦮꦺꦏꦪꦲꦸꦭꦲꦶꦁꦥꦶꦁꦒꦶꦂꦢꦭꦤ꧀꧈​ꦲꦸꦭꦱꦶꦁꦩꦤ꧀ꦢꦶꦲꦶꦁꦥꦶꦁꦒꦶꦂꦭꦸꦫꦸꦁ꧈​ꦱꦶꦁꦚꦺꦴꦏꦺꦴꦠ꧀ꦠꦸꦁꦏꦏ꧀ꦏꦺꦗꦫꦤ꧀꧈​ꦔꦤ꧀ꦠꦶꦱꦶꦁꦤꦸꦁꦒꦁꦏꦼꦗꦸꦁꦏꦼꦭ꧀꧉​

^49:18‘ꦝꦸꦃꦄꦭ꧀ꦭꦃ꧈​ꦏꦮꦶꦭꦸꦗꦼꦁꦔꦤ꧀ꦱꦏꦶꦁꦥꦢꦸꦏ꧈​ꦩꦼꦤꦶꦏꦲꦶꦁꦏꦁꦏꦸꦭꦲꦗꦼꦁꦲꦗꦼꦁ꧉’​

^49:19​꧊ꦒꦢ꧀꧈​ꦏꦺꦴꦮꦺꦧꦏꦭ꧀ꦢꦶꦫꦩ꧀ꦥꦺꦴꦒ꧀꧈​ꦤꦁꦔꦶꦁꦏꦺꦴꦮꦺꦧꦏꦭ꧀ꦒꦼꦤ꧀ꦠꦶꦔꦿꦩ꧀ꦥꦺꦴꦒ꧀꧉​

^49:20​꧊ꦄꦱꦾꦺꦂ꧈​ꦥꦊꦩꦃꦲꦤ꧀ꦩꦸꦧꦏꦭ꧀ꦩꦼꦠꦺꦴꦏ꧀ꦏꦏꦺꦥꦔꦤ꧀ꦔꦤ꧀ꦠꦶꦭꦸꦧꦺꦂ꧈​ꦥꦔꦤ꧀ꦱꦶꦁꦥꦤ꧀ꦠꦼꦱ꧀ꦢꦶꦝꦲꦂꦥꦫꦫꦗ꧉​

^49:21​꧊ꦤꦥ꦳꧀ꦠꦭꦶ꧈​ꦏꦪꦩꦼꦚ꧀ꦗꦁꦔꦤ꧀ꦲꦶꦁꦲꦭꦱ꧀꧈​ꦲꦤꦏ꧀ꦲꦤꦏ꧀ꦏꦺꦲꦥꦶꦏ꧀ꦲꦥꦶꦏ꧀ꦫꦸꦥꦤꦺ꧉​

^49:22​꧊ꦪꦸꦱꦸꦥ꦳꧀ꦏꦪꦲꦁꦒꦸꦂꦱꦶꦁꦱꦸꦧꦸꦂ꧈​ꦱꦶꦁꦠꦸꦮꦸꦃꦲꦶꦁꦱꦥꦶꦁꦒꦶꦂꦫꦶꦁꦱꦸꦩ꧀ꦧꦼꦂ꧈​ꦥꦁꦥꦁꦔꦺꦔꦽꦩ꧀ꦧꦸꦪꦸꦁꦩꦿꦩ꧀ꦧꦠ꧀ꦔ꧀ꦭꦁꦏꦃꦲꦶꦥꦒꦼꦂ꧉​

^49:23ꦢꦶꦠꦼꦩ꧀ꦥꦸꦃꦢꦺꦤꦶꦁꦩꦸꦁꦱꦸꦃꦲꦺ꧈​ꦢꦶꦲꦺꦴꦪꦏ꧀ꦔꦁꦒꦺꦴꦒꦼꦤ꧀ꦝꦺꦮꦭꦤ꧀ꦥꦤꦃ꧈​

^49:24ꦤꦁꦔꦶꦁꦥꦤꦃꦲꦺ꧌​꧊ꦪꦸꦱꦸꦥ꦳꧀꧍​ꦥꦁꦒꦃ꧈​ꦭꦤ꧀ꦊꦔꦼꦤꦺꦠꦼꦠꦼꦥ꧀ꦫꦺꦴꦱ꧈​ꦩꦼꦂꦒꦢꦶꦱꦤ꧀ꦠꦺꦴꦱꦏ꧀ꦏꦏꦺꦢꦺꦤꦶꦁꦲꦭ꧀ꦭꦃꦲꦺ​꧊ꦪꦏꦸꦧ꧀ꦏꦁꦩꦲꦏ꧀ꦮꦱ꧈​ꦢꦺꦤꦶꦁꦥꦔꦺꦴꦤ꧀꧈​ꦥꦼꦔꦪꦺꦴꦩ꧀ꦩꦤ꧀ꦤꦺ​꧊ꦆꦱꦿꦲꦺꦭ꧀꧉​

^49:25ꦲꦭ꧀ꦭꦃꦲꦺꦧꦥꦏ꧀ꦩꦸꦩꦶꦠꦸꦭꦸꦁꦔꦶꦏꦺꦴꦮꦺ꧉​ꦏꦁꦩꦲꦏ꧀ꦮꦱꦩ꧀ꦧꦼꦂꦏꦃꦲꦶꦏꦺꦴꦮꦺ꧈​ꦱꦿꦤꦲꦸꦢꦤ꧀ꦱꦏꦲꦶꦁꦭꦔꦶꦠ꧀꧈​ꦭꦤ꧀ꦱꦸꦩ꧀ꦧꦼꦂꦱꦏꦲꦶꦁꦝꦱꦂꦫꦺꦧꦸꦩꦶ꧉​ꦢꦶꦥꦫꦶꦁꦔꦶꦲꦤꦏ꧀ꦭꦤ꧀ꦫꦗꦏꦪ꧈​

^49:26ꦒꦤ꧀ꦢꦸꦩ꧀ꦭꦤ꧀ꦏꦼꦏꦼꦩ꧀ꦧꦁꦔꦤ꧀꧉​ꦒꦸꦤꦸꦁꦒꦸꦤꦸꦁꦱꦶꦁꦮꦶꦱ꧀ꦠꦸꦮꦧꦔꦼꦠ꧀꧈​ꦧꦫꦁꦧꦫꦁꦱꦶꦁꦚꦼꦤꦼꦁꦔꦏꦺꦱꦏꦒꦸꦤꦸꦁꦏꦭꦁꦒꦼꦁꦔꦤ꧀꧉​ꦩꦸꦒꦩꦸꦒꦧꦼꦂꦏꦃꦩꦲꦸꦏꦧꦺꦃꦠꦸꦩꦸꦫꦸꦤ꧀ꦲꦶꦁꦱꦶꦫꦃꦲꦺ​꧊ꦪꦸꦱꦸꦥ꦳꧀ꦭꦤ꧀ꦲꦶꦁꦲꦼꦩ꧀ꦧꦸꦤ꧀ꦲꦼꦩ꧀ꦧꦸꦤꦺ꧉​ꦩꦼꦂꦒꦝꦺꦮꦺꦏ꧀ꦏꦺꦱꦶꦁꦢꦶꦥꦶꦭꦶꦃꦱꦏꦲꦶꦁꦲꦤ꧀ꦠꦫꦤꦺꦱꦼꦢꦸꦭꦸꦂꦱꦼꦢꦸꦭꦸꦂꦫꦺ꧉​

^49:27​꧊ꦧꦺꦚꦩꦶꦤ꧀꧈​ꦏꦪꦲꦱꦸꦲꦗꦒ꧀ꦱꦶꦁꦒꦭꦏ꧀;ꦲꦺꦱꦸꦏ꧀ꦒꦺꦴꦭꦺꦏ꧀ꦩꦁꦱꦤ꧀꧈​ꦱꦺꦴꦫꦺꦤꦺꦔꦼꦩꦃꦔꦼꦩꦃꦔꦤ꧀ꦠꦶꦭꦸꦝꦼꦱ꧀꧉"​

^49:28ꦏꦸꦮꦶꦏꦧꦺꦃꦠꦊꦂꦫꦺ​꧊ꦆꦱꦿꦲꦺꦭ꧀꧈​ꦕꦕꦃꦲꦺꦫꦺꦴꦭꦱ꧀꧈​ꦭꦤ꧀ꦢꦶꦱꦼꦧꦸꦠ꧀ꦢꦺꦤꦶꦁꦧꦥꦏ꧀ꦤꦺꦤꦭꦶꦏꦲꦤ꧀ꦢꦸꦩ꧀ꦧꦼꦂꦏꦃꦩꦫꦁꦲꦤꦏ꧀ꦲꦤꦏ꧀ꦏꦺ꧈​ꦱꦧꦼꦤ꧀ꦲꦤꦏ꧀ꦢꦶꦧꦼꦂꦏꦃꦲꦶꦝꦺꦮꦺꦝꦺꦮꦺ꧉​

^49:29ꦱꦮꦶꦱ꧀ꦱꦺꦏꦸꦮꦶ​꧊ꦪꦏꦸꦧ꧀ꦧꦚ꧀ꦗꦸꦂꦮꦼꦭꦶꦁꦏꦫꦺꦴꦲꦤꦏ꧀ꦲꦤꦏ꧀ꦏꦺꦩꦼꦁꦏꦺꦤꦺ꧈​"ꦲꦺꦴꦫꦱꦸꦮꦺꦩꦼꦤꦺꦃꦲꦏꦸꦧꦏꦭ꧀ꦠꦶꦁꦒꦭ꧀ꦢꦺꦴꦚ꧈​ꦏꦪꦥꦫꦊꦭꦸꦲꦸꦂꦏꦸ꧉​ꦩ꧀ꦧꦺꦱꦸꦏ꧀ꦲꦏꦸꦏꦸꦧꦸꦂꦫꦼꦤ꧀ꦲꦶꦁꦏꦸꦧꦸꦂꦫꦤ꧀ꦤꦺꦊꦭꦸꦲꦸꦂꦏꦸ꧈​ꦲꦶꦁꦒꦸꦮ꧈​ꦱꦶꦁꦲꦤꦲꦶꦁꦥꦊꦩꦃꦲꦤ꧀ꦤꦺ​꧊ꦌꦥ꦳ꦿꦺꦴꦤ꧀꧈​ꦮꦺꦴꦁ​꧊ꦲꦺꦠ꧀ꦏꦲꦺ꧉​

^49:30ꦲꦶꦁꦒꦸꦮ​꧊ꦩꦃꦥꦺꦭ꧈​ꦱꦮꦺꦠꦤ꧀ꦤꦺ​꧊ꦩꦩꦿꦺ꧈​ꦲꦶꦁꦠꦤꦃ​꧊ꦏꦺꦤꦲꦤ꧀꧉​ꦒꦸꦮꦏꦸꦮꦶꦮꦶꦱ꧀ꦢꦶꦠꦸꦏꦸ​꧊ꦄꦧꦿꦲꦩ꧀ꦱꦏ​꧊ꦌꦥ꦳ꦿꦺꦴꦤ꧀꧈​ꦢꦶꦒꦮꦺꦏꦸꦧꦸꦂꦫꦤ꧀꧉​

^49:31​꧊ꦄꦧꦿꦲꦩ꧀ꦭꦤ꧀​꧊ꦱꦫꦃ꧈​​꧊ꦆꦱ꧀ꦏꦏ꧀ꦭꦤ꧀​꧊ꦫꦶꦧ꧀ꦏꦃꦮꦶꦱ꧀ꦥꦝꦢꦶꦏꦸꦧꦸꦂꦲꦤꦲꦶꦁꦏꦺꦴꦤꦺꦴ꧉​​꧊ꦭꦺꦪꦲꦸꦒꦢꦏ꧀ꦏꦸꦧꦸꦂꦲꦶꦁꦏꦤ꧉​

^49:32ꦥꦊꦩꦃꦲꦤ꧀ꦭꦤ꧀ꦒꦸꦮꦏꦸꦮꦶꦮꦶꦱ꧀ꦢꦶꦠꦸꦏꦸꦱꦏꦮꦺꦴꦁ​꧊ꦲꦺꦠ꧀꧉​ꦲꦏꦸꦏꦸꦧꦸꦂꦫꦼꦤ꧀ꦲꦤꦲꦶꦁꦏꦺꦴꦤꦺꦴꦲꦸꦒ꧉"​

^49:33ꦱꦮꦶꦱ꧀ꦱꦺꦤꦶꦁꦒꦭ꧀ꦮꦼꦭꦶꦁꦩꦫꦁꦲꦤꦏ꧀ꦲꦤꦏ꧀ꦏꦺ꧈​​꧊ꦪꦏꦸꦧ꧀ꦧꦚ꧀ꦗꦸꦂꦠꦸꦫꦺꦴꦤ꧀ꦭꦤ꧀ꦠꦶꦭꦂꦢꦺꦴꦚ꧉​