Jv/Alkitab/Purwaning Dumadi/8

^8:1 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦺꦔꦼꦠ꧀ꦠꦶꦩꦫꦁ​꧊ꦤꦸꦃꦭꦤ꧀ꦩꦫꦁꦱꦏꦺꦃꦲꦶꦁꦏꦺꦮꦤ꧀ꦱꦶꦁꦥꦝꦩꦺꦭꦸꦲꦤꦲꦶꦁꦥꦿꦲꦸ꧉​ꦩꦸꦭꦤꦺꦧꦚ꧀ꦗꦸꦂꦤꦼꦏꦏ꧀ꦏꦏꦺꦲꦔꦶꦤ꧀ꦲꦤꦲꦶꦁꦧꦸꦩꦶ꧈​ꦠꦼꦩꦃꦧꦚꦸꦤꦺꦮꦶꦮꦶꦠ꧀ꦱꦸꦫꦸꦢ꧀꧉​

^8:2 ꦏꦫꦺꦴꦢꦺꦤꦺꦱꦸꦩ꧀ꦧꦼꦂꦫꦶꦁꦱꦼꦒꦫꦲꦶꦁꦱꦔꦶꦱꦺꦴꦂꦫꦶꦁꦧꦸꦩꦶꦭꦤ꧀ꦭꦮꦁꦔꦶꦁꦭꦔꦶꦠ꧀ꦏꦧꦺꦃꦥꦝꦏꦥꦼꦥꦼꦠ꧀ꦠꦤ꧀꧈​ꦲꦸꦢꦤ꧀ꦤꦺꦢꦼꦉꦱ꧀ꦧꦚ꧀ꦗꦸꦂꦠꦼꦫꦁ꧉​

^8:3 ꦧꦚꦸꦤꦺꦤꦸꦭꦶꦱꦸꦫꦸꦢ꧀ꦱꦗꦿꦺꦴꦤꦺꦱꦠꦸꦱ꧀ꦱꦺꦏꦼꦠ꧀ꦢꦶꦤ꧉​

^8:4 ꦮꦱꦤꦤꦭꦶꦏꦱꦱꦶꦏꦥꦶꦠꦸꦠꦁꦒꦭ꧀ꦭꦺꦥꦶꦁꦥꦶꦠꦸꦭꦱ꧀ꦥꦿꦲꦸꦤꦺꦏꦤ꧀ꦝꦱ꧀ꦲꦤꦲꦶꦁꦥꦼꦒꦸꦤꦸꦁꦔꦤ꧀ꦠꦤꦃ​꧊ꦄꦫꦫꦠ꧀꧉​

^8:5 ꦧꦚꦸꦤꦺꦱꦁꦱꦪꦱꦸꦫꦸꦢ꧀ꦔꦤ꧀ꦠꦶꦠꦼꦏꦤ꧀ꦱꦱꦶꦏꦱꦼꦥꦸꦭꦸꦃ꧉​ꦤꦭꦶꦏꦠꦁꦒꦭ꧀ꦱꦶꦗꦶꦱꦱꦶꦏꦱꦼꦥꦸꦭꦸꦃꦥꦸꦕꦏ꧀ꦥꦸꦕꦏ꧀ꦏꦺꦒꦸꦤꦸꦁꦒꦸꦤꦸꦁꦮꦶꦮꦶꦠ꧀ꦥꦝꦏꦠꦺꦴꦤ꧀꧉​

^8:6 ꦱꦮꦶꦱ꧀ꦱꦺꦥꦠꦁꦥꦸꦭꦸꦃꦢꦶꦤ꧈​​꧊ꦤꦸꦃꦧꦚ꧀ꦗꦸꦂꦔꦼꦔꦏ꧀ꦏꦏꦺꦗꦼꦤ꧀ꦝꦺꦭꦤꦺꦥꦿꦲꦸ꧈​

^8:7 ꦭꦤ꧀ꦔꦼꦕꦸꦭ꧀ꦭꦏꦺꦩꦤꦸꦏ꧀ꦒꦒꦏ꧀꧉​ꦩꦤꦸꦏ꧀ꦩꦲꦸꦲꦺꦴꦫꦧꦭꦶ꧈​ꦤꦁꦔꦶꦁꦩꦧꦸꦂꦩꦿꦤꦩꦿꦺꦤꦺꦔꦤ꧀ꦠꦶꦧꦚꦸꦤꦺꦲꦱꦠ꧀ꦧꦧꦂꦥꦶꦱꦤ꧀꧉​

^8:8 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ​꧊ꦤꦸꦃꦔꦼꦕꦸꦭ꧀ꦭꦏꦺꦩꦤꦸꦏ꧀ꦢꦫ꧈​ꦲꦉꦥ꧀ꦩꦼꦫꦸꦃꦲꦶꦲꦥꦧꦚꦸꦤꦺꦮꦶꦱ꧀ꦱꦸꦫꦸꦢ꧀ꦠꦼꦩꦼꦤ꧀ꦤꦤ꧀꧉​

^8:9 ꦤꦁꦔꦶꦁꦱꦫꦺꦃꦤꦺꦧꦚꦸꦤꦺꦲꦶꦱꦶꦃꦤꦸꦠꦸꦥ꧀ꦥꦶꦱꦭꦸꦩꦃꦲꦺꦧꦸꦩꦶ꧈​ꦩꦤꦸꦏ꧀ꦢꦫꦩꦲꦸꦲꦺꦴꦫꦲꦺꦴꦭꦺꦃꦥꦺꦚ꧀ꦕꦺꦴꦏ꧀ꦏꦤ꧀꧈​ꦩꦸꦭꦤꦺꦩ꧀ꦧꦭꦺꦤ꧀ꦤꦶ​꧊ꦤꦸꦃꦩꦼꦚꦁꦥꦿꦲꦸ꧉​​꧊ꦤꦸꦃꦧꦚ꧀ꦗꦸꦂꦔꦼꦒꦂꦫꦏꦺꦠꦔꦤ꧀ꦤꦺ꧈​ꦢꦫꦤꦺꦢꦶꦕꦼꦏꦼꦭ꧀ꦭꦤ꧀ꦢꦶꦊꦧꦺꦴꦏ꧀ꦏꦏꦺꦩꦼꦤꦺꦃꦲꦶꦁꦥꦿꦲꦸ꧉​

^8:10 ​꧊ꦤꦸꦃꦤꦸꦭꦶꦔꦼꦤ꧀ꦠꦺꦤ꧀ꦤꦶꦥꦶꦠꦸꦁꦢꦶꦤꦲꦼꦁꦏꦱ꧀꧈​ꦧꦚ꧀ꦗꦸꦂꦢꦫꦤꦺꦢꦶꦲꦼꦕꦸꦭ꧀ꦭꦏꦺꦩꦼꦤꦺꦃ꧉​

^8:11 ꦧꦉꦁꦮꦪꦃꦱꦺꦴꦫꦺꦢꦫꦩꦲꦸꦠꦼꦏ꧈​ꦕꦸꦕꦸꦏ꧀ꦏꦺꦔ꧀ꦒꦺꦴꦤ꧀ꦝꦺꦴꦭ꧀ꦒꦺꦴꦝꦺꦴꦁꦗ꦳ꦲꦶꦠꦸꦤ꧀ꦱꦶꦁꦲꦶꦱꦶꦃꦱꦼꦒꦼꦂ꧈​ꦩꦸꦭꦤꦺ​꧊ꦤꦸꦃꦔꦼꦂꦠꦶꦪꦺꦤ꧀ꦧꦚꦸꦤꦺꦮꦶꦱ꧀ꦱꦸꦫꦸꦢ꧀꧉​

^8:12 ꦱꦮꦶꦱ꧀ꦱꦺꦏꦸꦮꦶ​꧊ꦤꦸꦃꦔꦼꦤ꧀ꦠꦺꦤ꧀ꦤꦶꦩꦼꦤꦺꦃꦥꦶꦠꦸꦁꦢꦶꦤꦭꦮꦱ꧀ꦱꦺ꧉​ꦤꦸꦭꦶꦢꦫꦤꦺꦢꦶꦲꦼꦕꦸꦭ꧀ꦭꦏꦺꦩꦼꦤꦺꦃ꧉​ꦢꦫꦩꦲꦸꦲꦺꦴꦫꦧꦭꦶꦩꦼꦤꦺꦃ꧉​

^8:13 ꦤꦭꦶꦏ​꧊ꦤꦸꦃꦲꦸꦩꦸꦂ601ꦠꦲꦸꦤ꧀꧈​ꦠꦁꦒꦭ꧀ꦱꦶꦗꦶꦱꦱꦶꦏꦥꦶꦱꦤ꧀꧈​ꦧꦚꦸꦤꦺꦮꦶꦱ꧀ꦱꦸꦫꦸꦢ꧀ꦧꦧꦂꦥꦶꦱꦤ꧀꧉​​꧊ꦤꦸꦃꦤꦸꦭꦶꦩ꧀ꦧꦸꦏꦏ꧀ꦥꦪꦺꦴꦤ꧀ꦤꦺꦥꦿꦲꦸ꧈​ꦱꦂꦠꦔꦮꦱ꧀ꦱꦏꦺꦏꦶꦮꦠꦼꦔꦼꦤ꧀ꦤꦺ꧉​ꦊꦩꦃꦲꦺꦮꦶꦱ꧀ꦏꦠꦺꦴꦤ꧀ꦲꦱꦠ꧀꧉​

^8:14 ꦤꦭꦶꦏꦠꦁꦒꦭ꧀ꦥꦶꦠꦸꦭꦶꦏꦸꦂꦱꦱꦶꦱꦶꦁꦏꦥꦶꦤ꧀ꦝꦺꦴ꧈​ꦧꦸꦩꦶꦮꦶꦱ꧀ꦒꦫꦶꦁꦠꦼꦩꦼꦤ꧀ꦤꦤ꧀꧉​

^8:15 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦤꦸꦃ꧈​

^8:16 "ꦥꦝꦩꦼꦠꦸꦮꦱꦏꦥꦿꦲꦸ꧈​ꦏꦺꦴꦮꦺ꧈​ꦧꦺꦴꦗꦺꦴꦩꦸ꧈​ꦲꦤꦏ꧀ꦲꦤꦏ꧀ꦩꦸꦭꦤ꧀ꦥꦫꦲꦤꦏ꧀ꦩꦤ꧀ꦠꦸꦩꦸ꧉​

^8:17 ꦱꦼꦩꦺꦴꦤꦺꦴꦲꦸꦒꦱꦫꦸꦥꦤꦺꦩꦤꦸꦏ꧀ꦭꦤ꧀ꦏꦺꦮꦤ꧀꧈​ꦱꦸꦥꦪꦥꦝꦧꦼꦧꦿꦤꦃꦲꦤ꧀ꦭꦤ꧀ꦠꦁꦏꦂꦠꦸꦩꦁꦏꦂꦔꦩ꧀ꦧꦿꦲꦩ꧀ꦧꦿꦲꦤꦲꦶꦁꦧꦸꦩꦶ꧉"​

^8:18 ​꧊ꦤꦸꦃꦧꦚ꧀ꦗꦸꦂꦩꦼꦠꦸꦱꦏꦲꦶꦁꦥꦿꦲꦸ꧈​ꦧꦼꦧꦉꦁꦔꦤ꧀ꦏꦫꦺꦴꦧꦺꦴꦗꦺꦴꦤꦺ꧈​ꦲꦤꦏ꧀ꦲꦤꦏ꧀ꦏꦺꦭꦤ꧀ꦥꦫꦲꦤꦏ꧀ꦩꦤ꧀ꦠꦸꦤꦺ꧉​

^8:19 ꦱꦫꦸꦥꦤꦺꦏꦺꦮꦤ꧀ꦭꦤ꧀ꦩꦤꦸꦏ꧀ꦤꦸꦭꦶꦥꦝꦩꦼꦠꦸꦱꦏꦲꦶꦁꦥꦿꦲꦸ꧈​ꦱꦥꦤ꧀ꦛꦱꦥꦤ꧀ꦛꦩꦤꦸꦠ꧀ꦗꦶꦤꦶꦱ꧀ꦱꦺ꧉​

^8:20 ​꧊ꦤꦸꦃꦧꦚ꧀ꦗꦸꦂꦪꦱꦩꦼꦱ꧀ꦧꦺꦃꦏꦺꦴꦚ꧀ꦗꦸꦏ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ;ꦤꦸꦭꦶꦚ꧀ꦗꦸꦥꦸꦏ꧀ꦱꦏꦥꦤꦸꦁꦒꦭ꧀ꦭꦤ꧀ꦤꦺꦗꦶꦤꦶꦱ꧀ꦏꦺꦮꦤ꧀ꦭꦤ꧀ꦩꦤꦸꦏ꧀ꦱꦶꦁꦏꦭꦭ꧀꧈​ꦢꦶꦕꦲꦺꦴꦱ꧀ꦱꦏꦺꦢꦢꦶꦏꦸꦂꦧꦤ꧀ꦲꦺꦴꦧꦂꦫꦤ꧀ꦲꦤꦲꦶꦁꦩꦼꦱ꧀ꦧꦺꦃꦩꦲꦸ꧉​

^8:21 ꦒꦤ꧀ꦢꦲꦫꦸꦩ꧀ꦱꦶꦁꦱꦸꦩꦼꦧꦂꦱꦏꦏꦸꦂꦧꦤ꧀ꦲꦺꦴꦧꦂꦫꦤ꧀ꦩꦲꦸꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦒꦸꦱ꧀ꦠꦶꦄꦭ꧀ꦭꦃ꧉​ꦥꦚ꧀ꦗꦼꦤꦼꦁꦔꦤ꧀ꦤꦺꦤꦸꦭꦶꦔꦤ꧀ꦢꦶꦏꦩꦼꦁꦏꦺꦤꦺ꧈​"ꦲꦶꦁꦱꦼꦧꦚ꧀ꦗꦸꦂꦫꦺꦲꦏꦸꦲꦺꦴꦫꦧꦏꦭ꧀ꦚꦼꦥꦠꦤꦶꦧꦸꦩꦶꦲꦶꦏꦶꦩꦼꦂꦒꦥꦼꦁꦒꦮꦺꦤꦺꦩꦤꦸꦁꦱ꧈​ꦱꦶꦁꦲꦺꦴꦧꦃꦲꦺꦴꦱꦶꦏ꧀ꦏꦺꦲꦠꦶꦤꦺꦲꦭꦮꦶꦮꦶꦠ꧀ꦕꦶꦭꦶꦏ꧀ꦩꦸꦭ꧉​ꦲꦏꦸꦮꦶꦱ꧀ꦲꦺꦴꦫꦧꦏꦭ꧀ꦤꦸꦩ꧀ꦥꦼꦱ꧀ꦩꦼꦤꦺꦃꦱꦫꦸꦥꦤꦺꦠꦶꦠꦃꦏꦁꦲꦸꦫꦶꦥ꧀ꦏꦪꦏꦁꦮꦸꦱ꧀ꦢꦏ꧀ꦠꦶꦤ꧀ꦢꦏ꧀ꦏꦏꦺ꧉​

^8:22 ꦱꦼꦭꦮꦱ꧀ꦱꦺꦩꦼꦱ꧀ꦛꦶꦧꦏꦭ꧀ꦲꦺꦴꦫꦏꦼꦤ꧀ꦝꦠ꧀ꦲꦤꦩꦁꦱꦚꦼꦧꦂꦭꦤ꧀ꦩꦁꦱꦥꦤꦺꦤ꧀꧈​ꦩꦁꦱꦲꦠꦶꦱ꧀ꦭꦤ꧀ꦩꦁꦱꦥꦤꦱ꧀꧈​ꦏꦼꦠꦶꦒꦭꦤ꧀ꦉꦤ꧀ꦝꦼꦁ꧈​ꦫꦶꦤꦭꦤ꧀ꦮꦼꦔꦶ꧉"​