Lʼ aisciöda
- Lʼ aisciöda.
De bona vëia sëise düc encö!
An alda y vëiga valʼ danö.
Lʼ invern sʼ an é con le ce tan grisc,
le monn vën desco n paraisc.
Lʼ aisciöda é sën belo gnüda.
Al é i vicí co la salüda.
Con flus na jona bel fornida,
lʼ aisciöda é en blanch iestida.
Te n iade vëgnera alerch,
y jüta reses dlunch encërch.
Arʼ á n bel cëst de flus tla man,
de düc i corusc dal anterbanch.
Dagnora vára tres y tres
y jüta flus tai urc y pres.
Y canche cösta jona vën
y vigne trognera y lën
co sʼ enfornësc con fëia jona,
da pres ciampaneles sona.
Lʼ aisciöda fora de deserc
campagnes fej y pres bi vërc.