La ćiacia
Aló, aló, mituns, impé!
Gostedʼ dër bëgn y dër assá!
Osc stlop spo atira söl spiné,
Ince valʼ toledʼ por i massalá!
Aló, aló, mituns, piun ia!
La scurité ne nes temunsʼ;
Te pëgnes, te poc, te sassaria
Ince sce tomun, plü rí orunsʼ.
Aló, aló, mituns, ci mai?
Ciodí ciaré a chisc sassuns?
Sö, sö bel dërt cun dër bun tai!
Degügn nʼ á tëma da pedruns.
Aló, aló, mituns, bel snel!
Les pizes vëigon slominan;
Ciaré nʼ ciarede a chël vicel!
Teʼ salverjins lasciunsʼ pa ion.
Aló, aló, mituns, alalt!
Infré chʼ arëis bëgn üsc cialzá
Toledʼ la maza cun le bun tlalt,
Pestedʼ tla dlacia bëgn sigurá!
Da bisca sî fat nosc stradun
Insö por chësc parëi dlacé!
Ciaredʼ insö, mai vers le valun,
Sce nʼ orëis jö por le dlaciun tacé.
Bi chic, bi chic, mituns, sentessʼ!
Palsé messunsʼ y conscidré;
Lʼ altëza, chʼ un, comé odëis,
Valgügn chiló röia bëgn dainré.
Bi chic, bi chic, mituns, palsedʼ!
Lascedʼ,che le vënt incër nos soflʼ!
Chësc gonfedé ne ves temedʼ,
Chiló la flascia y spo n bun sofl!
Bi chic, bi chic, mituns, bel plan!
Odëis iló sön chël gran piz?
Al pé n cogol mo no te n plan -
N ciamurc odëis cun corʼ dër spiz.
Bel plan, bel plan, mituns, ascoltedʼ!
Francësch, Ojep, lapró ʼci Jan,
Os jëis bel plan sot ia; ciaredʼ,
Chʼ ël nʼ aldes osc var o se vëighʼ foman!
Tres plan, tres plan, mituns, tres plan!
Rová che sarëis a i trá ia delá,
Vaghede le colp bel sëch y gran!
Tochëis, él dërt, scenó vëgnel ca.
Tö, Vijo y Sepl, pu ma bi chic!
Cüfess chiló tla büja düc!
Ara é bel vërda y zënza schic,
Restun bi nëc y dër bi süc.
pagina:64
Tolede osc ro, metele söl edl,
De vista perdʼ i nüsc nʼ podunsʼ,
Ci chʼ an ne crëi, datrai sozedel,
Mo che döt vadʼ bëgn speré orunsʼ.
Aldidʼ! pum pum! dui colp án trac,
Le ciamurc copé y destenü;
Mo, o mi bun Dî, ciaredʼ chi mac
Chʼ impede gní sö vëgn iló jö!
Iló te chël banch bel vërt tl crëp
Odü cez ái, chësc vëigon tler;
Ciaré ne ciari al zop tan sëch
Iló te chël bur y gran infer.
Dessot, dessura, dlunʼ crepuns,
Chʼ al sgricia bel a ciaré pro!
Lajö dessot chi gran valuns!
De forza de man me toma le ro.
Mo vé! sëgn frëmi, ciara sö
Por chël parëi, ci vëighi mai?
Chʼ al nes sozedʼ gran mal incö,
Me tëmi dër; ciaredʼ! ai, ai!
Dui gran variöi sitá te mʼ i é
Cun grifes, ares, bech te n iadʼ,
Düc trëi i compagns i á śëgn al ce,
Temëi me tëmi chʼ ëi sʼ un vais.
O mi bun Dî, döt é pordü!
Chʼ ëi é bel ciurns, sëgn vëighi tler;
De vigni vers y sö y injö
Saltan i vëighi te chël infer.
O ci spavënt, döt é finí!
Sparis cun scrai dër bur salvare
Tomá dal alt insciöche agní
Chʼ amez a n crëp se fala le vare!
O sëgn, bi chic, mituns, bi chic!
A tera düc! periundʼ por ëi,
Che chël bel Dî i relasce i debic!
Chësc é mi su y bun consëi.