La .alis. cizra je cinri zukte vi le selmacygu'e/xamo'o

by Lewis Caroll

i ze'a lo mentu abu sanli gi'e catlu le zdani gi'e pensi le du'u ei bazi zukte makau icabo lo selfu poi dasni le manfyta'u cu bajra cliva le ricmei to abu jinvi le du'u sy selfu kei fo le nu sy dasni lo manfyta'u i abu va'o da'i na'e bo la'e di'u ca le po'o nu viska le flira cu te cmene sy zo finpe toi gi'e cladu darxi le vorme le degycidni i vy karbi'o gau lo drata manfyta'u dasni selfu noi se flira lo cukla gi'e se kanla lo barda tai tu'a lo'e plipybanfi i le re selfu sei la alis sanji zo'u le kerfa cu pumvau gi'e cukla gacri piro le stedu i abu mutce co kucli le du'u srana makau kei

gi'e parkla lo milxe co bartu be le ricmei ki'u le nu tinju'i

i pamai la finpe selfu cu tolsa'e fi le cnita be le sy birka fe lo barda xatra noi jibni dunli sy le ka barda i sy dunda xy le drata gi'e junri tonga cusku lu fi la noltroni'u cu fityti'i fa la noltruni'u fe le nu kelcrkroke li'u i la plipybanfi selfu cu mintu fi le ka junri tonga kei gi'e milxe stika le valsi porsi gi'e refsku lu fa la noltruni'u cu fityti'i fi la noltroni'u fe le nu kelcrkroke li'u

ibabo le remei cu krobi'o rinsa simxu i lei kerfa be le remei cu xrebi'o

i la alis tai cmila mu'i la'e di'u ja'e le nu bilga le nu bajra xruti le ricmei ki'u le nu abu terpa le nu ry tirna abu i ca le nu abu cu za'ure'u mipri catlu kei ge le finpe selfu ba'o cliva gi le drata cu zutse le loldi ne'a le vorme gi'e bebna catlu fa'a le tsani

i la alis toldarsi klama le vorme gi'e darxi

i lu noda do prali le nu darxi sei la selfu cu cusku i go'i ki'u reda i pamai mi do dunli le ka zvati le mokau mlana be le vorme i remai ne'i cupra lo tai savru ja'e le nu noda kakne le nu tirna do li'u i ju'o lo tolfadni savru ca'o nenri i ru'i cmoni je senci i ru'inai barda sance tai lo'e nu lo palta a lo patxu cu porpi

i lu pe'udo'u sei la alis cusku mi nerkla ta'i ma li'u

i lu le nu do darxi cu racli sei la selfu secau le nu jundi abu kei di'a co'e va'o le nu da'i mi do sepli le vorme i mu'a va'o le nu da'i do nenri kei ge do darxi gi mi curmi le nu do barkla li'u i sy catlu le tsani ze'a le nu tavla i la alis jinvi le du'u ju'osai sy tolclite la'e di'u i lu ku'i ju'ocu'i ta na kakne co rivbi la'e di'u sei abu sezysku i lei ta kanla tai jibni le gapru be le stedu iseju ei ta spuda lo'e preti i mi nerkla ta'i ma sei abu cladu ke krefu cusku li'u

i lu mi zutse ti sei la selfu cu te pinka co'u le bavlamdei li'u

i caku le vorme be le zdani cu karbi'o i lo barda palta cu sfubu le bartu fa'asai le stedu be le selfu i py ja'aru'e pencu le sy nazbi gi'e porpi janli lo tricu poi trixe sy

i lu a le bavlamji remoi djedi li'u di'a se cusku le selfu sepi'o le mintu tonga tai le nu da'i noda fasnu

i lu mi nerkla ta'i ma sei la alis sepi'o lo lauzma tonga za'ure'u retsku li'u

i lu xu do ba'e ja'a nerkla sei le selfu cu cusku i di'u pamoi loi preti li'u

i li'a la'e di'u jetnu i ku'i la alis na nelci le nu te cusku di'u i lu oi sei abu bacru sezysku ro le danlu cu darlu i banzu le nu fenkygau li'u

i la selfu cu simlu le ka jinvi le du'u mapti le nu za'ure'u te pinka i lu mi ti ba zutse sei sy cusku ru'inaiku ze'a lo djedi be li so'i li'u

i lu ku'i ei mi ma zukte sei la alis cusku li'u

i lu lo se djica be do sei le selfu cu cusku li'u i sy co'a siclu

i lu oi noda mi prali le nu tavla ta sei la alis tolpacna cusku i ta prane bebna li'u i abu kargau le vorme gi'e nerkla

i le vorme cu pluta lo barda jupku'a noi culno lo danmo ve'a pa le fanmo kubi'i le drata i la noltroni'u cu zutse lo cibyseltuple stizu bu'u le midju gi'e kurji lo cifnu i le jukpa cu korcu ga'u le fagri gi'e jicla do'e lo barda patxu noi simlu le ka culno lo stasu

i lu ju'o pidu'e tsaprpiperi cu zvati le va stasu sei la alis noi ru'i senci cu sezysku li'u

i pidu'e boi ty zvati ju'o le vacri i la noltroni'u ji'acai cu ru'inai senci i le cifnu zo'u cy ru'i desfau senci joi kakcmoni i ro jupku'a zvati poi na senci cu du le jukpa a le barda mlatu poi zutse le fagystizu gi'e relkerlo ganra cisma

i lu e'o ko mi jungau sei la alis noi milxe terpa ri'a le nu na birti le du'u xukau le nu pamoi tavla cu clite cu cusku le du'u le do mlatu tai cisma mu'i makau li'u

i lu ta tcicymlatu sei la noltroni'u cu cusku i la'edi'u krinu i do xarju li'u

i lenu ny tcevlile bacru le romoi valsi cu mukti lenu la alis suksa plipe iku'i abu bazi jimpe ledu'u ny tavla le cifnu enai abu isemu'ibo virnu lenu di'a cusku

lu mi na djuno le du'u lo'e tcicymlatu cu roroi gancisma i ju'o mi na djuno le du'u lo'e mlatu cu ba'e kakne lo'e nu gancisma li'u

i lu roboi my kakne sei la noltroni'u cu cusku ije so'eboi my ca'a zukte li'u

i lu mi na djuno fi su'o boi my poi ca'a zukte sei la alis tceclite cusku li'u i abu mutce se pluka le nu jorne fi le nunsimtavla

i lu do na djuno so'i da sei la noltroni'u cu cusku ije la'e di'u fatci li'u

i la alis nasai nelci le tonga pe le pinka gi'e jinvi le du'u xamgu fa le nu cfagau lo drata selcasnu i le jukpa ca le nu abu troci co cuxna sy cu lebna le patxu be lo stasu le fagri gi'e co'a zukte le nu renro ro se kuspe be jy la noltroni'u ku joi le cifnu i lei fagri tirse cu pamoi ibabo jersi fa lo tansi joi palta joi palne carvi i la noltroni'u na'e jundi caji'asai le nu darxi ny i le cifnu pu ca'o tai mutce krixa ja'e le nu nalcumki fa le nu djuno le du'u xukau lei nundarxi cu crogau

i lu oi e'osai ko kurji le do se tarti sei la alis terpa dunku plipe krixa i oi uu le ta melbi nazbi li'u ca le nu lo nalfadni barda tansi cu vofli zo'a ny gi'e naru'e beirvi'u ny

i lu romu'ei le du'u roda kurji le da cuntu kei sei la noltroni'u cu rufsu cmoni cusku le munje cu zenba le ka carna sutra li'u

i lu la'e di'u na prali sei la alis noi mutce gleki le nu ka'e jarco piso'u le nu abu djuno cu cusku i ko pensi le nabmi poi la'e di'u ke'a rinka sera'a lo'e donri e lo'e nicte i ka'u le nu le terdi cu carna le jendu cu cacra li revo li'u

i lu lo'e nu catra zo'u sei la noltroni'u cu cusku ko vimcu le stedu ti li'u

i la alis xanka catlu le jukpa tezu'e le nu zgana le du'u xukau jy zukte fi le nu tinbe i ku'i le jukpe cu jicla le stasu gi'e simlu le ka na jundi iseki'ubo abu di'a cusku lu cacra li revo pe'i ji li pare pei i mi li'u

i lu oi ko mi na fanza sei la noltroni'u cu cusku i mi ka'enai renvi lo'e namcu li'u icabo ny co'a za'ure'u kurji le cifnu gi'e sanga lo sipygau simsa cy gi'e vlile desygau cy ca le fanmo be ro vlali'i

             ko rufsu tavla le do panzi
             i ko py senci sfasa
             i le nu po'o py do fanza
             cu ia te zukte krasi

                          KREFU

          (to le jukpa le cifnu cu kansa toi)

                         ua ua ua

i la noltroni'u ca le nu sanga le remoi be lei vlagri cu ca'o vlile renro le cifnu le gapru ku joi le cnita i le se kecti cmalu cu tai krixa ja'e le nu la alis cu ja'aru'e tirna lei valsi

             mi junri tavla le mi panzi
             i mi py senci sfasa
             i li'a py se pluka banzu
             i tsaprpiperi stasu

                          KREFU

                         ua ua ua

i lu ju'ido'u e'a do ti kurji sei la noltroni'u ca le nu renro le cifnu la alis cu cusku i ei mi mi bredygau le nu kansa la noltruni'u le nu kelcrkroke li'u i ny sutra cliva le kumfa i le jukpa cu renro lo tansi ny ca le nu ny barkla i ku'i ja'aru'e fliba le nu darxi

i la alis cu milxe nandu kavbu le cifnu ki'u lenu cizra seltai ke cmalu danlu gi'e tengau le birka e le jamfu fo roda i lu tai lo'e mumbircurnu sei la alis pensku li'u i le cmalu uu cu vruva'u tai lo'e jacfebmatra ca lenu abu kavbu iseki'ubo abu ze'a lo mentu be li ji'ire na kakne lo zmadu be lenu jgari

i abu zi ba le nu facki le du'u makau drani tadji le nu kurji cy to no'u le nu tongau cy ja'e lo jgena gi'e tagji jgari le cy pritu kerlo ku joi le cy zunle jamfu ja'e le nu rivbi le nu cy sezytolplo toi cu bevri cy le bartu vacri i lu lei du romu'ei le du'u mi na lebna le vi cifnu sei la alis pensi cu ba catra cy za lo djedi be li ji'ire i xu na zekri fa le nu cliva cy li'u i abu cladu cusku lei romoi valsi i le cmalu cu spuda cmoni to cy ca ba'o senci toi i lu ko na cmoni sei la alis cusku i nasai drani tadji le nu cusku li'u

i le cifnu cu za'ure'u cmoni i la alis xanka mutce catlu le flira be cy tezu'e le nu facki le du'u cy mokau i ju'o cy se nazbi lo gapfa'a noi lo'e xajyzbi cu zmadu lo'e re'azbi le ka ke'a simsa ce'u iji'a lei kanla be cy ca'o binxo lo mutce cmalu fi lo'e cifnu kanla i to'u la alis nasai nelci le jvinu be le dacti i lu ku'i ju'ocu'i ti kakcmo po'o sei abu pensi li'u i abu cu za'ure'u catlu le cy kanla tezu'e le nu facki le du'u xukau lo dirgo ba'o se klaku

i na co'e i no dirgo ba'o se klaku i lu ganai do binxo lo xarju doi dirba sei la alis junri cusku gi o'i mi do co'u srana li'u i le se kecti cmalu za'ure'u kakcmo to go'i gi'a xajycmo i na cumki fa le nu jdice toi i le remei di'a co'e ze'a lo smaji

i la alis co'a pensi sezysku lu ei mi zukte le nu mo le vi danlu kei ca le nu mi tolcliva le zdani li'u ca le nu cy cu za'ure'u cmoni tai le ka vlile kei ja'e le nu abu xalni milxe catlu le cy flira i caku na senpi i cy zmadu najenai mleca xarju i abu jinvi le du'u le nu abu ca'o bevri cy cu fenki mutce

iseki'ubo abu punji le danlu le loldi gi'e co'a mutce tolxanka le nu viska le nu dy smaji bajra fa'ane'i le ricmei i lu le cifnu romu'ei le du'u banro sei abu sezysku cu tolmelbi mutce verba i ku'i pe'i ta ca'a melbi xarju li'u i abu co'a pensi lo drata verba noi ke'a slabu abu gi'e da'i se xamgu le nu ke'a xarju i abu sezysku lu au djuno le du'u makau drani tadji le nu galfi da li'u ca le nu abu milxe se spaji le nu viska la tcicymlatu noi zutse lo jimca be lo tricu va lo mitre be li su'o

i la mlatu cu cisma po'o ca le nu viska la alis i my simlu le ka xendo sei abu pensi i ku'i my se jgalu loi clani mutce gi'e se denci lo so'isaimei iseki'ubo abu jinvi le du'u ei sinma my

i lu doi tcicymlatu li'u i abu toldarsi cfasku ki'u le nu nasai djuno le du'u xukau my nelci le cmene i ku'i my ganze'a cisma po'o i lu ua ta se pluka caku sei la alis pensi li'u i abu di'a cusku lu e'o ko mi jungau le du'u ei mi klama zo'e ti makau li'u

i lu la'e di'u jalge le du'u do djica le nu klama makau sei la mlatu cu cusku li'u

i lu tu'a makau na vajni mi y sei la alis cusku li'u

i va'o la'e di'u na vajni fa le nu do klama fo makau sei la mlatu cu cusku li'u

i lu y romu'ei le du'u mi klama ba'e da sei la alis ciksi jmina li'u

i lu ua ju'o do ca'a co'e sei la mlatu cu cusku romu'ei le du'u do cadzu ze'a lo banzu li'u

i la alis jinvi le du'u la'e di'u ka'enai te darlu iseki'ubo abu troci tu'a lo drata preti i lu loi mo prenu cu xabju le vi sruri li'u

i lu vufa'a tu sei la mlatu cu pritu xance desku cusku cu xabju la mapypre i vufa'a tu sei drata xance desku cu xabju la cibmasti cicyractu i ko vitke le do se nelci i le reda fenki li'u

i lu ku'i mi na djica le nu jbini loi fenki sei la alis te pinka li'u

i lu o'o do ka'enai rivbi sei la mlatu cu cusku i ro ma'a vi fenki i mi fenki i do fenki li'u

i lu do jinvi le du'u mi fenki kei fo ma li'u

i lu ju'o do co'e sei la mlatu cu cusku ija do na ba'o klama ti li'u

i la alis nasai jinvi le du'u la'e di'u cu je'urja'o i ku'i di'a cusku lu do jinvi le du'u do fenki kei fo ma li'u

i lu pamai sei la mlatu cu cusku lo'e gerku na fenki i iepei li'u

i lu ieru'e sei la alis cusku li'u

i lu ka'u sei la mlatu cu di'a cusku lo'e gerku cu cmoni ca lo'e nu fengu kei gi'e rebla deskygau ca lo'e nu gleki i zu'unai mi cmoni ca lo'e nu gleki kei gi'e rebla deskygau ca lo'e nu fengu iseni'ibo mi fenki li'u

i lu mi te cmene fi zo pukcmo enai zo cmoni sei la alis cusku li'u

i lu ko te cmene fi lo do se nelci sei la mlatu cu cusku i xu do kansa la noltruni'u le nu kelcrkroke ca le cabdei li'u

i lu mi mutce le ka nelci la'e di'u sei la alis cusku i ku'i mi za'o na te friti li'u

i lu do mi ba bu'u viska sei la mlatu cu cusku li'u i my canci

i la alis na mutce se spaji la'e di'u ki'u le nu abu ca'o co'a se tcaci lo'e nu loi cizra cu fasnu i la mlatu ca le nu abu catlu le pu se zvati be my cu za'ure'u tolcanci

i lu ta'o le cifnu cu mo sei la mlatu cu cusku i mi jibni tolmo'izu'e le nu te preti li'u

i lu ba'o binxo lo xarju sei la alis tai le da'i nu my fadni xruti cu lauble cusku li'u

i lu mi pu jinvi le du'u go'i sei la mlatu cu cusku li'u i za'ure'u canci

i la alis ze'i denpa gi'e xadba pacna lo'e nu za'ure'u viska my i ku'i my na tolcanci i baku abu za lo mentu be ji'ire cu di'a cadzu fa'a le se cusku se xabju be la cibmasti cicyractu i lu mi pu viska lo'e mapypre sei abu sezysku i la cibmasti cicyractu cu mutce zmadu fi le ka cinri i la'acu'i cycy ki'u le du'u ca mumymasti cu na traji fenki i na tai fenki du'i lo'e nu no'a ca le cibmasti li'u i abu ca le nu cusku di'u cu fa'aga'u catlu i la mlatu cu za'ure'u zvati gi'e zutse lo jimca be lo tricu

i lu pau do cusku zo xarju ji zo narju sei la mlatu cu cusku li'u

i lu mi pu cusku zo xarju sei la alis spuda i au do na za'o suksa canci je tolcanci i do gasnu le nu mutce le ka se cfipu li'u

i lu je'e sei la mlatu cu cusku li'u i caku my masno mutce canci

co'a

le fanmo be le rebla co'u le nu cisma noi ze'a renvi ba le nu le drata pagbu ba'o canci

i lu ue mi so'iroi viska lo'e mlatu pe secau lo'e nu cisma sei la alis pensi i ku'i ua lo'e nu cisma pe secau lo'e mlatu i traji le ka cizra kei lei se viska be mi bei ze'e le nu mi jmive li'u

i abu ze'unai klama pu le nu viska le zdani be la cibmasti cicyractu i abu jinvi le du'u drani zdani kei ki'u le nu le damtu'u cu tarmi lo'e kerlo kei e le nu le drudi cu se gacri lo'e skapi i le zdani cu tai barda ja'e le nu abu na nelci le nu jbikla pu le nu citka piso'u le zunle spisa be le mledi kei e le nu gasnu le nu abu banro lo mitre be li ji'ipimu iseva'oji'asaibo abu toldarsi milxe cadzu fa'a zy gi'e sezysku lu ru'a cycy ca'a traji fenki i aunairu'e mi seba'i pu klama le nu viska la mapypre li'u