Le tre raritàa de Cremouna
Alfons Mandell (1870-1927)
Le tre raritàa de Cremouna
de All'ombra del Tourazz (1898)
De eùna s'è pers el stamp, a l'è peu quélla
Cremouna incoo l'è coume n'alter siit;
l' 'n caso se se vèd na qualch putélla
che g'abbia miga el stomech imbouttiit.
J'alter dòo j'è anmmò precise. El tourròon
l'è propia sémper bòon, l'è 'n bèll goudiil,
e 'l piaas a teutt el mond; el tourrazzòon
l'è chi dritt coume 'n fus, l'è bèll vediil.
Ma me crèdi che incoo se poudaria
bèen métteghe na quarta raritàa:
teutta Cremoja g'ha na poulizia
che i fouresteer i se ghe pool specciàa;
e questa, crediil peur, la na vaal cent
de teutte j'altre, almen se se riflètt
che la nettisia la ghe dà a la gent
quatter quint de salute e de rispètt.