Libre de Memorias/1341

L'an MCCCXLI foron Cossols

Senhor Augie de Fancha. - Senor Ricart Roart. - Senhor Johan Barryeira. - Senhor Amalric Lieura. - Senhor Miquel Folcran. - Senhor Johan Nadal. - Senhor Mathieu Vidal.

Aquel an mezeis dessus dig foron autriadas letras per lo Rey de Franssa nostre senhor lo Rey Phelip als senhors Cossols, et a lur honorable cosselh de la viela de Bezes, que son en la manieyra que es aissi escrig; et en la manieyra que se seq, es estat publicat et cridat a vos de trompa; que os s obreditz senhors Cossols que la hora eron, aguezon et empetrezo las lettras dessus digchas, que aguesso fieyra en la viela de Bezes per tot temps, et sus aisso los sobreditz senhors Cossols feron gravar, et á votz de trompa las crideron a totas vielas et castels et a totz merchans aissi quan se seq.

Premieyramen autriam per nos et per nostres successors Cossols que per tot temps seran en la dicha viela de Bezes, als senhors merchanz, comprados et vendedos de Narbona, La Grassa, Carcassona, Lymos, Fangaus, Montolieu, Viela Pentha, Avinhonet, Tholosa, San Paul, San Felix, Monrial, Soreze, Trebes, Bel Puech, Mazeras, Pamias, Mirapeys, Albi, Castras, San Pons de Thomieyras, Sant Amans de Valtheza, Lodeva, Ginhac, Clarmon, Montanhac, Castelnoudarri, Sant Paragori, Monpeler, Nemzo, Belcaire, Vivies, Avinho, Alex, Ayes, Tarasquo, Masselha, Aurenga, Carpentras, et de tots autres merchands, et de tots los autres lox et castels, vielas et cieutatz del rialme de Fransa, et de foras lo rialme, don que sian, que vengan á las fieyras que nostre senhor lo Rey de Fransa ha autreiadas a nos ditz Cossols et a la viela de Bezes et a nostres successors perpetualmen lasquals fieyras son e seran daissi avan perpetualmen al XXme jour del mes de May, am. VI jorns per danamens en seguens.

Item donan et autrian, nos ditz Cossols, e nom de nos e dels autres successors nostres Cossols que per tot temps seran en la dicha viela de Bezes, a totz mercadies, comprados, e vendedos dels lox sobreditz, et de tots autres quals que sian, que vengan en las dichas fieiras de Bezes, que sian quittis e franx de pagar deniers ny autra causa de botigas, de liegs e de stacas de IIII ans esseguens, tenguda la premieyra fieyra.

Item volen et autrian et prometen a tots comprados e vendedos (tenguda la premieyra fieyra) quels puesco totas las horas que se volran, elegir, metre et establir . . . . . . ses apelar nos dits Cossols ni autres de la viela de Bezes per lo temps avenen, segon que lor sera avist de far, et segon que en las autras fieyras de Pezenas et de Montanha son escrivadas.

Item volen et autriam nos ditz Cossols, e nom de nos e de nostres successors Cossols que per tot temps seran de tener e de gardar lo for de vis, de civadas e de fes aissi quan valra, 1 mes davan las fieyras de Bezes.

Item volen et autriam, nos ditz Cossols, et prometten e nom de nos et des nostres successors Cossols, que per tot temps seran de la dicha viela de Bezes, de encartar tener e gardar l'estima de las botigas que per alcuns prosomes dessus digz eligidos, per las alas dels merchans avenidos sera facha, els bes de la Mayo communa e de la universitat de Bezes, obligar per las causas contengudas en aquestas letras, atendre e no convenir totas las horas que per lo sobre pauzats alcunas daquelas alas ne seran requitz.

Item fam a saber e manifestar nos ditz Cossols a tots qui aquestas letras veyran, que tot mercadier que porte o fasse portar draps, o autras mercadarias en las dichas fieyras, es e sera quittis dintrada, de leuda e de barra; e si tant es que tenga botiga e taula en la dicha viela e en las fieyras dessus dichas de Bezes, no pagara deguna leuda de las mercaderias que vendra, sino tant solament IIII den. per taulier e de botiga al Rey, aissi coma es acostumat en las fieyras de Pezenas et de Montanhac, e en la dicha viela de Bezes.

Et si tant es que vendre no puesco, que cascu las ne puesca tornar vas son hostal ses pagar leuda ny peratge.

Item autriam et volen que las mercaderias et totz los autres homes et femnas que venran a las fieyras de la davan dicha viela de Bezes seran quittis de pagar baca VIII jorns davan las dichas fieyras et VIII jorns apres, et aytant quant las dichas fieyras duraran e per so que aquestas gracias et promesas e les autras causas en aquestas persens letras contengudas sian veras e fermas et establas per tot temps perpetualmen, ses jamay neguna cauza franher ny amermar.

Nos Guilhem Augié, Sicart Roart, Joan Barieyra, Amalric Lieura, Miquel Folcran, Johan Nadal, Mathieu Vilar, Cossols dessus ditz de la viela de Bezes, per nos et e nom de nostres successors Cossols que per tot temps seran en la viela de Bezes, pauzan lo sagel del comu de la dicha viela de Bezes en pendent, de voluntat et de cossentimen del cosselh nostre general, en l'an de la nativitat de nostre Senhor Dieu MCCCXLI, el ters jorn del mes de may.