Lo quart comte de Foix (Roger-Bernard Ier)
Mossen Roger Bernard lo Gros foc fil de Mossen Roger et de Madona Eyssemena et foc feyt comte l'an mil CXLIIII, regnan lo septe Loys, rey de Fransa, dit lo Menut; et foc marit de Madona Cecila, filha de Mossen Ramon Trinquabel, vescomte de Bezes, ab cosseilh de Mossen Ramon, comte de Barsalona, son cosy, et li donec en dot MC sols de Molgares et mes lo castel de Santa Gavela, lo castel de Montaut et mes lo castel de Borbonna ab la seignoria de Auzapans entro a l'Arieja, ab carta publiqua, et asso en l'an mil CLI.
Et foc valen cavalier en armas, ardit et pros, et tenia son pays en pax et concordia, que negun no li volia ostar res del sieu. Et, en l'an mil CXLIIII avia donat al glorios Sant Volzia la villa de Bebre et certas rendas en aquela, Aspira, La Voix, lo castel de Perlas, la maytat de la leuda del pont de Foix, - so era en lo temps que lo pont se ediffiquec, - regnan Loys, rey de Fransa. Et pueix ly donec la maytat dels forns de Foix, ab pactes que fossan tenguts de alenhar a communs despens, et aussy ben que, si se fasian molis del pont de Foix entro a Ganac, que fossan communs, et sy del pont d'Arieja entro al pont d'Arget se fasian molis, que aquels sian de Sant Volsia. Et plus li donec los delmes de Cadarcet et de Baulou entro a la Font comtal, lo castel dels Esties et Serras, lo delme et las premissias de Serras et de La Barra, lo castel de La Barra de mietj riu Alsas entro al fluvi d'Arieja, et la villa de Savignac.
Et demoro de lu un fil Mossen Ramon Roger. Mossen Roger Bernard moric l'an MCLXXXVIII et foc comte XLIII ans.