Mostep volapüka

<Kosmopolan

VEN vp. penindukom balüdo publüge, döl püka bevünetik ebinom nulik komü mens mödik, ed äsliko döl at ikipom nitedi ed isuvenudom betikäli nolelas mödik du yeltums lätik kil, so luvelat stitama püka bevünetik somik ekanom neplöpön te töbo lenzugön senitami e suvenudön nitedi publüga ven piplisenom komü om. Zu, elesagon das pük nulik ekanom palenadön vemo nefikulo e publüg pesuädom klödön, das pos stud du vigs nemödik, onolom püki bevünetik ed uvedom fägik spodön, ifi nö pükön, ko selänans in läns valik. Fe, mödikans in Talop enitedoms okis tefü vp. du tim blefik, pükats maniföfik ejenoms, bukatedels neläbik eninsedoms glamatis e plägabukis e klub bal luüno pestabom, in Melbourne, al pakön vpi. ed eplöbom bevüniko.

Jinos das pük at esuvenudom vönö nitedi nepülik in Nelijän, bi timapenäds tel vpk. pepüboms us, el Volapük Journal ed el Nunel Valemik, do ats bofik edeiloms; e, dido, penädel pesevik G. A. Sala epenom laltügi legudik e gönik dö vp. in gased Londonik The Daily Telegraph, 1887, telul 21id.

I lenadon se Yelabuk yelüpa 1889 das studels lemödik vpa. esibinoms täno in Paris, e daü Fransän, Deutän, Tälän ed in läns votik Yulopa e Melopa.

Ibö, kikodo betikäl at ebinom te bevünik ed edeiläfom nepüliko? Cedobs das kods suköl ebinoms veütik tefü sukot at.

1. Studels eplakoms das pük ebinom fikulikum ka ilesagon dö om.

2. Vödasbuk ebinom nelefulnik e no esätom plo spod tedelik.

3. Ebinos fikulik getön sägo vödasbuki löpnik nelefulnik, sesumü at in pük Datuvala vpa., o.b., deutapük.

Deno, do glutäl, ko kel pÜk at pelensumom balüdo, pevatöfom bevüniko, no binos luvelatik das vp. oxodeilom löliko.

Plakon atüpo das vp. binom med vemo pötik plo spod bevü selänans, e pagebom jeno plo ted e melak, in Yulop pato, do binos nu boso fikulik lenadön lio veitöfiko.

Binos luvelatikum das, pos yels nemödik, ven vödasbuk obinom säto lefulnik e ven pük at pogebom umo bevü jäfans, löpefs dadukik in läns valik oläsevoms vpi. ed onindukoms omi ini tidakül sifajulas.

Ikanonöv büsagön das sesags nevelätik e nemafik tefü nefikul lenadöna püki at okodoms gegoli; deno binos nog velatik das kanon lenadön vpi. vemo nefikulikumo ka püki votik aikelik.

Vödasbuk binom sovemo lefulnik das kanon gebön püki plo zeils kösömik ti valik, kelosi kolüms gaseda at blöfoms, e vöds nulik paiblinoms vifo fa Datuval. Bevüno, vödasbuks vpk. pepüboms fransapüko fa Kerckhoffs, nelijapüko fa Wood, tälapüko fa Tomasi, yapapüko fa Van de Heyden ed in püks votik, i liseds nepülik cinapüko fa Poletti in Amoy.

Söton memön das steifam al läblinön püki bevünetik sembal laböl fömi gebik, plepadik al pagebön jeno, ebinom nulik; e das fikuls kelis muton bevikodön du fomam vödasbuka säto gudik, pedüvoms tu nesäto. Ab leno zesüdos das pük nulik oninlabom vödis sovemo mödik dö kelis nelijapük luglolom nu, bi möd te smalik vödas at pagebom jeno fa nelijänans plo nüns tedelik e spod kösömik.

Lefulam vödasbuka, ninkikü nindukam vödas kaenik, odemanom natiko timi nepülik, e söton lületön te kauto ini pük lenlägi alik lüyumik vödas. Dido, äs epenobs büfumo, jinos binön konsälik, das löpef, kel opübom vödis nulik, sötom lonön timi sembal, kelüp, e no büfumo, obeginon gebön omis, e sötom gevön bevüpi sätik plo lovepolam lenlägas in püks selänik, büfo ets pogeboms. Sukü bit somik kofud valik povitom. Zu, pötü zids at seledik kelöp vöds vönik pepladaloms dub nuliks u pevotoms, söton bekipön vödis vönik in vödasbuks, läsiad"l küpi sembal etes al jonön das evedoms negeblik, e no sötoms pagebön, pläsif fa pösods at pazadöl, efe poedals.

No desidobs sävön de logs publüga jeni, das dikods evedoms bevü vpans. kels eneletoms mostepi püka, ab muton memön das vpans. binoms te mens, e mens sotas valik netätas e fekas, e das jen teik, das mens in topöfs valik tala kanoms spodön balvoto, no okodom foviko nakömi milyelüpa.

Muton koefön das mostep vpa. jinom nu epaudön nepüliko, ab kanobs bülogön das mof nulik pogivom ayelo ome timü Volasetopam in Chicago, kiüp pük poläblinom sikiko komü pops länas valik.

Binos bevüno nitedik noetön das vp. mostepom in Cinän boso. Binos jen veütik das Cinänans divoms püki at. Bi no binom pük läna foginik anik, no binom hetlik omes kodü nat okik it, e zu, plakoms das kanoms lenadön omi vemo nefikulikumo ka püki alik Yulopa u sägo yapapüki u malayapüki. Dido tefü yegs anik veütik sümom cinapüke, sodas cinänans lesagoms das: "Mandarinapük binom fat döla püka bevünetik, e sikodo cinänans edatikoms vpi."

Yufü liseds pepüböl sotimo in timapenäd at, kanon noetön das calans mödik cinänik toladöpas e jäfans elenadoms vpi; söls at luvelatiko noloms bosi dö nelijapük u püks votik Yulopa. Nelonedo cinänan elovepolom plägabuki söla Bernhaupt in Beyrouth cinapüko, e cinänans mödik kels no kapäloms püki anik aikelik yulopa elenadoms vpi. boso. Timapenäd cinänik, el Van kuo t'ung hua tzu tien, kel esibinom du yels za 2 e kela nüms 17 epuboms, epübom lisedis mödik lonedik vödas cinäno-volapüko; ye vödasbük^[1] nonik ze lefulnik sibinom jünu cinapüko.

Pesludos nu das sot gebikün vödasbuka vpk. keli kanon redakön atüpo plo geb cinänanas, binom sembal pepüböl löliko volapüko, sümöl vödasbuke fa Webster tefü nelijapük boso, e vobuk somik pamekom nu e popübom luvelatiko ünü muls nemödik.

Kludo jinos binön luvelatik das pük at pogebom ünü tim mafik bevü cinänans anik plo spod bevü oks e ko mens at in topöfs votik tala, kels uviloms benäliko lenadön vpi. at, boso panestimöl nu.

Täno nolels, kels düvoms nu das vp. no melidom konsidi omsik, olenadoms das pük at bevünetik, ifi no binom löliko lefulik, binom deno säto gudik plo gebs valik kösömik; e dukels gasedena, sosus otuvoms das vp. labedom lifafägi sembal, keli no iblesenoms, ogevoms fino ome yüfi at, kel binom din soalik kel panedom al fösefön läsevami valemik oma.

NOETS. (Vükifonät)

1. Bükapök; pla: vödasbuk.

Se Kosmopolan 1893, Nüm: 8, Pads: 113-114.