Novella IX della Giornata I del Decamerone. Corvara
Novella IX della Giornata I del Decamerone. Corvara
I dijará duncue che ai tëmps dl pröm Re de Cipro, spo che la Tera Santa fô concuistada da Gotfrid de Buglion él sozedü che na nobla signura dla Guascogna é jüda a dlijia al Sant Sepolcher, y tl gní ritur da iló rovada a Cipro, éra gnüda maltratada vilanamënter da canaia de jënt. De chësc s' un ára albü pormal zënza degöna consolaziun, y á ponsé de jí dal Re a se lamenté. Mo por gauja ch' al i é sté dit da valgügn, che süa fadia foss por nia, por gauja ch' al fô de natural tan frat y tan da nia, ch' al ne castiâ cun iustizia les ofejes fates ad atri, mo sofrî finamai infinides fates ad ël instës, de manira che vignun ch' â val' möia s' la parâ ia zënza se lascé a conësce o vergogna. La signura al aldí chësta cossa, zënza speranza de vendëta, almanco por se consolé de süa möia, se ressolve d' orëi mincioné la meseria dl Re, y rovada dant ad ël pitan ára dit: Mi Signur, iö ne vëgni te tüa presënza por aspeté vendëta dla ingiüria, ch' é stada fata a me, mo por sodesfaziun de chëra te prëii che te m' insëgnes, coche tö sofrësces chëres ch' i aldi, che te vëgn fates a te, acioche cun l' imparé da te iö pois comporté cun paziënza la mia, che Idî l' sá, sce i le podess fá, donassi a te, che t' es tan bun da les porté.
Le Re, ch' infina chë ora fô sté tan pëigher y frat, cuaji ch' al se descedass dal som, á scomencé dal' ingiüria fata a chësta signura, ch' al á vendiché rigorosamënter, a deventé n rigorosiscim porseghitadú de vignun, che cuntra l' onur de süa corona cometess valch da chël en la.